Read Kambera 1 YUHANI 4 Bible Online

1 YUHANI 4 - Kambera bible

1 YUHANI 4

¹Oi Angu dedi pambuha-nggu hapaela-mi! Àmbi wai hàla-duya na tauka na mapeka ba ninya na Ngahuna i Ala lai nyuna, tàka kama mangilu pàkunja ka pinja na ngahu na maninya lai nyuda tuba ngahu ma-pawelingu lai Alaya napa hi ndia. Nadu ba dadangu da wunangu kabàli da ma-tanyalangu la nggi - nggini.

²Tuna nu na pawàngu kai pinya tuba Ngahuna i Alaya jàka ndia: Na tau na mapeka, i Yehu Karitu ba namai la pinu tana la hada tau, na tau nuna ningu Ngahuna na ma-pawelingu lai Ala.

³Tàka na tau na manda pajiaya nuna na rukuna i Yehu, nda nianya na Ngahuna i Ala lai nyuna. Na tau nuna ningu ngahu welingu la Muhuna i Karitu. Angu dedi mbàda rongu-minyaka ba nàmunya na ngahu nuna, dàngu nàhu mbàda ninyaka la pinu tana yiana.

⁴Na nyuna dou da ananggu hapaela-mi, nyimi dimi manguna i Alakai. Nyimi mbàda talu-minjaka da wunangu kabàli, nadu na Ngahu na maninya lai nyimi ba narihi kuaha-mapa welingu la ngahu na maninya lai nyuda da tau mangu pinu tana yiana.

⁵Nuda da wunangu kabàli, panii-daha da ma-pawelingu la pinu tana, hi na-patingi-nya na paniida paraïna pinu tana, nadu nyuda ba mangu pinu tanaha.

⁶Tàka nyuta duta ana Alata; dàngu na tau matanda-ya i Ala, darongu-ya na paniinda nyuta. Na tau manda-mangu na i Ala, nda narongu-aya na paniinda nyuta. Tuna nu na pawàngu hi tapinya na pa-hilitu-na na Ngahu na ma-wuangu lii pa-ajaru ma-deningu, dàngu na ngahu na ma-panjàrangu.

⁷Angu dedi pa-mbuhangu hapaela-mi! Màlawa ka ta-kawàra pa-mbuhangu dàngga angunda, nadu na mbuhangu ba ma-pawelingu lai Alaya. Na tau na ma-mbuhangu, ana Alaya dàngu nyuna natanda-ya i Ala.

⁸Na tau manda mbuhangu, nda natanda-aya i Ala; nadu i Ala ba mbuhangu-ya.

⁹I Ala na-pawuwa-ya ba nambuha-nda nyuta ba na-palewa-ya na Ana kamehangu-na la pinu tana ka peku ngalangu-nda luri rukuna nuna na Anana.

¹⁰Yiana-ya na mbuhangu: Nda nyuta-a mambàda mbuhanya i Ala, tàka i Ala na mambuha-nda nyuta dàngu hi na-palewa-ya na Anana ka peku ngalangu-nda pa-jàmangu wàngu njalanda rukuna Nyuna.

¹¹Angu dedi pa-mbuhangu hapaela-mi, jàka tu-inaka nu ba nambuha-nda nyuta i Ala, ta pa-mbuhangu-duka bàdi nyuta dàngga angunda.

¹²Nda ana haàtu-a mambàda handàkangu paita-ya i Ala, tàka jàka ta-kawàra pa-mbuhangu, i Ala na-pambulu dànda nyuta dàngu jàngapu-nanyaka na mbuhangu-na daa la wikinda nyuta.

¹³Rukuna ba mbàda wua-nandaka Ngahuna paraïna i Ala, ka pi-dunda-nyaka, ba mbàda luri pa-mbulungu-ndaka nyuta dàngu i Ala, dàngu ba luri pambulu dàna-ndaka nyuta i Ala.

¹⁴Nyuma wiki duma mbàda ita-manyaka na Ana Ala, dàngu hi ma-bobaru-ya, ba papalewa-na i Amaya Nyuna ka Hanganji Pa-mànangu-ya la pinu tana yiana.

¹⁵Nggamu mapeka ba Ana Alaya i Yehu, i Ala naluri pa-mbulungu dàngu nuna na tau, tàka nunambu na tau naluri pa-mbulungu dàngu i Ala.

¹⁶Nyuta wiki tapinya dàngu tawaiya na mbuha-nanda nyuta i Ala. I Ala duna mbuhangu-ya. Na tau na maluri la kuaha-na na mbuhangu, na tau nuna na-pambulungu dàngu i Ala, tàka i Ala na-pambulungu dàngu nyuna.

¹⁷Na mbuhangu na-jàngapu-ka la wikinda nyuta, ka peku ningu toru mbeninda la Lodu Patandangu. Nyuta napa tatoru mbeni, nadu na lurinda nyuta la pinu tana ba hama tu-ma-dunaka na lurina i Karitu.

¹⁸Na tau na mapàda-nya hàmuna na mbuhangu-na i Ala nda napi-anya na mangàdatu; nadu na mbuhangu na ma-jàngapu na pamuna hàlanya na pa-mangàdatu wàngu. Jia ba tuna wuwa-duna-nyaka ba ndedi napàda-nya hàmuna na mbuhangu-na i Ala na ma-jàngapu, jàka na-mangàdatu pa-hurungu na tau la Lodu Patandangu.

¹⁹Nyuta ta-mbuhangu, nadu i Ala ba mbàda mbuha mangilu-nandaka nyuta.

²⁰Jàka ningu haàtu mapanii, “Nyungga kumbuha-nya i Ala,” jàka wàna, tàka hi nda nambuha-nya na angu dedina, na tau nuna kambàliku-nanya. Nadu na tau manda mbuhanya na angu dedina na pangita-na, nda peku-ana ka nambuha-nya i Ala na panda ngitana.

²¹Jia ba tuna, yiana-yaka na pareta na pawua-na i Karitu lai nyuta: Jàka nggamu na mambuha-nya i Ala, nambuha-manyai bàdi na angu dedina.