Read Kambera IMBARANI 2 Bible Online

IMBARANI 2 - Kambera bible

IMBARANI 2

¹Tuna nuduka hi lupangu ta-pamàndu langatàka-manjaka bàdi da lii papekangu pambàda rongunda, ka àmbu ta-pambelingu welingu la pawainda.

²Da lii langu pambàda pekada da papalewa la boku la mangilu-nda ma-deningu-maha, tàka na tau na mapangga-ya dàngu na manda nunjuya nangala-nya tuda himbalu-na.

³Narihi-aipa duna na mànangu na marihi halawàla-nja nuda da lii langu! Jàka nda taeti wànya nuna na mànangu, nda tamara-a la hukungu. Nadu ba i Miri wikima na ma-bobaru mangilu-ya nuna na mànangu, tàka na tau na marongu mangilu-ya mbàda wuangu-daka mbuti lai nyuta ba ma-deningu-maya.

⁴La perada nuda, na-pamàndu-nya na pa-hakahiingu-da da tau paraïna i Ala wàngu ma - màtu pa-hangàtarungu dàngu tanda manda ningu hamangu, hi napabe - berinja pawuana na Ngahuna i Ala nunjuya na pambuha wikina.

⁵Da papalewa nda da-ngalangu-a kuaha welingu lai Ala la pa-pareta-ya na tana bidi na manàmu-nya, nu na tana na papanii wànda yiana.

⁶Tàka ninguma pa-tulihu la hili hau pangia la Huratu Matua, “Nggàra-mayaka nu na tau, dou Ala, hiu namuya? Na tau duna tau-ma-aya, na nyuna mu-ihilii bianya!

⁷Ndumana la rehi dànggitu mu-pangia wawaya hawutu welingu la papalewa. Muwua-nya bunjuku dàngu tembi,[3]

⁸dàngu mu-pakata-nya kuaha la mbuu ndàbana,” na mawàna. Jia ba tuna, i Alama na-mapadika-nya na tau “pa-kuaha-ya mbuu ndàbana” jàka wàna, nu na ihina nda jia ningua manda karuduku-nya na tau, wàna-duka nu. Jiapa-kai ba tuna, nda taita-aya nàhu na tau ba na-kuaha-ya mbuu ndàbana.

⁹Tàka mbàda ita-ndanyaka ba na-kuaha i Yehu! Nda nggi tuna-a mandaina Nyuna ba pawawa-ya hawutu welingu la papalewa. Màtawa ba ruku hàmu etina i Ala ka peku meti lumu-nanya nggubulu-na na tau pinu tana. Taita-ya nàhu Nyuna pa-wuangu-ya ngia pa-mandapu ma-bunjuku dàngu patembi, nadu ba mbàda mayila lundu meti-naka.

¹⁰Ràka-mana duna i Ala — na ma-padika-nya mbuu ndàbana nduma pawuku wikina — na-pawiti-nya i Yehu na ma-pamànangu ma-lànyapu pali ningu la mayila. Jia ba tuna nu peku-naka i Ala pawanda-ya na tau dangu ka da-bunjuku karia-nya i Yehu. Maa ba Nyunamaka duna ma-bunggahu-nja ànda ka peku pamara-ha.

¹¹I Yehu na-payaha-nja da tau welingu la nja - njalada; Nyuna nu na ma-payaha-nja, dàngu nyuda da pa-payaha-na, haàtu Ama-ma-aha. Tuna nuduka hi nda na-makia i Yehu, papeka ba angu dedi-nanja.

¹²I Yehu na panii-nya i Ala, “Ku-bobaru-nja napa da angu dedinggu rukumu Nyumu. Napa kuwotu-nggau Nyumu daa la pa-jàmburu-da,” wàna.

¹³Napanii-mbu i Yehu, “Jiaya i Alama na ngia pamonu-nggu,” wàna. Dàngu nahili paniimbui, “Yiangga yia, karia-ma da ana pawua-nangga Nyungga i Ala,” wàna.

¹⁴Rukuda da tau nu ananggu-nja ba wànanja, ba tau ma-ngalangu pameti-ha, ka pa-hamangu-nanyaka wikina i Yehu dàngu nyuda hi naluri la huri tau. Nu hi tuna nu na pawunda-na, ka peku pa-làjaru-nanya i Kambàliku na ma-kuaha-ya na pameti wàngu rukuna na metina Nyuna.

¹⁵Tuna nuduka ba na-pahàla-ha da tau pa-paatangu la ngala lurida paraï pa-mangàdatungu meti.

¹⁶Nu lohangu-nanyaka ba nda jiaha da papalewa-a da pandula-na, tàka jiaha da wàlana i Ambarahàmu duda.

¹⁷Na ihina nuna lupangu nahama-manja bàdi la ngga - nggàra da angu dedina, wàna duka nu. Nu ba tuna nu peku-naka panjadi Ratu Bokulu ma-tuturu dàngu mamila etina. Wàngu lumungu-na na matuna nuduka hi peku jàmangu-da da njalana na tau.

¹⁸Dàngu rukuna ba mbàda pàdangu-naka mayila dàngu ba mbàda kamanyaka, peku ndula-nahaka da tau da pa-kamangu, maa ba pambàda kamangu duya Nyuna wiki dàngu ba mbàda mayila-naka.