Read Kambera YAKOMBU 2 Bible Online

YAKOMBU 2 - Kambera bible

YAKOMBU 2

¹Angu dedi hapaelami! Ba ngaha patau mapawai-ta lai Yehu Karitu, Miri na Mahupu mangarangu, àmbi pakawàri - kawàri-dunya na tau, bai palata-nya na paita wàngu mata.

²Nadu jàka ningu haàtu tau wulu na matungu tawuru àmahu rara dàngu paki manandangu na mamai la ngia pa-pauhi-mi, hàla nàmunyai duna na haàtu tau mila na mapaki katàri kahira,

³nyimi mitembi niyapa na tau na mapaki manandangu. Mipanii-nya, “Mai umbu kau mandapu la kanjàka mahàmu yiana”, wàminya. Tàka la tau mila, “Ndolaku lai nukau” jàka ndia “Mandapu lai nu la kaheli” wàminya.

⁴Ba timi nu kawàri dimi-nyaka na angu hama taumi dàngu pabila-minya na tau bai palata-nya na pangàdangu-mi na ma-akatu.

⁵Namuya, angu dedi pa-mbuhangu! Na tau mila la pinu tana yiana, napindi-ya paraïna i Ala la pawulu wàngu pawai. Da tau nuda jia-haka da angu banjaru-na i Ala, hama tuna na paràndi-na i Ala la tau na mambuha-nya Nyuna.

⁶Tàka nyimi mi-paaka-nja da mamila, tàka da tau wulu padua-ka da ma-kapidihu-kai dàngu da mabinda-kai nyimi la rapatu!

⁷Nyuda da ma-paaka-nja da tamu patembi da pangala-mi welingu lai Ala!

⁸Nyimi wàngu-minya ma-deningu jàka mi-palaku-ya na uku la Pahanganji na maninya daa la ndalaru Huratu Matua, “Mbuhanya na angumi hama tuna bai mbuhangu wikimi”, ba wàna.

⁹Tàka jàka mi-kawàri - wàriya na tau bai palata-nya na hangia - hangia na paita, nyimi tuminya manjala, dàngu na ukuna i Ala wàlahu-nanya lai nyimi ba pangga-minya na uku.

¹⁰Na tau na mapangga-ya na hangia welingu la uku - ukuna i Ala, na àndana nyimi pangga hàla-maminja nuda da uku mbuu ndàbada.

¹¹Nadu, “Àmbi njuraku”, na mawàna, ba jia-maduyai, “Àmbi pameti tau” na mawàna. Jia jiapa ka ndai njuraku, tàka mi-pameti tau, jia-maya nyimi ba mapangga ukukai.

¹²Kareuku-wa dàngu pa-luangu-wa lima hama tuna na tau tiangu na pa-rapatu tundunya na ukuna i Ala na ma-pamarandeka-ya na tau.

¹³Nadu i Ala ba nda na-paitangu-apa mila etina la tau na manda tandaya na mila eti. Na nyuna na mila eti na-kapànduku-pa duna welingu la hukungu.

¹⁴Angu dedi hapaelami! Nggàra linguna ba napanii na tau, “Nyungga tau pawaika”, ba wàna, jàka nda na-pawuwa-ya nuna la paruku-na? Peku-naka na pawai tungu nu ba pamàna wànguya?

¹⁵Ngera hama tuna na haàtu na angu dedi, mini-yakai ka kawini-yakai, na ma-kalanangu pakina dàngu ka nda natoma-ya ana pangana hau lodu - hau lodu.

¹⁶Nggàra lingu-naka bai paniinya, “Paki pa-hàmungu paki ma-mamitu dàngu nga pa-hàmungu-wa!” ka wàmi bianya — bundu nda wua-minya jàka nggàraya na pa-kalana-na ba naluri?

¹⁷Tuna numbu na pawai, jàka nda pa-pawuwa-ya la paruku-nda, na pawai tungu nu nda ningua linguna.

¹⁸Talànga wanguna ningu mapanii, “Ningu ma-kawana-nya na pawaina dàngu ningumbu na ma-kawana-nya na paruku-na,” wàna. Kuhema nyungga, “Paita-nggapa jàka nggikina hi peku ningu bia pawaina, tàka hi nda ningui paruku-na, tàka napa nyungga duku ka ku-paita-nya na rukunggu tandana ba ningu pawainggu.”

¹⁹Màla nyimi miwaiya i Ala ba didi-aya ba na-pamehangu wàngguka? Na, da wàndi dawai-mbuya ba tuna da-kandàndaku paraï pa-mangàdatu!

²⁰Minduba-kaduka dimi! Màla jiangu-maipa nu ka pa-kawàndi-nggainya ba nda nalingu la paningu pawaingu bundu nda ningu paruku?[1]

²¹Tàngaru biaya i Ambarahàmu boku la mangilu-nda. Nyuna na-kataku hàmuya paraïna i Ala paraï ningu paruku-na, nu ba jiaya na maraku wànanya i Ihàku, anana lai Ala, dita la pinu ngia pawotu maraku.

²²Lai yia lohangu-nanyaka na pawai ba pawuwa wànya paruku-ma bàdi hi peku lundunguna.

²³Nuna na-jàngapu-yaka na ndalaru la Huratu Matua, “I Ambarahàmu napawai lai Ala, dàngu ruku pawaina na-kataku-ya paraïna i Ala ba tau ma-patutu-nya na pambuha-na i Ala”, ba wàna. Nuna na pakiri-na i Ambarahàmu, “Ariyaa-na i Ala”, hi wàdanya.

²⁴Lohangu-nanyaka nàhu, na tau pa-kataku hàmuna i Ala ba jiaya na tau na maningu pa-rukungu, nda mbulungu biana ba ningu pawaina.

²⁵Tàngaru-mbuya na rukuna i Rahàpu, na kawini pahunda. Nyuna na-kataku hàmuya paraïna i Ala ruku paruku-na, nu ba jiaya na yema-nanja da tau Ihirailu da malua pa-butingu, ba natulu-nja la papalai winingu wikida la hau ànda.

²⁶Na, hama tuna na tau na manda ningu ngahungu ba meti-nanya, tuna numbu na pawai na manda ningu rukungu ba meti-nanya.