Read Kambera DA HAKIMU 12 Bible Online

DA HAKIMU 12 - Kambera bible

DA HAKIMU 12

¹La rehi nuna na kabihu Epuraïmu hawa - wanjiru-nanyaka la pa-pa-kangaburungu, hàla laku-danyaka hi dapala-ya na Luku Yorundangu da-hanggangu la Hapungu. Dapanii-nya i Yeputa, “Nggikina nyumu bau lua pabera-ya na banjaru Amungu hi ndau wànda-kama nyuma? Nàhu tunu-manggauka dàngu ihi umamu!” wàdanya.

²Napaya i Yeputa, “Na tau Amungu dàngu nyuma tau Nggiliatu ningu pa-pahili halawàla-ma. Mbàda paau-manggunggai-ka nyimi la pamai pandula-ka pa-pahàla welingu la tau Amungu, tàka ndai mai-a nyimi.

³Jia-duya, ba kupi hàmu-nyaka na nda maimi nyimi la pandula-ka, ka kita-duna-nyaka na etinggu palua pabera-ya na tau Amungu, ka jiapa kumeti wànya-kadu. Hàla i MIRI nawua-ngga patalu wàngu hangganja nyuda. Ka nu, nggikina hi mimai pa-ràkapu-ka?” wànanja.

⁴Tunaka nu i Yeputa na-pauhi hàlanya na tau la Nggiliatu, hàla hi dabera-ya dàngu hi datalu-ya na tau Epuraïmu. (Da tau Nggiliatu da ma-ngiangu la Epuraïmu dàngu Manahi dapulu-nja paraï tau Epuraïmu, da-kawàri-ka wikida welingu la Epuraïmu na kabihu-da, wàdanja.)

⁵Da tau Nggiliatu da ma-talànga pabera, da-mandapu-nja da papala - papala la Luku Yorundangu, ka peku hànda-danja da tau Epuraïmu da mapalai, wàda. Jàka ningu haàtu tau Epuraïmu, na ma-mbuhangu papalai, jàka na-paramihi la papala, da tau Nggiliatu da paàra-nya, “Nggàra taukau, tau Epuraïmu-kau?” wàdanya. “Ndia-a,” jàka wàna ba nahema

⁶ka paràha-danyaka patiki-ya na panii “Hiambolitu”. Napa nyuna natiki-ya “Himbolitu” nadu nda na-jàngapu-aya la patiki pawingu-nya na panii papeka-danya. Ba tunaka nu ka yàpa-danyaka hi pameti-ya la hau ngia papala lai nu. Tau 42.000-ya na tau Epuraïmu na pa-pameti la rehi nu.

⁷Nomu mbua ndaungu mandaina i Yeputa ba na-kapipi-ya na tau Ihirailu. Tunaka nu meti-nanyaka hàla hi taninya la kotaku wikina[10] nu la paraingu Mihipa la Nggiliatu.

⁸Ba taliu-naka i Yeputa, na banjaru Ihirailu na-kapipi-ya paraïna i Epuhàngu welingu la Mbetulehimu.

⁹Yiana i Epuhàngu ningu tailu kambulu-da da anana mini dàngu tailu kambulu-da da anana kawini. Da anana kawini na-pamangoma-ha la tau hau kabihu, hàla napiti tau tailu kambulu bidi kawini welingu la kabihu hawiangu ndumada da anana mini. Pihu mbua ndaungu i Epuhàngu ba na-kapipi-ya na banjaru Ihirailu,

¹⁰tunaka nu ka meti-nanyaka hi taninya la Mbetulehimu.

¹¹Ba taliu-naka i Epuhàngu, na banjaru Ihirailu na-kapipi-ya paraïna i Elungu welingu la kabihu Hembulungu, hakambulu ndaungu mandaina.

¹²Tunaka nu meti-nanyaka hi taninya la Ayalungu la ngaba Hembulungu.

¹³Ba taliu-naka i Elungu, na banjaru Ihirailu na-kapipi-ya paraïna i Àpundongu anana i Hilàlu welingu la Piratungu.

¹⁴Da anana mini tau patu kambulu-ha, tàka da umbuku-na da mini ningu tau tailu kambulu-ha. Nyuda haàtu-haàtu kawàra ninguma heu kalandai kaliti-da. Walu mbua ndaungu mandaina i Àpundongu ba na-kapipi-ya na banjaru Ihirailu.

¹⁵Tunaka nu meti-nanyaka hi taninya la Piratungu la ngaba Epuraïmu la ngaba ma-palindingu tau Amaliku.