Read Kambera 1 PETURU 2 Bible Online

1 PETURU 2 - Kambera bible

1 PETURU 2

¹Jia ba tuna nu, wàru ndàba-njawa da ma-akatu-ka welingu la wikimi; àmbi hili kambàliku-dupa, dàngu àmbi kapilandu-dupa. Àmbi malara etimi, dàngu àmbi pawawa tau hawiangu.

²Màtawa ka hama ana rara mabidi dedikai, na mamadau mànunya na wai huhu pangahu manda ningu korungu. Tuna nuduka hi mi-kabutuhu dàngu hi pamàna-nggai.

³Daa la Huratu Matua tuna yia na pa-tulihu, “Nyimi mbàda làda wiki-minyaka ba dira hàmu etiya i Miri,” wàna.

⁴Jia ba tuna, hurungu-wa lai Miri. Nyuna beri watu luriya, na pawàru tau pinu tana, ba nda ningu linguna ba wàda làti; tàka i Ala duna napindi-ya patuya watu ma-pawilingu.

⁵Nyimi dimi hi hama watu lurikai. Jia ba tuna màtawa kai mbuhangu ka tukai pa-pahada wànya na Uma Ala ma-pangahu. Tuna nuduka hi ratukai, maluri patukingu ndumana i Ala dàngu rukuna i Yehu Karitu hi imangejingu lai Ala, kameti maraku pangahu paora-na i Ala.

⁶Nadu daa la Huratu Matua tuna yia na pa-tulihu, “Nyungga mbàda pindi-nggunyaka na hau watu ma-pawilingu, na pa-bànjalu-nggu la Hiungu ba watu marihi mehaya; na tau na mapawai lai Nyuna nda jia pa-makia-aya,” ba wàna.

⁷Nuna na watu lalu pa-wilingu-ya ndumami nyimi mapawai. Tàka ndumada da manda pawai, hàrangu-danyaka da ndalaru Huratu Matua yiada, “Na watu pawàru-da da tukangu nuda jia bia-yaika na watu marihi-meha,” ba wàna.

⁸Dàngu “Nuna jia-yaka na watu pa-tunjuru wàna na tau, na watu na panjoru wàda nyuda,” ba wàna. Hi da-tunjuru jia-duya ba nda dawaiya na puluna i Ala. Tuna numaka duna na pambàda kawuku-na i Ala na ngerada nyuda.

⁹Tàka nyimi dimi banjaru papindi-kai, ratu ma-lumungu hanganji-kai, banjaru matua-kai, paleha ndumana i Ala, banjaru-na i Ala wiki. I Ala napindi-kai dàngu na-paaunggai paluhu welingu la ma-kapàtangu patama la hambila-na na ma-handaraku, ka peku pakada-minya na lii langu rukuda da pawu - wundana da manda ningu hamangu.

¹⁰Àmangu nda banjaru-na i Ala-akai làti, tàka nàhu banjaru-na i Ala-kaika. Àmangu nda namila-anggai eti làti i Ala, tàka nàhu ngala-minyaka na mila etina Nyuna.

¹¹Oi angu dedi pambuha-nggu! Nyimi dimi tau tàka dàngu tau pàlaku-kai yia la pinu tana. Jia ba tuna ku-kamahi pambana-nggai ka àmbi tundu bianya na pa-itiru tolu da ma-pabera mànu dànja da hamangu.

¹²Dira hàmu-maya bàdi na hurimi la padua tau manda tandaya i Miri, jàka era pulu-danggai ba hama tau akatu-kai, lupa da-pajia-maya na pawunda-mi na mahàmu hi dawotu-nya na tamuna i Ala la lodu maina.

¹³La tamuna i Miri, màtawa kai karadaku-nja nimbihu-da da ma-kawaha la tau: ka la Hanganji Bokulu ba hupu mangia ditaya,

¹⁴ka nggumbunuru-yakai pa-panduma-na na Hanganji Bokulu la pahuku-nya na tau ma-akatu dàngu patembi-ya na mawunda mahàmu.

¹⁵Nadu na pambuha-na i Ala duna kai pakandii wànya na tau na ma-kareuku nduba bai tuya na mahàmu.

¹⁶Màtawa kai paluri tau marandekangu, tàka àmbi pandàda wànya marandeka-mi na ma-akatu, na nyuna luriwa ba atana i Alakai.

¹⁷Itembi ndàbaya na tau, imbuhanja da angu dedi da angumi patau Karitu. Imangàdatu-nya i Ala, dàngu itembiya na Hanganji Bokulu.

¹⁸Oi angu dedi ma-lumungu angumi, itangara-wa la mangia ditanggai bai karadaku langatàka-nja; nda mbulungu bia la mahàmu dàngu la ma-mandangu hurina, tàka la mambana eti-mbuna.

¹⁹I Ala na-pakanyuru-manggai napa, jàkai pa-torungu la mayila manda ningu kiringu rukuna na lumu-minya i Ala.

²⁰Nadu nggàra-yaka narihi-na jàkai torungu pa-mayila ba hukunggai ruku njalami? Tàka jàka torungu-minya ba pa-mayila-kai ba dàngu tuminya na mahàmu, ka pa-kanyuru-nanggaika napa paraïna i Ala.

²¹Ba lumuna nunadu hi kiri paau-nanggai paraïna i Ala. Nadu i Karitu wiki ba mbàda duku-naka mayila lumumi nyimi, dàngu wànya nuna hi na-bànjalu-nggai ngerangu ka peku liti-minya na rukuna.

²²Nyuna duna nda ana tumana manjala dàngu nda ana haàtu-mbu tau marongu-ya ba na-kambàliku.

²³Ba tolanya nda nahema wà-anya tolangu. Ba pa-mayila-ya, nda na-pangàdungu-a; na wotu-maaya na palakara-na lai Ala, i Ma-patandangu na matànji.

²⁴Nyuna wiki i Karitu naduku-ha da njalanda la wikina la ai harikangu, ka peku pahàlangu-nda welingu la lima njala, hi taluri la pambuha-na i Ala. Da manua-na i Karitu jiaha da ma-pamàlaru-kai.

²⁵Àmangu hama mbimbi njàrangu-kai, tàka nàhu pa-karia belingu-kaika la patundu-nya na Mapawa-nja dàngu Matanara-ha da hamangu-mi.