Read Kambera DA HAKIMU 13 Bible Online

DA HAKIMU 13 - Kambera bible

DA HAKIMU 13

¹Na tau Ihirailu hili njala-nanyai lai MIRI; hàla i MIRI hi namàta-nya na tau Pilitingu la pa-kuaha-ha nyuda patu kambulu ndaungu.

²La rehi nu ninya na haàtu na tau mini la paraingu Hora. Na tamuna Manuahu-ya, welingu la kabihu Ndàngu. Na papaha-na nda ningu anana.

³Tàka la hau lodu na papalewa-na i MIRI namai lai nyuna napanii-nya, “Lundu nàhu nda peku ngalangu-amu anamu, na nyuna nda nahili mandai-apa pa-anakedangu-munyaka nyumu. Hàla napa nyumu ungalangu haàtu anakeda mini.

⁴Jia ba tuna, mangga pa-hamungu wikimu. Àmbu unungu-du wai angguru jàka ndia pa-unungu ma-maüku, jàka ndia pangangu manda hida,

⁵nadu piti welingu ba la kambu-yapa pambàda kawuku-mayaka ka tau paràkingu-ya[11] Nyunaka napa na ma-patara la pa-pahàla-ya na banjaru Ihirailu welingu la kuaha tau Pilitingu,” wànanya.

⁶Hàlaka nu na papaha-na i Manuahu, lua-nanyaka la leina hi napanii-nya, “Ha Umbu, ninya kawai na tau pa-paràha-na i Ala na mamai lai nyungga; na hadana hama tuna papalewa-na i Alaya hi lupa ku-mangàdatu. Nda ku-paàra-anya jàka nggi welina, dàngu nyuna nda napanii-mbuya na tamuna lai nyungga.

⁷Tàka na papanii-na lai nyungga, napa nyungga ku-paanakedangu hi ku-ngalangu haàtu anakeda mini. Napanii-mbungga ka àmbu ku-unungu wai angguru jàka ndia pa-unungu ma-maüku, jàka ndia pangangu manda hida, nadu na anakeda nuna màta ka wotuya lai Ala ka tau paràkingu-ya la ngala lurina, wàna-mbungga,” wàna.

⁸Narongu-yaka nu hamayangu-nanyaka i Manuahu lai MIRI, “MIRI, màla àru kau palewa-kiya na taumu lai nyuma màta ka na-palara-kinggama jàka nggikina wàmanya nuna na anakeda jàka nadedi-ka,” wàna.

⁹I Ala na-patingi-manya na pa-kalura-na i Manuahu. Ka hili mai-nanyaka na papalewa-na i MIRI, nu ba talànga mandapu-na la woka. La rehi nu nda nianya na leina lai nu,

¹⁰ba tuna ka palai-nanyaka papanii-nya nyuna na rukuna nuna, “Ha Umbu, tàngaru-ya, na tau na mamai yia nana lai nyungga, hili ninyaka,” wànanya.

¹¹I Manuahu manyamalu kiku-nanyaka na papaha-na. Hi nalua lihinya nuna na tau hi na-paàranya, “Nyumuka miri mangàndi-nya lii na papaha-nggu?” wànanya. “Tuba-duna,” hi wàna ba nahema-ya.

¹²Hàla paàrangu-nanyaka i Manuahu, “Jàka na-padeningu-ka napa na papanii-mu miri nggàra-yaka na paula-na nuna na anakeda? Nggiki-naka napa na lurina?” wàna.

¹³Nahema na papalewa-na i MIRI, “Na papaha-mu àmbu na-unungu angguru jàka ndia pa-unungu ma-maüku, àmbu nangangu-mbu pangangu ma-welingu la pingi angguru, jàka ndia pangangu manda uku. Lupangu-ma nanunju-ha mbuu ndàbada da papanii-nggunya, dàngu namangga-manya ka àmbu ningudu panda nunjuna,” wàna.

¹⁵Hàla i Manuahu hi napanii-nya, “Màla miri kau nedingu hawutu. Ka ma-paloku pàkuya na ana kamàmbi ndumamu,” wànanya.

¹⁶Tàka napaya na papalewa nai MIRI, “Jiapa ka ku-nedingu-kadu lai yiahu, nda jia nga-anggunya napa na pa-paloku-mu. Tàka paloku-maya bàdi jàka wàmu, paloku biaya duna ka kameti maraku patunu-ya dàngu kau maraku wànya lai MIRI,” wànanya. Tàka i Manuahu ndedi-mapa napinya nuna na mapanii dànya ba papalewa-na i MIRI-ya. Jia-duyaka hi napanii, “Jàka tuna nu, màla àru làti miri kau pekaya na tamumu pekuna napa jàka na-patutungu-ka na papanii-mu ka ma-maraku-nggau,” wàna.

¹⁸Na papalewa nai MIRI hi na-paàrangu, “Nggikina hiu mbuhangu papinya na tamunggu? Na tamunggu tamu pa-hangàtarungu-ya,” hi wàna.

¹⁹Ka piti-nanyaka i Manuahu na heu na kamboka kamàmbi dàngu uhu nggàndumu hawutu, hàla hi na-banjalu-ha la pinu watu dàngu hi na-maraku wànya i MIRI, nu i MIRI na ma-patumbu hangia - hangia pa-hangàtarungu.[12]

²⁰Ba talànga roka-naka na epi hu dita welingu la ngia pawotu maraku i Manuahu dàngu papaha-na daita-ya na papalewa-na i MIRI ba nahei hu dita la roka epi hanggangu la awangu. Hina-duka i Manuahu hi napinya ba papalewa-na i MIRI-ya, ka patika marubuku-duda-nyaka i Manuahu dàngu papaha-na. Nda dahili ita ndoku-mayapa nuna na papalewa.

²²Hàla panii-nanyaka i Manuahu la papaha-na, “Meti-dunda-nyaka napa, ba mbàda ita-ndanyaka i Ala,” wàna.

²³Nahema na papaha-na, “Ka ku-pameti-ha jàka wànama duna i MIRI, nda nanggepi-aya na kameti maraku pa-maraku-wàndanya; dàngumbu nda na-paita-andanya mbuu ndàbana yiana lai nyuta jàka ndia nda napeka-andanya na hangia - hangia na pambàda peka-nanda nyuta,” wàna.

²⁴Pi - pirana na wulangu la malamiri na papaha-na i Manuahu habola-nanyaka na haàtu na anakeda mini, hàla hi natunya tamuna, i Himuhungu, wànanya. Na anakeda nuna matua-nanyaka dàngu na-pakanyuru-nya paraïna i MIRI;

²⁵dàngu ba talànga ninya la ngia pa-pamaü terangu kabihu Ndàngu, na maninya la manggawa Hora dàngu Ehitaülu, na Ngahuna i MIRI pa-kiringu-nanyaka pawua-nya àtalu kapàru.