Read Kambera IMBARANI 3 Bible Online

IMBARANI 3 - Kambera bible

IMBARANI 3

¹Angu dedi, angunda patau Karitu pambàda paau-mbuna i Ala! Màla pangàda hàmu-manya bàdi rukuna yiana i Yehu! Na-palewa paihiku-nya Nyuna paraïna i Ala panjadi Ratu Bokulu la anggama payàpa-nda.

²Na-tuturu-ma duna lai Ala na mambàda pindiya la paràma nuna hama tuna i Muha àmangu ba na-tuturu pa-palaku-ya na paràma-na la Uma Ala.

³Tàka i Yehu duna na-paràkangu-ma pa-ngalangu tembi maraku ma-parihingu welingu lai Muha. Nadu na tau na mawulu uma ba parihi tembiya welingu la uma nuna.

⁴Deningu-na nimbihu-da da uma ba ninguma mawulu-ha, tàka na mawulu-ya mbuu ndàbana, jiaya i Ala duna.

⁵I Muha na-tuturu-ma duna ba ma-lumungu-ya daa la Umana i Ala dàngu la pa-patàka-nya na papaniina i Ala la rehi na manàmu-nya.

⁶Tàka i Karitu duna na-tuturu ba Anaya, na makata-nya na Umana i Ala. Nyuta-maka yia Umana i Ala, jàka pa-daingu ringgitu-nda dàngu pa-daingu màndungu-na la etinda la pangala-nya na pamonu-nda.

⁷Jia ba tuna nu, hama tuna na papanii-na na Ngahuna i Ala, “La lodu nàhu, jàkai ronguya na wai liina i Ala,

⁸àmbi malihu-du hama tuda da boku la mangilu-mi, ba da-katadaku lai Ala, hi dakama-nya i Ala la maràda wara.

⁹‘Lai nu dakama-ngga paraï da boku la mangilu-mi, dàngu dakaka-ka,’ wàna i Ala, ‘jiapa ka mbàda ngita-danja da pawunda-nggu ba patu kambulu ndauna mandaina,’ wàna.

¹⁰Jia-duyaka hi kuhàngga-nja, hi kupanii, ‘Naingu-mana ba nda da-tuturu, dàngu nda dabihu pa-karadaku-nja da hupu liinggu,’ hi wànggu.

¹¹Kumbeni hi ku-harangu, ‘Nda jia ngalangu-ada patama la tana nuna la pa-hangahu dàngga Nyungga,’ wànggu,” wàna.

¹²Oi angu dedi, manggangu ka àmbu ningu haàtu lai nyimi ma-akatu etina dàngu manda pawai, hi na-kandulingu ba namaraunya i Ala maluri!

¹³Jia ba tuna, ka àmbu ningu haàtu lai nyimi pa-panyonga ma-akatu hi na-ndubaku-ya i Ala, màtawa kai maràngga panaungu dàngga angumi nimbihu lodu ba talànga luri-ndapa la rehi nàhu, nu, “na Lodu Nàhu” ba wàna la Huratu Matua.

¹⁴Nyuta mbuu ndàbanda angu pajàrungu-na i Karitu-ta, mili àru nyuna takata undunya na ma-màndungu la etinda piti welingu la pakiri-na lundu hupu njàpuna.

¹⁵Yiana-ya na pa-tulihu la Huratu Matua, “Jàkai ronguya na wai liina i Ala la lodu nàhu, àmbi malihu-du, hama tuda da boku la mangilu-mi, ba da-katadaku lai Ala,” wàna.

¹⁶Màla, nggamu-haka wàmi da marongu-ya na wai liina i Ala hi katadaku biada-nyai lai Nyuna? Hi jia ndàba-maha da tau da pairu ngàndina i Muha welingu la Mehiru, wàngguka?

¹⁷Dàngu ka nggamu-haka da pambenina i Ala la patu kambulu ndaungu mandaina? Jiaha da matuu manjala, hi dameti hadaparu la maràda telangu, wàngguka?

¹⁸Ba tuna yia na harangu-na i Ala, “Nda jia ngalangu-ada patama la tana nuna la pa-hangahu dàngga Nyungga,” wàna — ka nggamu-haka duda da palaana i Ala? Jiaha da tau da ma-katadaku lai Ala, wàngguka?

¹⁹Nu pidunda-nyaka nàhu, hi nda da-ngalangu patama, ba ruku nda pawaida lai Ala.