Read Kambera IMBARANI 13 Bible Online

IMBARANI 13 - Kambera bible

IMBARANI 13

¹Màtawa ka daingu-na na maràngga pa-mbuhangu-mi dàngga angumi, ma-paangu dedingu ba tau Karitu-kai.

²Àmbi jia màtangu dimi panggepi ariyaa pandedi tandami la umami. Nadu ba wundaya na matungu nu, mbàda ninguka tau manggepi ariyaa la umana bundu nda pinanya ba papalewa-ha.

³Inamuha da tau da ma-ngiangu la uma kapàtangu, ba hama tuna ngiangu-mbuminyai dimi la uma kapàtangu hama tuna nyuda. Hamanai da panggàna mayila la manda palatangu, màtawa kai namu-mbuha ba beri nyimima patuda-nggai nu.

⁴Màtawa na lii lalei lii mangoma ka natembi ndàbaya tau, jia ba tuna nudu hi lupanguma bàdi da-maràngga pa-manundungu dua wikida da mapalei pa-pahangu. Na tau na ma-kajari dàngu na ma-njuraku napa ngeru na-patanda-nya ngerana paraïna i Ala.

⁵Màtawa na lurimi ka àmbu na-panyàku-ya àmahu, tàka màtawa kai patoma wàbianya nggàraya tuda na maninya lai nyimi. Maa ba mbàda panii-naka i Ala, “Nda jia màta-anggunggau dàngu nda jia dunjaku-anggunggau,” wàna.

⁶Tuna nuduka hi tatoru mbeni papanii, “I Miri jiaya na ndulanggu, nda ku-mangàdatu-a. Jia nggiki-nangga-kaka tau?” hi wànda wàngu.

⁷Àmbi mbula-dunja da tau da makapipikai, da mambàda papeka-nggainya na puluna i Ala. Panau-maya nggikina ba daluri dàngu ba dameti, dàngu kai tundunya na pawaida.

⁸I Yehu Karitu duna jia - jia-maya, àmangu nàhukai dàngu lundu nu - nu.

⁹Àmbu nairu ngàndi-dukai mbuu ndàbana na pa-pekangu manda pa-deningu hangia - hangia, da ma-panjàra-nggai. Pamàndu-manja bàdi da etinda paraïna hàmu etina i Ala, ba jiaya nunadu na mahàmu; àmbu jia nihai da kalaratu ruku pangangu na ngia pa-màndungu ninguna na etimi. Da tau àmangu da manunju-ya nuna na kalaratu nda ningua linguna.

¹⁰Ningu hau ngia pawotu maraku-nda nyuta, ka wotu wàngu kameti maraku lai Ala. Tàka da ratu da ma-lumungu la Maü Terana i Miri, nda ngera-adanya la pangaanya na kameti maraku na maninya nu la pinuna na ngia pawotu maraku.

¹¹Na wai ria banda na pawotu na pa-jàmangu wàda da njala, nangàndi-ya paraïna ratu bokulu la Rowa Mahupu-matua, tàka hi tunuha da metida da banda la hambeli ma-pauma terangu.

¹²Jia-mbuduya i Yehu hi nameti la hambeli pindu bokulu paraingu ka peku payaha-nanya welingu la njala na banjaru-na wànya na wai ria wikina.

¹³Jia ba tuna nu, màtawa ka ta-hurungu lai Nyuna la hambeli ma-pauma terangu ka taangu ngeranya ba paaka-nya Nyuna.

¹⁴Nadu la pinu tana yiana ba nda ningua ngia pa-ngiangu ma-padaingu ndumanda nyuta; ba himbu-ndanya ngia pa-ngiangu na manàmu-nya.

¹⁵Jia ba tuna ba nali padua-nda i Yehu, màtawa ka tawo - wotu mànunya i Ala; nuna nu kameti maraku pa-malangungu-ndanya lai Nyuna, na maluhu la tàda ngaru ba tawotu hailanya na ngarana.

¹⁶Àmbi marombangu-du la patuu mahàmu dàngu la pa-maràngga pandula dàngga angumi, nadu ba jiaha da maraku tungu yiadu da maliya na etina i Ala.

¹⁷Màtawa kai pa-tundungu la tau makapipi-kai dàngu kai pawawa lai nyuda. Maa ba jia-duha da ma-hamata mànuya na luri hamangu-mi, nadu ba lupangu ningu hemada ngeru lai Ala. Jàkai pa-tutungu lai nyuda, peku lumu hàmu eti-dudanggai; jàka nda tuna nu, napa dalumu hawina etinggai, na matungu nu nda pautu wà-aminya.

¹⁸Ihamaya mànu àru-nggama ndumama. Maa ba pi-mamanya ba ningu lai nyuma eti pa-tandangu mahàmu, nadu la ngga - nggàra bia ba mbuhangu mànu-mamanya pawunda-ya na ma-patubangu.

¹⁹Ku-kamahi pa-ihiku-nggai, kai hamaya-ngga ndumanggu ka naluu pabeli-ngga i Ala lai nyimi.

²⁰I Ala mbàda paluri-nanyaka na Mirinda i Yehu welingu la meti. Jiaya na metina nuna-duka nàhu hi nanjadi Hupu Ma-pawangu lai nyuta mbimbina. Nu na metina pamàndu-mbunanya na njanji pa-lupangu na patura-nanda nyuta i Ala.

²¹Màla àruki i Ala na pingi polana na peku na hàmu ka na-pamàtu-nggainya na mahàmu hangia - hangia da pa-kalana-mi la pawunda wànya na pambuha-na. Màta àruki rukuna i Miri Yehu Karitu, ka natuya i Ala daa la etinda nggàraya na pambuha-na. Màtawa i Karitu ka wotu hailanya lundu nu - nu! Amingu.

²²Ku-kamahi-nggai angu dedi, kai kanandi pahàmu-nja yiada da lii panaungu-nggu, nadu yiana na huratu-nggu ba nda natika-a pamalai.

²³Kai pinya ba mbàda luhu-naka i Timutiu na angu dedinda welingu la uma kapàtangu. Jàka mbàda tàka-nanggaka, napa ku-karia-nya jàka kumai pa-tadalu-kai.

²⁴Tambi wàda wàminya mbuu ndàbada da ma-kapipi-kai dàngu na kabungguru-na i Ala mbuta biana. Tambi wàda-mbunggai da angu dedinda la Italia.

²⁵Màla àru-kiwa i Miri ka na-paliri-nggai kanyuru mbuu ndàbami angu dedi.