Read Kambera DA HAKIMU 11 Bible Online

DA HAKIMU 11 - Kambera bible

DA HAKIMU 11

¹I Yeputa haàtu panjuri ma-papingi ma-kaborangu-ya, na ma-ngiangu la Nggiliatu. Na amana Nggiliatu-ya na tamuna tàka na inana haàtu kawini pahunda-ya.

²Nu na amana ningumbu anana mini welingu la papaha langatàka-na. Ba da-matua-ka nuda da anakeda, wàngga-danyaka i Yeputa welingu la uma. Dapanii-nya, “Nyumu ndau ngalangu-a kangeha ngga - nggàra welingu la amama, nadu nyumu ba ana kawini haàtu-kau,” wàdanya.

³Jia-duyaka i Yeputa hi napalai welingu la anguna paluhu, hàla hi nalaku pa-ndàdiku la Tòpu. Lai nu ba hau kapuli-da da tau akatu da-paori dànya nyuna, hàla laku-danyaka pa-rambangu.

⁴Mandai - ndaika la rehi malamiri na tau Ihirailu ràkapu-nanyaka paraï tau Amungu.

⁵Ba rapa tunaka nu na matumbu, da ma-pangora la Ihirailu da maninja la Nggiliatu, lua-danyaka pa-pamanda-nya i Yeputa la pa-dunjaku-nya la Tòpu.

⁶Dapanii-nya, “Maiwa kau iru ngàndi-kama la palawa-nya na tau Amungu,” wàdanya.

⁷Tàka nahema i Yeputa, “Ka ni hi karaü mbana eti-ma-dimingga? Mbàda wàngga-minggaka welingu la uma amanggu. Nggiki-naika nàhu ba talànga hunggu-mika handuka hili maiminyai lai nyungga?” wàna.

⁸Dahema nyuda, “Hi mamai nadu ba mbuhangu-manya kau lua karia-nggama nàhu la pabera-ya na banjaru Amungu, dàngu ka nyumu maliku-urunya mbuu ndàbana na ihina la Nggiliatu,” wàdanya.

⁹Nahema i Yeputa, “Jàka wànda-mingga nyungga pabeli la Nggiliatu la pabera-ya na banjaru Amungu, dàngu ka nawua-nda patalu wàngu i MIRI, napa nyungga-duka ma-kuaha-kai,” wàna.

¹⁰Dahema nyuda, “Ma-patunju-ya! I MIRI na-hakahii,” wàda.

¹¹Ka hadangu-nanyaka i Yeputa hi da-kariangu hàla da ma-pangora la Nggiliatu. Tunaka nu na ihina la Nggiliatu dawotu-ya i Yeputa la pa-kuaha dàngu la paliku uru. Dàngu la hanggana i MIRI la Mihipa napanii-ha da pa-karuhi-na i Yeputa la tau ma-ngiangu la Nggiliatu.

¹²Tunaka nu i Yeputa na-palewa-nya tau na hanganji Amungu papanii-nya, “Nggàraya na panjala-ma tàka hi mimai pa-kangaburu-ya na tanama?” wànanya.

¹³Nahema na maràmba Amungu la tau papalewa, “Ba jiaya na pa-maingu-na na banjaru Ihirailu welingu la Mehiru, dawàhi-ya nyuda na tanama, piti welingu la Luku Àrunongu lupa toma la Luku Yambuku dàngu Luku Yorundangu. Nàhu màtawa kai pabeli dàngu hàmunya,” wàda.

¹⁴Hàla i Yeputa nahili palewa-nya tau na hanganji Amungu,

¹⁵la pa-patàka-nya na hemana, “Na banjaru Ihirailu nda nawàhi-aya na tana tau Muapu dàngu na tana tau Amungu.

¹⁶Ba jiaya na dunjaku-nanya na tana Mehiru na tau Ihirailu, da-hanggangu la Njobu wai Akamba ba daliya na maràda bulu wara, hàla hi datàka la Kandihu.

¹⁷Tunaka nu nyuda da-palewa tau la hanganji Endumu la pakarai paramihi la pali ningu la tanana. Ba tuna nda na-pahia-anja. Tunaka nu hi dakarai ma-hamangu la hanganji Muapu, tàka jia-mayai ba nda na-pahiangu pali ningu la tana ngabana. Jia-duyaka na banjaru Ihirailu hi na-engangu la Kandihu.

¹⁸Tunaka nu pangala-danyaka na lakuda ba dali la maràda bulu wara, tàka nda dali ningua la ngaba Endumu dàngu Muapu, tàka dali ningu la ngarangia pa-winjungu hi lupa datàka la pahunga loduna la Muapu, la hapapa Luku Àrunongu. Lai nu da-pamaü terangu ningu, tàka nda dapala-aya na luku nuna, nadu lai nu ba ngaba Muapu-yapa.

¹⁹Hàlaka nu na banjaru Ihirailu da-palewa tau lai Hihungu, hanganji Amori la Hehimbungu, la pakarai paramihi pali ningu la ngaba tau Amori, nadu nyuda ba laku-danya la tana ngaba-madai duda.

²⁰Tàka i Hihungu nda na-pahia-anja nyuda ba nda na-pajia-aya la eti ba wàngu pali langatàka-ma-adanya. Ba tuna wari hàla-ma-ananya na kanguhuru pabera-na, hàla hi da-pànjangu la Yahàhu, tunaka nu hi da-kangaburu-ya na tau Ihirailu.

²¹Tàka i MIRI, Ala Ihirailu; nawua-nya na banjaru Ihirailu patalu wàngu lai Hihungu dàngu kanguhuru pabera-na. Tuna nuduka na banjaru Ihirailu hi nangala hàlanya na tana tau Amori na ma-ngiangu la tana lai nu.

²²Nuna na ngaba tau Amori da-mandapu-nya piti welingu la Àrunongu la mbara luru, lupa la mbara diana na Luku Yambuku, dàngu piti welingu la maràda bulu wara la pahunga lodu, lupa la Luku Yorundangu la patama lodu.

²³Jiaya i MIRI, na Ala Ihirailu-ma duna na mawàngga-ya paluhu na tau Amori nduma pahàmu wàna na banjaru-na i MIRI.

²⁴Tàka nàhu ka kupiti beliya wàmuka? Na tana pawua-nanggau i Kamuhu, na marapu-mu, pekuna bau màngi pangala-nya. Tàka jàka nggàraya na pawua-nanggama i MIRI, na Alama, jiangu-maka duma ba ma-pamàndu-nya.

²⁵Bau rekiya murihi hàmupa nyumu welingu lai Mbalàku anana i Hipuru, hanganji Muapu? I Mbalàku nda na-handàkangu-a duna papapa-nggama jàka ndia la pabera-kama.

²⁶Tailu ngahu ndaunaka mandaina na Ihirailu ba na-mandapu-nya la Hehimbungu dàngu la Arowiru dàngu da ndeha la winggiru-na dàngu mbuu ndàbada da paraingu la hingi Luku Àrunongu. Ka nggikina duna ba mandai tuna nu hi ndau patikingu la papiti beliya?

²⁷Ndia-a, nyuma nda manjala-a lai nyumu. Nyumuka manjala, nadu bau hadangu pa-kangaburu-kama. I MIRI-ka na hakimu na marata-ya la lodu nàhu na palakara yiana la honga banjaru Ihirailu dàngu banjaru Amungu,” wàna.

²⁸Ba tuna na hanganji Amungu nda na-wàrihu-aya na lii pa-patàka-na i Yeputa.

²⁹Tunaka nu na Ngahuna i MIRI na-tunggulu-ya i Yeputa. Ka lua-nanyaka i Yeputa pa-tadalu-ya la ngaba Nggiliatu dàngu Manahi, hàla hi nabeli la Mihipa la Nggiliatu. Welingu lai nu pangala-nanyaka na lakuna la ngaba banjaru Amungu.

³⁰I Yeputa na-paràkingu lai MIRI, “Jàkau pahia-ngga nyungga la patalu-ya na tau Amungu,

³¹dàngu jàka kubeli dàngu nda nggàra ehinggu, nggamu biaya na ma-kawunga luhu welingu la umanggu pa-hàmburu-ka, napa ku-maraku wànggaunya ka kameti maraku patunu-ya lai Nyumu MIRI,” wàna.

³²Hàla i Yeputa pala-nanyaka na Luku Yorundangu la pabera-ya na tau Amungu, tàka i MIRI nawua-manya patalu wàngu.

³³I Yeputa na-nyairaku panda hàmunya piti welingu la Arowiru lupa la ngaba ma-winggiru-nya la Minitu — nggubulu-da dua kambulu paraingu-ya — dàngu hi lupa natoma la Ambilu Karamimu. Dira danguya na tau Amungu mameti, ka lupa kàku-danyaka la hangga tau Ihirailu.

³⁴Ba nabeli-ka i Yeputa la Mihipa, na ana karia anana, namai pa-hàmburu-ya ba nawàngu renjana dàngu tundungu-na lamba ha-kapapa. Nyuna nu ana kamehangu-ma-ananya.

³⁵Ba naita-kiyaka paraïna i Yeputa, lalu mbana hawina-ya hi naba - bàriku-ya na kalembi-na, hi napanii, “Dou na ananggu! Làjaru-duna-nyaka na etinggu. Nggikina hi nyumu-ma-aika ma-pahawina-ya na etinggu? Mbàda harangu-ngguka nyungga lai MIRI, dàngu nda peku-anapa la payila beliya!” wàna.

³⁶Nahema nuna na ana karia lai Yeputa, “Ba mbàda harangu-muka ama lai MIRI, tàka i MIRI hi na-hamata-madu-kauka la pa-himbalu-ya na akatu-na na tau Amungu, na papamu. Jia ba tuna jàka nggàraya na pambàda njanjimu, pahàra-manyaka bàdi ama,” wàna.

³⁷“Jia-aya,” wàna nuna na ana karia ba na-panua-nya, “hangia-ana duku na pakarai-nggu: Wua àrungga rehi dàmbu wulangu ka ku-wenangu[9] pàku la ma-palindingu ma-kariangu dàngu da angunggu. Lai nu ka ku hii paduduru-pàkunya na paana karia wànggu, nadu nyungga napa kumeti ba dàngu ana karia-ka,” wàna.

³⁸Na amana na-pamàja-nya, hàla hi napuli-nya palaku. Nuna na ana karia dàngu da angu lànggina laku-danyaka la ma-palindingu la pa-hawina ningu lai nu, nadu napa ba meti dàngu ndedi mangoma-na dàngu nda ningu anana.

³⁹Pa-làngangu-ka dàmbu wulangu, beli-nanyaka la amana, hàla na amana hi na-pahàra-nya hama tuna na pambàda njanji-nanya i MIRI. Ka meti-nanyaka na anana ba dàngu ana karia bia-yapa. Nuna-duya na pakiri-na la honga tau Ihirailu hi kiri wànguda

⁴⁰da bidi kawini la nimbihu ndaungu patu mbua lodu mandaina ba dalua pa-hawina la pa-pangàda-nya na anana i Yeputa la Nggiliatu.