Read Kambera IMBARANI 10 Bible Online

IMBARANI 10 - Kambera bible

IMBARANI 10

¹Na uku anggama Yahundi nawàngu pa-lamaru-a ba na-paninu maünja da mahàmu da manàmu-nja, ba nda jia pàkuya nu na hada langatàka-da. Nuna na uku nda na-ngalangu-a pa-palundu-nya la nda ningu hidana na tau na ma-hurungu palumu-nya i Ala ba nawàngu pangàndi maraku, jiapa-kai ka na-nimbihu ndaungu ba nawotu mànu kameti maraku ma-hamangu.

²Jàka mbàda payaha langatàka-manjaka làti da njala tau da malumu-nya i Ala, ka nda hili ningu ndokua duna pàdanguda njalada, dàngu nda pahili wotu-apa kameti maraku.

³Tàka na ma-lohangu, jianihaika da kameti maraku pawotu la nimbihu ndaungu da ma-panamu-nja da tau rukuda da njalada,

⁴nadu na wai ria hapi dàngu wai ria kamambi bumbu ba nda da-ngalangu-ma duda pa-podahu njala.

⁵Jia-duyaka ba natàka-ka i Karitu la pinu tana, hi napanii-nya i Ala, “Nda kameti maraku dàngu mangejingu-a dumu pambuha-mu; tàka na nyuna mbàda payema-munggaka tàda ihinggu.

⁶Nda kameti maraku patunu-a paora-mu jàka ndia nda kameti maraku pa-jàmangu wàngu njalambu.

⁷Hi kupanii, ‘Yia-nggaka yia, ou Ala! Mainggu-nyaka pa-patutu-nya na pawuku-mu, hama tuna na pa-huratu la Huratu Matua rukunggu Nyungga,’ wàna,” hi wàna.

⁸La kawunga-na napanii i Karitu, “Nda kameti maraku dàngu mangejingu-a dumu pambuhamu; nda kameti maraku banda patunu dàngu nda kameti maraku ruku njala-a paora-mu,” wàna. Tuna nu na panina i Karitu jiapa-kai ka pa-panamatungu la uku anggama Yahundi-ha ba wotuha nuda da kameti maraku mbuu ndàbada.

⁹Hàlaka nu hi napanii i Karitu, “Yia-nggaka yia, ou Ala! Mainggu-nyaka pa-patutu-nya na pawuku-mu,” wàna. Jia-duyaka hi na-pahinggilu ndàbaha da kameti maraku da ma-wungangu paraïna i Ala, tàka hi na-pahilu wànja kameti maraku-na i Karitu.

¹⁰I Yehu Karitu mbàda patutu-nanyaka na pawuku-na i Ala hi na-mangejingu wikina ba kameti maraku-ya. Rukuna na mangejingu-na nuna, ba na-handàkangu-a panunju-ya lundu nu - nu, ka payaha ndàba-nandaka welingu la njala.

¹¹Nimbihu-na na ratu Yahundi na-pahàra-nya na wai ngerana nimbihu lodu ba ratuya, dàngu na-panutakungu pawotu-ha da kameti maraku ba jia - jiama-aha. Tàka da kameti maraku nuda nda da-ngalangu ndokua pa-podahu njala.

¹²Tàka na nyuna, i Karitu duna haua kameti maraku pawotu-na na pa-jàmangu wàda da njala, tàka na kameti maraku nuna na-undungu-ma duna ndumana lundu nu - nu. Ba nahàla-ka nu pawotu kameti maraku, ka mandapu-nanyaka i Karitu la kawana-na i Ala hi anguda pa-pareta.

¹³Nàhu patiangu-nanya padua i Karitu hi lundu na-panyàku-ha da papa-naka paraïna i Ala.

¹⁴Jia ba tuna nu rukuna na kameti maraku ba hauna, mbàda palundu-nanjaka la nda ningu nyurada paraïna i Karitu da tau da pambàda payaha-na welingu la njala.

¹⁵Na Ngahuna i Ala na-hakahii-mbu-nyaka lai nyuta rukuna yiana. Ba napanii na Ngahuna i Ala,

¹⁶“ ‘Yiana-ya na pa-ràndingu na paràndi-nggunja napa la lo - lodu na manàmu-nya,’ wàna i Miri, ‘napa ka kutuha da ukunggu daa la etida, dàngu ka ku-huratu-ha daa la pa-ngàdangu-da,’ ” wàna.

¹⁷I Ala napanii-mbu, “Nda kuutu-ahapa da njalada dàngu da akatu-da,” wàna.

¹⁸Nu ba tuna, pambàda jàmangu-haka da njala dàngu da iraku, nda nggàra ihi wàngu-apa la pawotu maraku pa-jàmangu wàngu njala.

¹⁹Jia ba tuna, Angu dedi, rukuna na metina i Yehu, ka toru-mbeni-ndanyaka patama la Rowa Mahupu-matua.

²⁰Ba mbàda lota-nandaka ngarangia mabidi i Yehu, nu na ngarangia na mawua-nda luri. Na ngarangia nuna nali ningu la dindi tera, nu na tàda ihi wikina i Yehu.

²¹Dàngu ba ningu-ndaka nàhu haàtu Ratu Bokulu, na ma-tanara-ya na Umana i Ala.

²²Jia ba tuna nu, màlawa ka ta-hangiri-ya i Ala mangu tànji etinda dàngu màndungu pawainda; wàngu eti pa-payarahu welingu la kaduku-nya na njala, dàngu da tàda ihi pambàda baha wàngu wai kahingiru.

²³Màtawa ka ta-pamàndu-manya na papeka-nda rukuna na pamonu-nda, nadu ba pa-monungu-maya duna i Ala dàngu na-patutu-manya duna napa na paràndi-na.

²⁴Dàngu màtawa ka ta-maràngga pa-hamata dàngga angunda, ka ta-maràngga pahàni dua wiki la pambuha-nya na angunda dàngu la pawunda mahàmu.

²⁵Màtawa ka ta-pauhi mànuma dàngga angunda, àmbu tamayau-dunya hama tuna na pakàli wàna hawiangu. Manaü tuturu-manda bàdi la pa-maràngga pa-undungu dàngga angunda, nadu ba tapi-manya ba nda namandai-apa na lodu tàkana i Miri.

²⁶Nadu jàka mbàda tàka-nandaka pulungu ma-tubangu welingu lai Ala, tàka hi taharawuku biai patuu mànu manjala, ka nda hili ningu-apa kameti maraku pa-podahu wànja da njalanda.

²⁷Na maninya lai nyuta mbulungu-ma-ana ba ta-hanobaku-ya na ratananda wai ngera i Ala dàngu na epi hànggana na matunu palàpu-ha napa da tau da ma-ndubaku-ya Nyuna!

²⁸Na tau na manda patutu-nya na uku pawua-na i Muha, pahuku pameti-ya dàngu nda pa-jàma-anya, jàka madua matailu na ma-hakahii-nya ba njala langatàka-mananya.

²⁹Manaü mbotu-naipa duna na hukungu na pa-panggànangu-ma bàdi la tau makali - lijaku-nya na Ana Ala. Na tau nuna na-pakàba-ya na wai ria pa-ràndingu-na i Ala, nu na metina i Karitu na ma-payaha-nya la njala. Nyuna napaakanya i Ngahu na ma-wuangu pa-namungu.

³⁰Tapi-manya nggamuya nu Nyuna na mambàda panii, “Napa kutungu hilunggu Nyungga! Napa Nyungga ku-panggànangu hukungu!” na mawàna. Dàngu na mapanii, “I Miri napa na-patanda-nya wai ngera na banjaru-na,” na mawàna.

³¹Nda uku maradaputa jàka ta-yàmihu la limana i Ala Maluri!

³²Inamu-mayai bàdi Angu dedi, nggi - nggikina na lurimi la rehi na ma-làpahu. La rehi nuna, ba nahàla pa-handaraku-nggai hambilana i Ala, ba dira mayila-kai; na nyuna daingu-mami bai pajàrungu dira matiki.

³³Talànga handàka-na da-pakalana-kai dàngu manda hàmuya ba da-palua-nggai lima la hangga madangu. Talànga handàka-na mitanggu mayila daa-mbunja nyimi dàngu nyuda da pa-paluangu lima tungu nu,

³⁴dàngu bai hawina karia-nja da tau ma-ngiangu la uma kapàtangu. Tàka ba wàhi ndàba-haka da mangumi, inggepi mbaha eti biaya nuna, maa bai pidunya ba ninyapa na mangumi na marihi pahàmu, na ma-padaingu lundu nu - nu.

³⁵Jia ba tuna nu, màtawa ka àmbu da-mbotadu da monungu-mi, nadu jàka daingu-mami la pawai, nadangu-ma napa na wundami!

³⁶Ipa-torungu-ma bàdi, ka peku nunju-minya na pawuku-na i Ala, ka peku ngala-minya na paràndi-na.

³⁷Maa ba pa-tulihu-duya la Huratu Matua, “Ba nda pira-àma-napa, ba naluu tàka Nyuna na manàmu-nya; dàngu nda jia pare - rehi-ananya na maina.

³⁸Hamanai na banjaru-nggu na matànji napa napawai hi naluri; tàka jàka ningu la hongada ma-kandulingu, ka nda kumbuha-anya napa,” ba wàna.

³⁹Nyuta duta nda banjaru ma-kandulingu dàngu ma-njàrangu-ata. Tàka na nyuna banjaru mapawai lai Alata dàngu papamànanguta.