Read Kambera YAKOMBU 5 Bible Online

YAKOMBU 5 - Kambera bible

YAKOMBU 5

¹Angu dedi hapaelami, tau wulu! Patinginya na panaungu-nggu. Màtawa nyimi kai hii dàngu kai padudurungu nadu napa nyimi ba pàda-minyaka na mayila!

²Da pawulu-mi làjaru-danyaka. Da pakimi nga-nanjaka manganii.

³Da àmahu marara mabara-mi patai rara-danyaka, da patai rarada napa hakahii-haka ba dalawa-nggai nyimi dàngu napa nga-danjaka da tolumi hama tuna epi. Nyimi ba pabundu-minjaka da bandami ba talànga ndedi jiaya na njàpuna.

⁴Nyimi ndai wuanja wundada da tau da maràma la wokami. Nàhu kai patingi-nja ba da-kaladaku! Da tau da ma-pauhi-nja da ihi wokami, dawara pakarai pa-ndulangu tàka na warada natoma-maka la kahilu-na i Ala, na Miri Mahupu-mbiha.

⁵Nyimi dimi luri borakungu-minya dàngu bai làdaya na pahàmu eti wàngu la pinu tana yiana. Nyimi beri pamboka-minya wikimi ndumana la lodu hambàli.

⁶Nyimi bai hukunja dàngu bai pameti-ha da tau da manda njala, tàka nyuda ba nda dalawa-nggai.[3]

⁷Jiaya nu, patoru-nya angu dedi, ka lupa natàka i Miri. Tàngaru jàka nggiki hama pa-torungu-na na tau tungu woka, lupa nangala-nya ihina na wokana na mambana pa-wilingu lai nyuna. Na-patorungu ba na-patia-nya na rehi urangu pamunju ruu ai dàngu na rehi urangu pawàla wàla ai.

⁸Màta nyimimbu kai patoru-nya dàngu ka da-bokulu da etimi, nadu na lodu tàkana i Miri ba mareni-ama-naka.

⁹Àmbi kangudaru-du dàngu àmbi panjala-du dàngga angumi, napa nahuku-dunggai paraïna i Ala. Namuya! Na Hakimu mareni-naka, rimangu-mana-nyaka la pamai.

¹⁰Angu dedi hapaela-mi, namuha da ngara wunangu da ma-kareuku wànya na tamuna i Miri. Nyuda da-patorungu dàngu da-pajàrungu la pa-mayila. Jia tu-hawa nyuda ka ngerangu-ha lai nyimi.

¹¹Nyuda na-paoha-nja tau nadu ba da-pajàrungu. Nyimi mirongu-mayaka na pa-torungu-na i Ayupu, dàngu nyimi mipi-manyaka jàka nggikina i Miri la malamiri ba na-pakanyuru-ya nyuna. Nadu i Miri ba lalu mila etiya dàngu ba nahàmu etina.

¹²Na marihi ailulu yiana-ya: Àmbi harangu-du, ka wànya na awangu jàka ndia ka wànya na tanakai, dàngu ka wànya na hangia - hangia-kai. Peka-yaka, “jia” jàka jiaya, dàngu “ndia” jàka ndiaya; ka àmbu napuha-nggai hukungu paraïna i Ala.

¹³La hongami nyimi jàka ninya na ma-talànga handuka-na, màtawa ka na-hamayangu. Jàka ninya na ma-hawola, màtawa ka naludu wotunya i Ala.

¹⁴Jàka ninya na mahidu, màtawa ka napaau-nja da ma-pairungu la kabungguru. Dàngu màtawa da ma-pairungu ka da-hamayangu tungguna nuna na mahidu dàngu màta ka dadoha-nya lonahu wànya na tamuna i Miri.

¹⁵Na hamayangu-da nyuda jàka weli eti-maduda, napa i Miri na-pamàlaru-maya duna nuna na mahidu dàngu najàma-nja da njala da pambàda rukuna.

¹⁶Jia-duya nu, nyimi màtawa kai kawàra mangaku njalami dàngu kai kawàra pa-hamayangu, ka pekuna ka pamàlaru-kai. Na hamayangu tau ma-manundu lai Ala, nabokulu na kuaha-na.

¹⁷I Elia hama taunda nyuta-maya. Nyuna na-hamayangu langata - tàka ka àmbu peku puruna na urangu, ka nda napuru-apa na urangu lundu tailu mbua ndau hakawita-na.

¹⁸Tunaka nu ba nahili hamayangu-ka, nu na awangu ka papuru-nanyaka na urangu hi lupa nahili tu beli ihina na tana.

¹⁹Angu dedinggu hapaelami! La hongami nyimi jàka ningu manda hili tundunya na pa-ajaru welingu lai Ala, hàla ka ningu haàtu tau mairu ngàndi beliya lai Ala,

²⁰namuya na ndalaru yiana: Na tau na mairu ngàndiya na tau panjànga beli welingu la àndana na manjala, na tau nuna pamara-nanyaka na hamangu-na nuna na tau njala[4] welingu la meti dàngu jiaya hi kiri danguda da njala da pa-jàmangu. Matembi-kai, Yakombu