Read Kambera 1 YUHANI 5 Bible Online

1 YUHANI 5 - Kambera bible

1 YUHANI 5

¹Na tau na mawaiya i Yehu ba Hanganji Pamànangu paràndi-na i Alaya, na tau nuna ana Alaya. Na tau na mambuha-nya na haàtu ama, nambuha-mbunya na anana.

²Yiana-ya na papi wàndanya ba tambuha-nja da anana i Ala: Jàka tambuha-nya i Ala dàngu jàka ta-karadaku-nja da pareta-na Nyuna.

³Nadu, na mbuhanya i Ala, jia-duyaka ba karadaku-nja da pareta-na. Dàngu da pareta-na nda dambotu-a lai nyuta,

⁴nadu nimbihu-na na ana Ala, namàka-ma duna patalu-ya na pinu tana akatu yiana. Dàngu hi tatalu-ya na pinu tana jiaya ba tawànya na pawainda.

⁵Nggamu na matalu pinu tana? Mbulungu na tau na mawaiya ba Ana Alaya i Yehu.

⁶I Yehu Karitu-maka na mamai la pinu tana ba nawàngu wai parunungu-na dàngu wai ria metina. Ba namai Nyuna nda mbulungu wàngu wai bia, tàka nawàngu wai dàngu ria. Dàngu na Ngahuna i Ala wikima na ma-hakahii-nya ba ma-dedingu-ya nuna, nadu i Ngahu ba nda na-handàkangu-a pa-kambàliku.

⁷Tailuda da ma-hakahii:[5]

⁸Na Ngahuna i Ala, na wai, dàngu na wai ria — nu pa-katailu-da hama-mana na pa-hakahii-da.

⁹Nyuta tawaiya na pa-hakahii tau, tàka na pa-hakahii-na i Ala na-kapànduku-pa duna. Dàngu nuna-duyaka na hakahii na pambàda wuana i Ala rukuna na Anana.

¹⁰Jia ba tuna, na tau na mawaiya na Anana i Ala, mbàda kataku-nanyaka nuna na pa-hakahii daa la etina; tàka na tau na manda waiya i Ala mbàda reki-nanyaka ba kambàliku-nanya i Ala, nadu ba nda nawaiya jàka nggàraya na papanii-na i Ala rukuna na Anana.

¹¹Yiana-ya na pa-hakahii: I Ala mbàda wua-nandaka luri ma-palangatàkangu dàngu ma-palupangu, dàngu na Anana jia-yaka na mata wai lurinda.

¹²Na tau na mamangu-nya na Ana Ala, jia hi mangu-nanya na luri; tàka na manda mangunya Nyuna, nda mangu-ananya na luri.

¹³Ku-tulihu-nggai huratu nyimi mawaiya na Ana Ala, ka peku piminya nyimi, ba mbàda mangu-minyaka na luri na ma-langatàka dàngu na ma-palupangu.

¹⁴Dàngu ba tatoru mbeni pa-hurungu lai Ala, nadu ba na-màndungu la etinda ba nahema-ya Nyuna na hamayangu-nda, jàka takarai-ya nggàra bia na ma-patangangu la pawuku-na.

¹⁵Nadu ba tapinya ba na-patingi-nda jàka takarai lai Nyuna, dàngu tapi-mbunya ba nawua-ndanya jàka nggàraya na pakarai-nda lai Nyuna.

¹⁶Jàkai itaya na haàtu na angunda patau Karitu na mawunda manjala, ka njala manda pawiti-nya na pa-yàmihu wànanya na luri ma-palangatàkangu dàngu na ma-palupangu, màta nyimi kai hamayangu lai Ala; napa i Ala ka nawua-nya nuna na luri. Yiana landanja nyuda, da manjala wànya na njala panda meti wangu. Tàka ninja da njala na kiri pawàru wànanya nuna na luri. Na ngerana nuna màta kai hamayangu-ma bàdi lai Ala nda wànggua.

¹⁷Mbuu ndàbada da pawunda da ma-hanjàliru manjala-maha, tàka ninja da njala da manda pawiti-nya na pawàru wànanya na luri pa-langatàkangu dàngu pa-lupangu.

¹⁸Tapinya mbuu ndàbana na mambàda ana Alaha, nda jia panua naingu-ada pawunda manjala, nadu na Ana Ala ba mangga-nanja nyuda, dàngu i Ma-akatu nda nggikina wàna-apa hanggangu lai nyuda.

¹⁹Tapi-manya nyuta ba manguna i Alata, jiapa-kai na pinu tana yiana nggubulu-na ba la kuaha-na i Ma-akatu-ya.

²⁰Tapi-manya na Ana Ala ba mbàda mai-naka dàngu ba mbàda wua-nandaka kanandingu ma-jàngapu, ka peku tanda-ndanya i Ala na ma-deningu. Nyuta taluri pa-mbulungu dàngu i Ala na ma-deningu dàngu taluri pa-mbulungu dàngu na Anana i Yehu Karitu. Yiana-yaka i Ala na ma-deningu dàngu yiana-yaka na luri na ma-palangatàkangu dàngu na ma-palupangu.

²¹Dou da ananggu hapaela-mi, pa-maraungu wikimi welingu la marapu - marapu!