Read Kambera 1 YUHANI 3 Bible Online

1 YUHANI 3 - Kambera bible

1 YUHANI 3

¹Tàngaru jàka nggiki hama mbuha-nanda nyuta paraïna i Ala, hi lupa na pajia-ta nyuta ba ana-nanda. Dàngu tuba-maduna nyuta ba ana Alata. Jia-duyaka yiana na pinu tana na ma-akatu hi nda natanda-ta, nadu na pinu tana, ba nda natanda-aya i Ala.

²Angu dedi pa-mbuhangu! Nyuta nàhu ana Ala-taka, na nyuna jàka nggikina na hadanda ngeru ndedi na-lohangu-a. Ba tuna tapinya jàka natàka-ka i Karitu, nyuta hama-ma-andaka dàngu Nyuna, nadu napa ba ita-ndanyaka na hadana na ma-langatàka.

³Mbuu ndàbana na tau na ma-monungu tuna nu hanggangu lai Karitu, na-manggangu wikina ka peku matua langata - tàkana ka naili welingu la njala hama tuna i Karitu duna ba na-matua.

⁴Na tau na mawunda manjala, pangga-nanya na Ukuna i Ala; nadu na njala ba wànda, jiaya ba panggaya na Ukuna i Ala.

⁵Nyimi mipi-manya hi kiri maina i Karitu màta ka podahu-ha da njalana na tau[4] wàna, dàngu ba nda ningua duna Nyuna njala wikina.

⁶Mbuu ndàbana na tau na maluri pa-mbulungu dàngu i Karitu, nda nawunda panga - ngalangu-a manjala. Na tau na manjala panga - ngalangu, nda na-handàkangu-a paita-ya i Karitu jàka ndia la patanda-ya.

⁷Dou da ananggu hapaela-mi, àmbi pahiangu-du haàtu jiapa nda nggamuya-kadu la pa-panjàra-nggai. Na tau na mawunda-ya na pambuha-na i Ala nyuna ana Alaya hama tuna i Karitu ba Ana Alaya.

⁸Tàka na tau na ma-panua naingu pawunda manjala nyuna anana i Kambàliku-ya duna, nadu i Kambàliku ba njala weli mulangu-mana duna. Ndumana nuna-duka hi namai na Ana Ala, la pa-palàjaru-ya na paràma-na i Kambàliku.

⁹Na tau na mambàda dedi ana Ala, nda na-panua naingu-a duna pawunda manjala, nadu na huri wikina i Ala ba ninyaka lai nyuna. Tàka ba Ama-nanya i Ala, nda peku-ana duna nyuna pa-panua naingu pawunda manjala.

¹⁰Jiaya yiana-ka na ngia pa-pahilitu-da da ana Ala dàngu da anana i Kambàliku: nggamuya na manda wundaya na pambuha-na i Ala, dàngu na manda mbuhanya na angu dedina, nyuna nda ana Ala-aya.

¹¹Piti weli mulangu mbàda pa-patàkangu-mayaka na lii yiana lai nyimi: Ba lupangu-ma bàdi ta-pambuhangu dua wikinda.

¹²Màta nyuta ka àmbu hama tuna i Kaïngu, na manjadi anana i Kambàliku dàngu na ma-pameti-ya na angu dedi wikina. Nggikina i Kaïngu hi na-pameti-ya na angu dedina? Nadu ba manjala-ha da pa-paloku-na, tàka da pa-paloku-na na angu dedina ma-padeningu-ha duna.

¹³Jia ba tuna, Angu dedi hapaela-mi, àmbi hangàtaru-du nyimi jàka dakaraü-nggai eti da tau pinu tana.

¹⁴Tapi-manya duta ba mbàda luhu-ndaka welingu la meti, dàngu hi ta-haleli la luri. Hi tapinya nuna, nadu nyuta ba tambuha-nja da hama angu dedinda. Na tau na manda ningu mbuhangu-na, kuaha-mana-nyapa paraï meti.

¹⁵Na tau na ma-karaü-nya eti na angu dedina, nyuna ma-pameti tauya, dàngu nyimi mipinya na tau na ma-pameti tau nda namangu-anya na luri na ma-langatàka dàngu na ma-padaingu.

¹⁶Yiana-ya na papi wàndanya na pa-mbuhangu dàngga angu: i Karitu na-pajàma-nyaka na lurina ndumanda nyuta. Jia ba tuna, màtawa nyutambu ka ta-pajàma-nya na lurinda ndumana na angu dedinda!

¹⁷Na tau na ma-jàngapu na lurina jàka naita-ya na angu dedina na maningu ma-njakangu, tàka hi nda nandula-ya nuna na angu dedina, nggiki hama peku-naka na tau nuna papanii ba nambuha-nya i Ala?

¹⁸Dou da ananggu hapaela-mi! Nyuta àmbu ta-mbuhangu la ngarua jàka ndia la kareuku jua bia. Màtawa ka tambuha wàngu mbuhangu ma-langatàka na maningu mbutina la paraï paruku-nda.

¹⁹Tuna nu na pawàngu hi tapinya nyuta ba ninda la kalibaru-da da anana i Ala ma-deningu, dàngu da etinda hi da-mànjaku la hanggana i Ala.

²⁰Tapinya, jàka na-panjala-ta nyuta eti wikinda, na papina i Ala narihi bokulu-pa welingu la papi etinda nyuta, dàngu Nyuna ba napinya mbulu hàlana.

²¹Jia ba tuna, Angu dedi pambuha-nggu hapaela-mi, jàka nda na-panjala-ta nyuta eti wikinda, pekuna nyuta ba tatoru mbeni pa-hurungu la hanggana i Ala.

²²Dàngu jàka nggàraya na pakarai-nda lai Nyuna, tangala-manya, nadu nyuta ba ta-karadaku-nja da pareta-na dàngu ba tawunda-ya jàka nggàraya na pahàmu wàna na etina Nyuna.

²³Na pareta pawua-nanda nyuta, jiaya: Ta pawaima bàdi la Anana, nu i Yehu Karitu, dàngu ba ta-kawàra pambuhangu dua wikinda bàdi, hama tuna na pareta pambàda wuana i Karitu lai nyuta.

²⁴Mbuu ndàbada da tau da ma-karadaku-nja da pareta-na i Ala, daluri pa-mbulungu dàngu i Ala, tàka i Ala hi na-pambulungu dàngu nyuda. Dàngu tapi-manya nyuta ba naluri pambulu dànda nyuta i Ala, nadu ba mbàda wua-nanda-nyaka na Ngahuna lai nyuta.