Read Kambera YAKOMBU 4 Bible Online

YAKOMBU 4 - Kambera bible

YAKOMBU 4

¹Màla nggi paweli-daka nu da pahànggangu dàngu da parau ngaru la padua-mi nyimi? Màla nda pa-weli-dapa nu la paiti - paitiru-mi na ma-panua naingu la pa-pabera daa la etimi, keha ka tangala-nya na pahàmu eti wàngu la pinu tana ba wàmi?

²Nyimi mi-mangànjilungu tàka ndai ngalangu, ka jia-duyaka hi patikingu pa-pameti tau! Nyimi mi-paringgitungu tàka ndai tomaya na pahimbu-mi, ka parau ngaru-minyaka, ka pahànggangu-minyaka. Nyimi ndai ngalangu ngga - nggàra, nadu nyimi ba ndai karai lai Ala.

³Dàngu jiapa ka mbàda karaimi-kadu, ndai ngalangu-mapa duna, nadu na ngia pa-hanggangu-na na pakarai-mi ba nanjala-du; na pakarai-mi ba jiaya na pahàmu wàna na eti biami.

⁴Nyimi tau nda tuturu-kai! Ndai pinya dimi, nyimi jàka mi-paangu dànya na pinu tana yiana, nyimi muhuna i Ala-dukaika?

⁵Àmbu reki-duya ba nda ningu latana na maninya daa la Huratu Matua, “Daa la wikinda nyuta i Ala natuya na ngahu na ma-mbangatu karuhi-na.”[2]

⁶Na nyuna ba tuna, na mila etina i Ala na pawua-nanda nyuta na kapàru-pa welingu la pa-karuhi-na na ngahunda. Jia-duyaka hi nimbunya daa la Huratu Matua na pa-tulihu, “I Ala napapa-nja da tau da majangga etida, tàka namila-nja eti da tau da ma-pawawangu wikida”, ba wàna.

⁷Jiaya nu, marubuku-wa lai Ala dàngu lawanya i Kambàliku, napa napalai-ma i Kambàliku welingu lai nyimi.

⁸Hangiri-wa lai Ala, napa i Ala na-hangiri-makai duna. Paili-ha da limami, nyimi ha tau njala! Dàngu payaha-nja da etimi, nyimi ha tau kahanga eti!

⁹Màtawa kai manjaria langata - tàka, kai hii dàngu kai padudurungu; màtawa na rikimi ka na-pahilungu wàngu hii, dàngu na hawola-mi ka na-pahilungu wàngu hawina!

¹⁰Màtawa nyimi kai pa-wawangu wikimi la hanggana i Miri, napa i Miri na-pajangga-makai duna.

¹¹Angu dedi hapaelami, àmbi pa-pulungu-du dàngga angumi, bai paakangu dàngu bai panjala angumi. Na tau na ma-paakangu dàngu na ma-panjala anguna hama tau Karitu-na, paaka-nanya dàngu panjala-nanya na ukuna i Ala. Dàngu jàka mi-panjala-ya na ukuna i Ala, tandana nyimi ba ndai patundu-nja da uku nuda, tàka hakimu uku-dukaika.

¹²Làti ba haàtu pàkuna na mangu hàkungu la pa-wuangu uku la tau dàngu na ma-patanda-nya ngera na tau. Nyuna Ala ma-kuaha-ya la pa-pamànangu dàngu la pa-palàjaru. Jia nggamu-kaika dimi nyimi, hi mi-mbuhangu pa-panjala-ya na angumi patau?

¹³Da angu dedi da mapanii, “La lodu nàhu jàka ndia haromu nyuma laku-manya la paraingu pinangu dàngu ndàdiku-manya lai nu hau ndaungu la pa-danggangu dàngu la pahimbu àmahu”, ba wàda — ronguya yiana na panaungu-nggu.

¹⁴Nggàra madedi-ya na lurimi haromu, nyimi ndai pimbunya! Nyimi beri hama kawuu-akai, ba hawutu-ana na paita wànya, hàla molungu-ma-ananya.

¹⁵Làti, “Jia jàka wànadu i Miri jia-yaka hi maluri hi maràma tungu ni tungu nu”, wàmia bàdi.

¹⁶Tàka nàhu nyimi ngamba dàngu panii abungu-minya. Na kareuku tungu nu nanjala.

¹⁷Jiaya nu, na tau na mapinya jàka nggàraya na mahàmu làti ka nalaku-nya tàka hi nda palaku-nanyai, na tau nuna nanjala.