Read Kambera DA HAKIMU 15 Bible Online

DA HAKIMU 15 - Kambera bible

DA HAKIMU 15

¹Pi - pira-naka la rehi malamiri, la rehi muti uhu nggàndumu lua-nanyaka i Himuhungu pa-tadalu-ya na papaha-na, nangàndi heuna na ana kamàmbi ndumana na papaha-na. Ka panii-nanyaka i Himuhungu la ama yerana, “Ka kulua la kurungu-na na papaha-nggu wànggu,” hi wàna. Tàka na ama yerana nda na-pahia-nya.

²Napanii-nya i Himuhungu, “Ba ku-pareki-nya nyumu ndau wàngu pambuha ndoku-nyapa, jia-duyaka hi kuwua-ya la angumu. Tàka pekuna kau pitiya na erina. Narihi manandangu-pa,” wànanya.

³Ka panii-nanyaka i Himuhungu, “La handàka-na nàhu nda kunjala-a nyungga la tau Pilitingu, jàka ku-patàka-nja ngga - nggàra,” wàna.

⁴Ka laku-nanyaka payàpa tailu ngahu ahu rumba. Da kiku dua ngiu - dua ngiu ahu rumba na pandetu-nja. La kawuku pandetungu-da, nahondu-nja hau hulu.

⁵Tunaka nu pakehi-nanjaka da hulu hi na-pahàla-ha da ahu rumba la woka - woka tau Pilitingu. Ka mutungu hàla-danyaka da uhu nggàndumu pambàda muti lai nu. Jiapa da pandedi muti dàngu da woka - woka angguru damutu pa-kariangu-mbu.

⁶Ka lua-danyaka da tau Pilitingu pa-kanuturu-ya jàka nggamu maruku-nya nuna. Hi napanii-nja tau ba i Himuhungu maruku-nya, nadu na ama yerana la Timuna mbàda wua-nanyaka na papaha-na i Himuhungu la haàtu na anguna i Himuhungu. Rukuna nuna duka hi kiri tunu-danya nu na tau kawini dàngu ihi uma amana paraï da tau Pilitingu hi lundu danjàpu.

⁷Ka panii-nanyaka i Himuhungu la tau Pilitingu nuda, “Ai, tuna nuka na pawàmi bai tungu hilu ai? Ku-harangu ba nda jia ndii wànggu-a jàka ndedi ku-palimba-nggainya yiana lai nyimi,” wàna.

⁸Tunaka nu hi na-kaporuku-nja wàngu mbana etina hi dadangu da pa-pameti-na la hongada nyuda. Hàlaka nu laku-nanyaka pa-ngiangu la liangu la hau tandula watu la Etàmu.

⁹Ka mai-danyaka da tau Pilitingu la Yahunda hi da pamaü terangu lai nu, hi damangu pa-ràkapu-ya na paraingu Lehi.

¹⁰Ka paàrangu-danyaka da tau Yahunda, “Ka nggikina nyimi hi ndàharu-nggama la paràkapu-kama?” wàdanja. Dahema nyuda, “Maimanya payàpa-ya i Himuhungu ka ma-palua-nya lima hama tuna ba na-palua-nggama lima nyuma,” hi wàda.

¹¹Ba darongu-yaka nuna lua-danyaka da tau tailu rata tau Yahunda la liangu la palindi watu Etàmu. Lai nu dapanii-nya i Himuhungu, “Ka ndau pi-anya dumu Himuhungu ba tau Pilitingu ma-kuaha-ta nyuta? Nggàra-yaka nàhu na pawunda-mu lai nyuma?” wàdanya. Nahema i Himuhungu, “Nyungga duku palimba-anggunya na pawunda-da lai nyungga,” hi wàna.

¹²Dapanii nyuda, “Nyuma duma maimanya pahondu-kau nyumu ka pakata-nggau la tau Pilitingu,” wàdanya. Napanii i Himuhungu, “Pa-njanjingu pàku bàdi ba nda jia pameti amingga napa,” wànanja.

¹³“Hàmudu,” wàda nyuda, “wàngu pahondu-amanggau duma dàngu ka pakata-nggau la tau Pilitingu. Nda jia pameti amanggau,” wàdanya. Hàla, hi dahondu wànya dua walangu kalorungu mabidi, hi dalaku ngàndiya welingu la liangu nuna.

¹⁴Ba datàka ngàndi-yaka i Himuhungu la Lehi, ka palai toma-danyaka paraï tau Pilitingu hi da-kayaka-nya. Hi jia kapàru biana paraï mbihana i MIRI. Da kalorungu pahondu wànja da limana na-ràmbitu bota-ma-aha hama tuna kalorungu ma-mutungu la epi.

¹⁵Tunaka nu hunggu-nanyaka na hapungu na rii ngingi kalandai nabidi maapa. Napiti-ya nuna, hàla hi napalu wànja da tau harata lundu dameti.

¹⁶Ka ludu-nanyaka i Himuhungu, “Kuwàngu rii ngingi kalandai, ku-nàhaku-ya na tau harata, kuwàngu rii ngingi kalandai, ku-pabundu-nja[13] da metida,” wàna.

¹⁷Tunaka nu, kawuka-nanyaka na rii ngingi. Jia-duyaka na pa-ngiangu lai nu la Ramàtu-Lehi[14] hi kiri wàdanya na tamuna.

¹⁸Tunaka nu, madau nda ukuya i Himuhungu, hi nawara lai MIRI, “Dou MIRI, bidi-ma-ana bau wua-ngganya yiana na talu manda najaru. Nàhu màta biaka ka kumeti la madau, hi lupa napa dayàpa-ka da tau Pilitingu yiada da manda tandakau Nyumu?” wàna.

¹⁹Ka bunggahu-nanyaka i Ala na makubu la palindi watu la lihina nu la Lehi, hàla luhu-nanyaka na wai welingu lai nu. Ka unungu-nanyaka i Himuhungu, tunaka nu pàda-nanyaka na ihina ba na-hayandalu beli. Jia-duyaka na matawai nuna la Matawai Hakuru,[15] hi wàdanya. Na matawai nuna ni bia-nyapa la Lehi.

²⁰Dua kambulu ndauna i Himuhungu ba na-kapipi-ya na banjaru Ihirailu, la rehi kuaha-nanja tau Pilitingu.