Read Kambera IMBARANI 5 Bible Online

IMBARANI 5 - Kambera bible

IMBARANI 5

¹Nimbihu ratu bokulu papindi-ya welingu la banjaru, hi wotuya la palumu-nya i Ala huruda nyuda. Na paràma-na jiaya la pawotu hunggu maraku lai Ala pa-jàmangu wàda da njala.

²Na ratu bokulu wiki nadangu-mai duna na malijangu-na la ngga - nggàra, jia ba tuna nu hi peku wànguna ma-malijangu la tau manda nggàra papina dàngu na ma-njàrangu.

³Tàka rukuna ba na-malijangu-mai duna nyuna jia-duyaka hi lupa nawotu bàdi maraku ruku njala, nda mbulungu bia lumu njala banjaru, tàka lumu njala wiki-mbuna.

⁴Nda ningumbu haàtu mawotu wikina la panjadi ratu bokulu. Hi nanjadi ratu bokulu na tau, jàka napaau-nya paraïna i Ala — hama tuna i Harungu.

⁵Tuna numbu i Karitu. Nda nawotu-a wikina la panjadi Ratu Bokulu. I Ala wikima duna na mawotu-ya. I Ala napanii-nya, “Nyumu Ananggu-nggau; la lodu nàhu-maka ba Ama-mungga,” wàna.

⁶Napanii-mbu i Ala la hau pangia, “Nyumu Ratukau lundu nu - nu, hama tuna i Ratu Melikuhendiku,”[4] wàna.

⁷La rehi lurina i Yehu yia la pinu tana na-hamayangu dàngu kaladaku-na lai Ala pakariangu wai matana, na mamàka pa-pahàla-ya Nyuna welingu la meti. Dàngu rukuna ba na-pawawangu wikina lai Ala ba natembi marakuya, ka rongu-nanyaka.

⁸I Miri Yehu duna Ana Ala-maya, tàka jiapa-kai ba tuna nu, na-papekangu-ma pa-karadaku ba jiaya na-pàdangu-na mayila.

⁹Ba hàlaka patuya ma-pahàla langatàka, ka jiaya Nyunaka na pingi pola mànangu lundu nu - nu nduma mbuu ndàbana na tau ma-karadaku lai Nyuna,

¹⁰tàka i Ala na-paloha-mbunya ba jiaya Nyunaka na Ratu Bokulu, hama tuna i Ratu Melikuhendiku![5]

¹¹Jàka jia-yaka na mandapu na i Yehu ba Ratu Bokulu-ya, nadangu-mapa làti na papeka-nja ba wànggunggai, tàka nda namuda la pa-kaloka-nya maa ba ndai renggadu pa-jàngapu-ya.

¹²Toma-mana-nyaka làti na rehina ba ràka nggurukai, tàka jiangu biaipa ba ningu bàdi ma-papeka-nggainja da kawunga pakiri-na na puluna i Ala. Ndedi-mapa ingalangu pangangu ma-màndungu; ràka ma-unungu wai huhu-ma-a-kaipa.

¹³Na tau na ma-unungu-ipa wai huhu, ana rara-duyapa; ndedi-mapa naera-nya jàka nggàraya na ma-padeningu dàngu na manjala.

¹⁴Na pangangu màndungu tunggu ma-matua-ya da mambàda ndàmangu, hi da-ngalangu pahekanya na mahàmu dàngu na manjala.