Read Kambera IMBARANI 6 Bible Online

IMBARANI 6 - Kambera bible

IMBARANI 6

¹Jia ba tuna nu, màtawa ka ta-pangalangu la nuana na lii pa-pekangu rukuna na matua luri tau Karitu, dàngu àmbu dira-ana la pa katana-ya na lata kawunga pa-pekangu la anggama-nda. Àmbu tahili beli-dunyapa na lata pa-pekangu ba na-pànjangu-ma bàdi na tau la pawunda-ya na manda lingu dàngu ba pawaima bàdi lai Ala,

²jàka ndia na kawunga pa-pekangu ruku pa-runungu[6] jàka ndia rukuna na pa-dambakungu lima la tau, jàka ndia rukuna na luri beli welingu la meti, jàka ndia na hukungu ma-palupangu.

³Jiaya jàka wàna i Ala, màtawa ka ta-pangala-nja da nuada nuda da lii pa-pekangu!

⁴Nadu, da tau da mambàda kandulingu, nda napeku-apa la pa-kapipi beliha. Nyuda àmangu mbàda ninjaka la hambila-na i Ala, dàngu mbàda pàda-danyaka na pawua-na Nyuna. Nyuda mbàda kuaha-mbuna-njaka paraïna Ngahuna i Ala.

⁵Nyuda mbàda ndàma-danyaka ba mahàmu-ya na puluna i Ala, dàngu mbàda pàda-danjaka da pawua-na da ma-patahu la rehi na manàmu-nya.

⁶Tàka hàlaka nu hi kandulingu biada-nyai! Nggiki peku-nakaka la pa-kapipi beliha ka da-panjilungu welingu la nja - njalada. Nadu ba hili harika-danyai na Ana Ala hi datuya la pa-pawawa-ya la hangga madangu.

⁷Na tana na pa-mangàpahu wai urangu na makàli parunya, hi na-patumbu-ya na matumbu na maningu lingungu la tau mapoka-ya, na tana nuna na-pamaringu-ya paraïna i Ala.

⁸Tàka jàka natumbu bianya witu dàngu rii madàka, ka nda ningu-apa linguna nuna na tana, hi naràtu-nya napa paraïna i Ala dàngu hi tunu palàpu-ya la hupu njàpuna.

⁹Na nyuna ha angu dedi pambuha-nggu, jiapa-kai ba panii tuma nu, da-màndungu biai da etima rukumi nyimi. Màndungu-madanya da etima ba mbàda ngala-minjaka da marihi hàmu, nu da kanyuru da anguna na pamànangu wàmi.

¹⁰I Ala duna nda Ala manda tànji-aya. Nda nambula-anya na paràma-mi ndumana Nyuna, dàngu na mbuha-minya Nyuna bai paloha-nya la lumu-minja da angunda patau pawai àmangu dàngu nàhumbu.

¹¹Marinju halawàla-manya ka pa-daingu ànjaru-mi nimbihumi lundu hupu njàpuna, hi lupangu ingalanya nu na pamo - monumi.

¹²Nda ma-mbuhangu-a kai mayau. Tàka na pambuha-ma kai luri hama tuna da tau da mangala-nja da paràndi-na i Ala, ruku pawai lai Nyuna dàngu ruku pa-daingu nedingu-da.

¹³Ba na-paràndingu i Ala lai Ambarahàmu, na-harangu ba jiangu-ma napa na-pahàra-nya jàka nggàraya na pambàda njanji-naka. Tàka ba nda ningua marihi jangganya i Ala, ka harangu wàngu-nanyaka tamu wikina.

¹⁴Napanii, “Ku-panjanjingu ba ku-pakanyuru-kau napa dàngu ku-paworu-makau duku,” wàna.

¹⁵I Ambarahàmu na-patoru-nya ba nadeningu, ka ngala-nanjaka da panjanji-nanya i Ala.

¹⁶Jàka na-harangu na tau, nahara wànya na tamu tau hawiangu na marihi-nya nyuna, nuna na harangu na-pakamàndalu-ya na mapandaya na pa-njanjingu.

¹⁷I Ala nambuhangu pa-kawàndi-ya la tau na mangala-nya na panjanji-na, ba nda na-haleli-aya na pawuku-na. Tuna nuduka hi na-pamàndu wànya harangu na panjanji-na.

¹⁸Nu ba dua ngiada nda da-haleli-a: I Ala duna nda peku kambàliku-mana la panjanji-na dàngu la harangu-na. Jia ba tuna nu, nyuta mambàda handera lai Ala, napanau pa-mbangatu-nda la pakata undunya na pamonu-nda na maninya la hangganda.

¹⁹Na monungu-nda beri watu labu matama tanjikuya dàngu na ngia pakata undungu-nda hi taluri ngudu. Na monungu nuna na-paràpangu la hambeli dindi tera la Rowa Mahupu-matua la Umana i Miri la awangu.

²⁰I Yehu mbàda mangilu-nandaka ànda lai nu, dàngu mbàda tama-naka lai nu ba nanjadi Ratu Bokulu-nda lundu nu - nu, hama tuna i Ratu Melikuhendiku.