Read Kambera IMBARANI 8 Bible Online

IMBARANI 8 - Kambera bible

IMBARANI 8

¹Nu na papanii-ma yiana-ya na mapapingi: Ninya lai nyuta na Ratu Bokulu na matungu nu, na ma-mandapu pa-pareta anguna i Ala Mahupu-mangunju la awangu.

²Nyuna nalumu-nya na paràma ba Ratu Bokulu-ya la Rowa Mahupu-matua, nu la maü tera langatàka-na i Miri, na pa-pahada-na i Miri, na panda ruku tau.

³Nimbihu-na na ratu bokulu-ka pawotu-ya la pangàndi mangejingu dàngu maraku lai Ala. Tuna numbu na Ratu Bokulu-nda; ningu-mana bàdi pa-mangeji-na.

⁴Làti jàka la pinu tanaya, nda jia ratu-aya, ba mbàda ningu-duka ratu mangàndi-ha da pamangejingu nunjuya na uku anggama Yahundi.

⁵Na paràma palumu-da ba ratuha ninu wai maü mara-ananya duna làti welingu la maninya la awangu. Mbàda peka-mana-nyaka i Muha paraïna i Ala la handàka-na rukuna nuna, ka wuluya na Maü Terana i Miri ba wàna i Muha. Napanii i Ala lai Muha, “Tàngaru pàku! Mbuu ndàbana muwulu-maya bàdi nunjuya na ngerangu na papangitangu-kau la palindi,” ba wàna.

⁶Tàka nàhu i Yehu duna na-ngalangu paràma ratu na marihi mangarangu welingu da paràma-da nuda da ratu. Nadu na pa-njanjingu-na i Ala dàngu na tau, jiaya na pa-njanjingu na marihi hàmu ba na-palatangu-du la janji na marihi hàmu.

⁷Làti jàka nda ningu nyurana na panjanjingu na ma-mangilu, ka nda nggàra ihi wàngua ka turaya na pa-njanjingu padua wàna.

⁸Tàka i Ala duna mbàda hunggunaka njala la banjaru-na, hi napanii, “Rimangu, nàmunya taï na lodu, ba kutuya na pa-njanjingu bidi la banjaru Ihirailu, dàngu la banjaru Yahunda.

⁹Nda hama jiangu pàku na pa-njanjingu na patunggu la boku la mangilu-da la lodu londa-nggunja paluhu welingu la tana Mehiru. Nyuda nda da-padaingu-a la pa-njanjingu patunggu lai nyuda; kiringu nunadu hi nda ku-ihili-nja nyuda.

¹⁰Tàka nàhu, yiana-yaka na pa-njanjingu la banjaru Ihirailu la lo - lodu na manàmu-nya, wàna i Miri: Napa kutuha da ukunggu la pa-ngàdangu-da, dàngu ka ku-huratu-ha la etida. Nyungga napa ka Ala-dangga, dàngu nyuda napa ka banjaru-nggunja.

¹¹Nda da-panaungu-apa la angu nituda, dàngu nda dapanii-mbunjapa da angu dedida, ‘Tanda-yawa i Miri,’ nda wàda-apa. Nadu ba datanda ndàba-maka ngeru, ka ma-matua-ya ka anakeda-yakai.

¹²Napa kujàma-nja da njala-daka, dàngu nda kuutu-ahapa da ndoku-daka,” wàna.

¹³Nu ba na-jakaru-nya na pa-njanjingu mabidi, mamandai-yaka dàngu mamiri-yaka na pa-njanjingu na ma-wungangu, wàna-duka nu i Ala; tàka jàka nggàraya na mambàda mandai, mareni làpahu-mbuna-nyaka.