Read Kambera DA HAKIMU 1 Bible Online

DA HAKIMU 1 - Kambera bible

DA HAKIMU 1

¹Ba nahàla-ka pameti i Yuhua, na banjaru Ihirailu na-paàrangu lai MIRI, “MIRI, ngga kabihu-yaka bàdi welingu lai nyuma na ma-kawunga hadangu pabera-ya na tau Kanaàngu?” wàdanya.

²Nahema i MIRI, “Na kabihu Yahunda. Nyuda mbàda wuanggu-njaka kuaha la patalu-ya nuna na tana,” wàna.

³Hàlaka, na kabihu Yahunda hi napanii-nja da kabihu Hamiungu, “Màla mai kai karaha-kama la pabera-ya na tau Kanaàngu, ka tawàhi-ya na tana ngaba na pa-patungguna-nggama i MIRI nyuma. Napa nyumai duma ka ma-karaha-kai la pawàhi-ya na tana ngaba na pa-patungguna-nggami i MIRI nyimi,” wàdanja. Tàka na kabihu Hamiungu

⁴dàngu na kabihu Yahunda da-pambapangu palaku pa-pabera. Tàka i MIRI nawua-manjaka patalu wàngu la tau Kanaàngu dàngu tau Perihu. Tau 10.000-ya na muhuda na mameti la Mbehiku.

⁵Da jàngapu-ya i Andoni-Mbehiku, na hanganji la tana nuna, hi da-nàhaku-ya.

⁶Napalai, hi dayaulu-ya, dayàpa-ya, hàla hi da-katiri-ha da wua lima baina dàngu da wua wihi baina.

⁷Napanii i Andoni-Mbehiku, “Àmangu nyungga tau pihu kambulu-ha da hanganji da pa-katiri-nggu wua lima bai dàngu wua wihi baida, hàla hi kupuli-nja panganja da kamumu-nggu da ma-kanabu welingu la menjanggu. Nàhu i Ala tunangga numaka hama tuna ba tunggunja nu nyuda,” wàna. Yiana i Andoni-Mbehiku la malamiri ngàndi-danyaka la Yeruhali, lai nuka nameti ningu.

⁸Da tau Yahunda da-hadangu pabera-ya la Yeruhali, hàla dawàhi-ya hi datunu-ya nuna na paraingu dàngu hi da-pameti-ya na tau mangia-nya.

⁹Hàlaka nu hili laku-danyaka pabera-ya na tau Kanaàngu na ma-ngiangu la ngaba ma-palindingu, dàngu la karaha - karaha palindi; dàngumbu na ma-ngiangu la tana màdu la mbara luru,

¹⁰dàngu la paraingu Hemburungu, na paraingu la Kiriyàtu-Àramba ba wàdanya àmangu. Lai nu da tau Yahunda datalu-ha da kabihu Hehai, Ahimàngu dàngu Tàlumai.

¹¹Welingu la Hemburungu, da tau Yahunda hi dalaku pa-kangaburu-ya na paraingu Ndembiru, la rehi nu la Kiriyàtu-Hepiru wàdanya.

¹²Ninya na haàtu na mini Yahunda, Kalipu-ya na tamuna napanii, “Nggamu na mawàhi-ya la Kiriyàtu-Hepiru, nyuna na-kanoma biaya na ananggu kawini i Àkaha,” wàna.

¹³I Otunialu, anana i Kenàhu erina i Kalipu, nyunaka na mawàhi-ya nuna na paraingu. Jia-duyaka i Kalipu hi nawua-nya i Àkaha hi napaha-ya paraïna i Otunialu.

¹⁴La lodu nikada, i Otunialu na-dàhiku-ya i Àkaha[1] la pakarai hau tana woka la amana. Ka puru-nanyaka i Àkaha welingu la kalandai-na, hi na-paàra-nya paraïna i Kalipu jàka nggàra pa-karuhi-na.

¹⁵Nahema i Àkaha, “Ka ku-ngalangu tana maningu pi - pira mata-waingu wànggu, nadu na tana pawua-mungga ba la tana manda ningu waingu-ya,” wàna. Tuna nuduka i Kalipu hi nawua-nya tana ma-pamata waingu la diana la luruna.

¹⁶Da wàla wuana na ama yerana i Muha, nu da tau Keni, datundu-nja da tau Yahunda paluhu welingu la Yeriku, na paraingu kòruma, dàngu hi dalaku la ngaba tana màdu la mbara luruna na Aràtu la tana Yahunda. Lai nu nyuda da pa-engangu la honga banjaru Amaliku.[2]

¹⁷Tunaka nu pa-kariangu-danyaka dàngu kabihu Hamiungu na kabihu Yahunda la palua pabera-ya dàngu hi datalu-ya na tau Kanaàngu da ma-ngiangu la paraingu Hepàtu. Daràtu-nya na paraingu nuna, hàla hi da-pamolu-nya, dàngu da-pahilu-nya na tamuna Hòruma,[3] wàdanya.

¹⁸I MIRI na-ndulaha da tau Yahunda, hi lupa damàka pawàhi-ya la ngaba tana ma-palindingu. Na nyuna nda damàka pawàhi-ya[4] la Nggaha, Àhakelungu dàngumbu la Ekurungu hamanai na ngaba - ngaba maweli winggiru-nya, nadu da ba - banjaru da maninja la hingi tehiku ningu kareta bàhida; jia-duyaka ba tuna nu hi nda damàka da tau Yahunda pawàngga-ha.

²⁰Hama tuna na pareta pambàda wuana i Muha, na Hemburungu pa-wuangu-ya i Kalipu, nadu àmangu ba nyunadu i Kalipu na mawàngga-ha ba tailu kaloka-ha da wàlana i Enàku welingu la paraingu nuna.

²¹Da kabihu Mbanyamingu nda damàka pawàngga-ha paluhu da tau Yembuhu welingu la paraingu Yeruhali. Jia-duyaka da tau Yembuhu hi jiapa biaha-pa lai nu ba dangia duangu dàngu da tau Mbanyamingu.

²²Da kabihu Epuraïmu dàngu Manahi, da wàlana i Yuhupu, dalua pabera-ya na paraingu Mbetilu, la rehi nuna Luhu wàdanya. Tàka i MIRI nandula-maha nyuda. Nu ba talànga nàhunja da tau da ma-butingu da pa-paràha-da, palua la paraingu nuna,

²⁴da-hàmburu-ya na haàtu na tau mini na ma-talànga luhuna welingu la paraingu. Hi dapanii dànya, “Jàka mu-paita-nggama nggikina wàma hi peku tamama la paraingu yiana, màhamu-maya napa na pawunda-manggau,” wàdanya.

²⁵Ka paita-nanjaka na ànda tama la paraingu. Ka tama-danyaka da tau Epuraïmu dàngu Manahi daa la paraingu, hi da-pameti mbutaha nggubulu-da da tau mangia-nya nuna paraingu, hinggilu-na na tau na ma-paita-nja ànda dàngu kuru umana.

²⁶La malamiri na tau nuna na-lelingu la parai tau Heti, hi na pa-hadangu hau paraingu, Luhu wànanya na tamuna. Na paraingu nuna jiapa-mayapa ba tuna nu na tamuna.

²⁷Na kabihu Manahi nda nawàngga-ya na tau na mangia-nya la paraingu Mbetu-Hiangu, Taanàku, Ndòru, Yimbiliamu dàngu Manggindu lupa da kota - kotaku la lihida. Jia-duyaka da tau Kanaàngu hi hanii bia-dapa lai nu.

²⁸Jia-mayai nyuna ba da-parukangu-ka pa-kapingatu da tau Ihirailu, dahàni-ha da tau Kanaàngu ka daràma lai nyuda, tàka jia-mayai ba nda dawàngga ailulu-ha nuda da tau Kanaàngu welingu lai nu.

²⁹La paraingu Nggehiru, na kabihu Epuraïmu nda dawàngga-aha paluhu da tau Kanaàngu da mangia-nya nuna na paraingu. Jia-duyaka da tau Kanaàngu hi enga hani biada lai nu anguda nyuda.

³⁰Da tau da mangia-nya la paraingu Kiturongu dàngu Nahalulu, nda dawàngga-mbuhai paluhu paraï kabihu Hembulungu. Jia-duya da tau Kanaàngu hi ni bia-njapa ba da-engangu lai nu, ba daangu dàngu nyuda; na nyuna ba tuna da tau Kanaàngu dahàni-ha paràma lai nyuda.

³¹Da tau da mangia-nya la paraingu Aku, Hindungu, Àhalàpu, Àkahipu, Helimba, Apiku dàngu Rehupu, nda dawàngga-mbuha paluhu paraï kabihu Ahiaru.

³²Jia-duyaka ba tuna nu da tau Kanaàngu da mangia memanya na tana nuna pa-daingu engangu bia-dapa lai nu dàngu nyuda da tau Ahiaru.

³³Da tau da ma-ngiangu la paraingu Mbetu-Hemihu, dàngu Mbetu-Anàtu-mbu nda dawàngga-aha paluhu paraï kabihu Nàputali. Da tau Kanaàngu da mangia memanya na tana nuna pa-daingu engangu bia-dapa lai nu dàngu nyuda da tau Nàputali, na nyuna dahàni-ha paràma la tau Nàputali.

³⁴Da banjaru Amori ni bia-njapa la Ayalungu, la Hàlambimu dàngu la Palindi Herihu, nadu da kabihu Ndàngu ba da-dàhiku duhaka paraïda nyuda hu dita la ma-palindingu, nda da-pahia-nja papuru la maràda linjaku. Na nyuna nyuda da banjaru Amori da-panyàku-ha paraï kabihu Epuraïmu dàngu Manahi, hi dahàni-ha paràma ndumada nyuda nuda da tau dàmbu kabihu.

³⁶La mbara diana la Hela, na padira tana tau Amori na-làpahu-nyapa na Pa-kandekalu la Àkurambimu.