Read Kambera 2 PETURU 1 Bible Online

2 PETURU 1 - Kambera bible

2 PETURU 1

¹Oi angu dedi mapawai langatàka hamama nyuma! I Yehu Karitu, nu na Ala dàngu na Hanganji Ma-pamàna-nda, rukuna Nyuna-maka nu i Yehu Karitu hi kiri pawainda lai Nyuna, maa ba nawunda-duya na ma-deningu. Na huratu yiana welina lai Himungu Peturu, na haàtu ata dàngu pa-pahurungu-na i Yehu Karitu.

²Màtawa i Ala ka nawua-nggai kanyuru dàngu mapeku mahàmu mabundu làndangu, maa bai tanda-duya i Ala dàngu i Yehu, na Mirinda.

³I Ala mbàda paki-nanyaka na mbiha Alana la pawua-ndanja da maningu lingungu la paluri lumunya i Ala. Nyuna natuya yiana tundunya na papinda rukuna i Yehu Karitu, na mambàda paaunda papàda-nya[1] na bunjuku-na dàngu na hàmuna.

⁴Ba wàngu patuna-duka ba nawua-ndaha da kanyuru da manda ningu hamangu i Ala dàngu da ma-pawilingu pambàda njanji-nanda. Rukuda nuda hi peku tambutuhu-mi welingu la pa-itirungu ma-akatu na ma-paruha-ya yia la pinu tana, dàngu hi minggepi-ya na huri Ala.

⁵Jia ba tuna nu, màtawa kai pamukarungu langatàka ka peku daingumi la papawai lai Karitu, tàka nuna na pawaimi ka najura-ya paraï luri hàmu. La perana na luri hàmumi, lupangu-ma bai njadi tau pingu,

⁶tàka la perana na pingumi lupangu-mbu bai roputu wikimi. Tàka hinggilu-na bai roputu wiki, màtawa kai pa-katombuhu wikimi ka peku torungu-mi la pahangga-nya mbuu ndàbana. La perana bai torungu la pahangga-nya mbuu ndàbana lupangu-mbu bai luri nunjuya na pambuha-na i Ala.

⁷Dàngu na luri nunjuya na pambuha-na i Ala lupangu-mbu bàdi na-panggànapu wànya mbuha-minja da angu dedi da angu pawainda. Na pangalangu-na màtawa na mbuha-minja da angu dedi da angu pawainda kai bonja wànja mbuha-minja da tau mbuu ndàbada.

⁸Nuda mbuu ndàbada jiaha da huri da maningu lingungu lai nyimi. Jàka da bundu làndangu-ka da huri nuda lai nyimi, parukangu-minyaka pa-ringgitu dàngu ninguka wunda njilimi, dàngu rihi tanda hàmu-minyaka i Yehu Karitu, na Mirinda.

⁹Tàka na tau na manda hanggaunja dahuri tungu nu, tau kahukulu kanandingu-ya; nyuna nda naita-aya dàngu nambula-nya ba mbàda pa-payahangu-yaka welingu la nja - njala-naka da ma-làpahu.

¹⁰Jia ba tuna nu, angu dedi, màtawa ka manaü pamukarungu-mi ka peku màndungu-na na ngera paau-nanggai dàngu na pindi-nanggai paraïna i Ala. Jàka timika nu, nda jia kandulingu[2] -amipa.

¹¹Ba timika nu toma hàmu-nanyaka na hàku na pa-wuangu-kai la patama la ngia pahanganji-na na ma-palupangu i Miri dàngu na Hanganji Ma-pamàna-nda i Yehu Karitu.

¹²Jia ba tuna numaka, hi ku-panamu mànunggai rukuna nuna, jiapa-kai ka mbàda piminya dàngu ka mbàda wai langatàka-minya na pa-pekangu-na i Ala na pambàda ngalami.

¹³La ngala luringgu, wai ngaba-manggunya la pa-panamu-nggainja nuda.

¹⁴Nadu ba pi-manggunya ba nda namandai-apa na dunjaku-nggunya yia na pinu tana, ba mbàda panii paloha-mana-nggaka na Mirinda i Yehu Karitu na ngerana yiana.

¹⁵Tàka pamukarungu-manggunya wikinggu ka peku hili namu mànu-minja nuda jàka taliu-ngguka napa.

¹⁶Ba mapeka-nggainya nggi tuna na bunjuku-na na maina na Mirinda i Yehu Karitu, ba nda kikungu-manya pange - ngerangu pawulu wàngu manggàna taua. Nu na bunjuku-na i Karitu pambàda ngita wàma mata-mayaka.

¹⁷Nyuma ninggama lai nu ba natembi-ya dàngu ba na-pabunjuku-ya paraïna i Ala, i Ama. La rehina nu marongu-ya na liina i Mahupu-mangarangu na mapanii-nya, “Yiana-yaka na Ananggu na pambuha-nggu. Nyuna jiaya na maliya na etinggu!” ba wàna.

¹⁸Nyuma wikima marongu-ya yiana na lii welingu la awangu ba talànga ninggama dàngu Nyuna la pinu palindi matua.

¹⁹Tuna nuduka hi na-parukangu pa-màndungu la etima na lii languna i Ala na pa-bobaru-da da wunangu. Nahàmu-pa kai katana-ya na lii langu nuna, nadu na lii langu nuna ba beri hama tuna na palita na ma-handaraku la ma-kapàtangu hi lundu mbàkahu wàna paharii, dàngu hi lundu nahunga na kandunu marai romu daa la etimi.

²⁰Na ma-parihingu-ma màtawa kai namuya yiana: Na lii languna i Ala na pa-patàka-da da wunangu ba nda napeku-a la pa-kaloka wànya pangàdangu eti wiki.

²¹Nadu, na lii languna i Ala ndedima duna pa-bobaru-ya ruku pambuha eti tau-ma-a. Tàka na Ngahuna i Alama duna na majuju-ya na eti tau la papeka-ya na lii languna i Ala wiki.