Read Kambera DA HAKIMU 10 Bible Online

DA HAKIMU 10 - Kambera bible

DA HAKIMU 10

¹Ba nameti-ka i Ambimeliku, nyunaka i Tola anana i Pua, maliku uru la pa-pahàla-ya na tau Ihirailu. Nyuna umbuku-na i Ndondu-ya welingu la kabihu Ihakàru. Na ngia pa-ngiangu-na la Hamiru-ya la ngaba ma-palindingu Epuraïmu.

²Dua kambulu tailu mbua ndauna ba na-kapipi-ya na banjaru Ihirailu, tunaka nu meti-nanyaka hi taninya la Hamiru.

³La hambeli-na i Tola, na Ihirailu na-kapipi-ya paraïna i Yairu, dua kambulu dàmbu ndaungu. I Yairu paweli-na la Nggiliatu.

⁴Da anana mini tau tailu kambulu-ha. Nyuda ningu manguda tailu kambulu kalandai kaliti-da dàngu tailu kambulu ndeha la ngabana la Nggiliatu. Da ndeha nuda ndeha i Yairu wàda-manjapa.

⁵I Yairu-mbu meti-nanyaka, hi taninya la Kamungu.

⁶Na banjaru Ihirailu hili njala-mananyai lai MIRI. Nyuda nda da-wàrihu-ayapa i MIRI dàngu pànjangu-ma-ada-nyaka palumu-nya. Nyuda lumu-danjaka da marapu Mbaàlu dàngu Àhitoritu, hamanai da marapu banjaru Hiria, Hindungu, Muapu, Amungu dàngu Pilitingu.

⁷Jia-duyaka i MIRI hi nahàngga-nya na banjaru Ihirailu, hi na-pahia-nya na banjaru Pilitingu dàngu banjaru Amungu la pa-kuaha-ha nyuda.

⁸Hakambulu walu mbua ndaungu nuda da tau dua banjaru ba da-kapidihu hàlaya na tau Ihirailu, na maninya la Nggiliatu, nu na ngaba tau Amori la pahunga lodu Luku Yorundangu. Mbàringu nda ukuha nyuda hanggangu la tau Ihirailu.

⁹Da tau Amungu dapala-ma-aya na Luku Yorundangu ba dalua pabera-ya na kabihu Yahunda, Mbanyamingu dàngu Epuraïmu hi kanjupu mayila-ya na banjaru Ihirailu.

¹⁰Hàlaka ka wara-duna-nyaka na banjaru Ihirailu lai MIRI, “MIRI, njala-mama-nyaka lai Nyumu, nadu ba nda ma-wàrihu-kau Nyumu, ou Alama, tàka ba laku-manyai palumu-nja da marapu Mbaàlu,” wàda.

¹¹Nahema i MIRI, “Àmangu nyimi na-panyàku-kai banjaru Mehiru, Amori, Amungu, Pilitingu, Hindungu, Amaliku dàngu Maüngu. La rehi nuna mi-warangu bai karai pa-ndulangu lai Nyungga, ma ndia? Na, màla nda ku-pamara-akai welingu la kuaha-da nyuda?

¹³Jiapa ka tuna nu, jia-mayaipa bai taluru-ngga, hàla hi milaku palumu-nja da marapu. Nàhu nda kubihu-apa duku pa-pahàla-kai.

¹⁴Laku bia la marapu - marapu da papindi-mi. Wara bianja nyuda! Màta ka nyuda da mandula-kai ba talànga ninggai la handuka,” wànanja.

¹⁵Tàka napaha da banjaru Ihirailu lai MIRI, “Njala-mama-nyaka MIRI, wàngu bia papimu MIRI, mili àru kau ndula-kama la lodu nàhu,” wàda.

¹⁶Tunaka nu wàru hàla-danjaka da kahala hada marapu-da, hàla hi da-maraku-nya i Ala. Ka mila eti-nanyaka i Ala ba na-itaha nyuda la dalu handuka-da.

¹⁷La rehi nuna da tanatara Amungu talànga hawanjiru pàkuda la pa-pabera. Nyuda pamaü terangu-danya la Nggiliatu. Da banjaru Ihirailu mbàda pauhi-daka dàngu pamaü terangu-danyaka la Nggiliatu.

¹⁸Lai nu na rayatu dàngu da ma-kapipi kabihu Ihirailu maràngga paàrangu-danyaka la dàngga anguda jàka ningu la hongada nyuda matoru mbeni pa-kawanangu madaka-na palawa-nya na banjaru Amungu, napa nyunaka na patuu liku uru la nggubulu ihina la Nggiliatu, wàda.