Read Kambera 1 PETURU 4 Bible Online

1 PETURU 4 - Kambera bible

1 PETURU 4

¹Ba mbàda pàdangu-dunaka mayila i Karitu la tolu, lupangu-ka bàdi ka jiaya na pa-ngàdangu tungu nu na pa-kapingatu wàmi wikimi. Nadu na tau na ma-pàdangu mayila la tolu, ba nda nahili tuapa manjala.

²Jia ba tuna nu, màtawa kai nunjuya na pambuha-na i Ala ba talànga luri-mipa la pinu tana dàngu ba nda jia-aya na pambuha tolu na panunju-mi.

³La lodu na ma-làpahu, toma-mana-nyaka mandaina bai wundaya jàka nggàraya na pakàli wundana na tau manda tandaya i Miri. Bai luri la manda jiaya. Bai nunjuya na pa-itiru tolu, nu na maüku, na borakungu, na ngunu pa-mbabungu dàngu na huri lumungu marapu na-pamayitangu.

⁴Nàhu da tau manda tandaya i Miri, da-hangàtaru ba ndai pa-namatungu la paluri hama tuna nyuda, la panda kambotahu pambuha-nya na njala. Tuna nuduka hi da-pakalana-kai.

⁵Tàka jiangu-maka duda napa ba dahema ngerada lai Ala, na ma-payemangu la pa-patanda-nya wai ngerana na maluri dàngu na mameti.

⁶Tuna nuduka hi bobaru-mbuyaka na Lii Mànangu la tau meti. Na pawuku-na ka pekuda nyuda da pambàda pa-tandangu wai ngera la tolu — hama tuda da tau mbutada da pa-patandangu wai ngera ngeru — ka daluri la ngahu nunjuya na pambuha-na i Ala.

⁷Na hupu njàpuna mbuu ndàbana mareni-amanaka, jia ba tuna nu màtawa kai roputu wikimi dàngu kai rimangu, ka peku hamayangu-mi.

⁸Na marihi welingu la mbuu ndàbana, màtawa kai pa-mbuhangu langatàka-ma dàngga angumi, nadu na maràngga pa-mbuhangu-mi na-palaku kariangu-mbu na maràngga pandàdangu-mi njala.

⁹Màtawa kai maràngga panggepi ariyaangu la umami haàtu - haàtu, dàngu nda kambunguku-mi.

¹⁰Nimbihu-mi nyimi mbàda ngala-minjaka da pawua-nanggai i Ala tuda ndumami haàtu - haàtu. Jia ba tuna ba ma-tanara mahàmu-kai, la pa-tanara-ha da pawua-na i Ala màtawa wànya na àtalu-mi nuna kai kambuhi-nya na-pahàmu wàmi ba jia ndàbakai.

¹¹Na tau na ma-patàkangu pulungu, màtawa ka na-patàkangu pulungu welingu lai Ala; na tau na ma-lumungu anguna, màtawa ka na-lumungu wàngu àtalu welingu lai Ala, ka peku pa-bunjuku-ya i Ala la ngga - nggàra bia rukuna i Yehu Karitu. Nyunaya duna na ma-kuaha dàngu na ma-ràkangu ka pa-bunjuku-ya lundu nu - nu. Amingu.

¹²Oi angu dedi pa-mbuhangu! Lalu mayila-kai nàhu ba kamanggai. Tàka àmbi maratangu-du, ba hama jiangui nggàna-nanggai manda ràkangu.

¹³Màla, màtawa kai hawola, ba mayila karia-minya i Karitu. Ka peku hanggela hawola-mi taï la rapa wuwana na bunjuku-na i Karitu.

¹⁴Utu-mami-nyaka jàka pa-paakangu-kai rukuna bai tundunya i Karitu. Nu na Ngahu bunjuku, na Ngahuna i Ala ba nidunya lai nyimi.

¹⁵Àmbu ningudu haàtu lai nyimi ma-pàdangu mayila ba ma-pameti tauya, jàka ndia ba ma-manganga-ya, jàka ndia ba ma-akatu-ya, jàka ndiai ba ma-patama korungu la ngera tau hawiangu-ya.

¹⁶Tàka jàkai pàdangu mayila ba tau Karitu-kai, àmbi makia wàdunya. Màtawa kai pamalangu-nya i Ala, ba laku ngàndi-minya na tamuna i Karitu.

¹⁷Rehi-manaka nàhu ba na-patanda-nya wai ngera na pinu tana i Ala. Dàngu banjaru wikina i Alama pa-patanda mangilungu wai ngera. Màla, jàka na-pakiri-nya lai nyuta i Ala, ka nggiki-ama-naka ngeru la hupu njàpuna na tau na manda tundunya na Lii Mànangu-na i Ala?

¹⁸Daa la Huratu Matua tuna yia na pa-tulihu, “Jàka datika panda mara-kadu da tau tànji, ka hili nggàra-yaipa duna na manjadi la tau njala manda tandaya i Miri!” ba wàna.

¹⁹Jia ba tuna nu, jàka ningu tau ma-pàdangu mayila nunjuya na pambuha-na i Ala, màtawa ka daluri tànji dàngu ka da-pakatangu wikida la Ma-padika-nja. Napa Nyuna na-patutu padeni mànu-manya na panjanji-na.