Read Kambera DA HAKIMU 16 Bible Online

DA HAKIMU 16 - Kambera bible

DA HAKIMU 16

¹La hau na lodu i Himuhungu nalua la Nggaha. Lai nu hàmburu-nanyaka na haàtu na kawini pahunda, hàla hi nalua pa-katuda angunya nuna na kawini.

²Ka rongu-danyaka da tau mangia-nya la Nggaha ba ninya nyuna i Himuhungu lai nu. Jia-duyaka, hi da-nggupulu-ya na pangia-na hi danapa-ya lundu harii-na la pindu bokulu paraingu. Na nyuna nda nggàra ula-ada nu la rudungu, nadu ba dareki-ya, “Napa duna jàka nahunga-ka na lodu, hina-duka hi ta-pameti-ya,” wàda.

³Tàka i Himuhungu nda na-katuda pangalangu-a lundu mbaru lai nu. La mandalora hadangu-nanyaka hi nalua la pindu bokulu paraingu. Na-butuhu-ya na pindu mbuu ndàbana dàngu da kambaniru-na hamanai da kahorungu-na na-handàka-ma-anja. Tunaka nu na wulaku-ya hi nawotu-ya la kunduna, hi nahei ngàndiya la pinu tandula la papana la Hemburungu.

⁴Hàlaka nu i Himuhungu mbuha-nanyaka na haàtu kawini la Lolangu Horiku. Nuna na kawini Ndelila-ya na tamuna.

⁵Ka maidanyaka da tau malima da ma-kuaha la Pilitingu la kawini nuna hi dapanii-nya, “Pamanda-nya i Himuhungu ka na-pekanggau nyumu jàka nggàra pàkuya na winina hi tu-ina na kapàru-na, dàngu jàka nggikina na hurina ka na-àlingu na pa-kapàru wàna. Ba tunaka nu peku-naka ba mamai la pahondu-ya ka talu wànya. Napa nyuma haàtu - haàtu mawua-nggau nyumu 1.100 àmahu bara,” wàdanya.

⁶Ka panii-nanyaka i Ndelila lai Himuhungu, “Nggikina nyumu hi tu-ina na kapàru-mu Himuhungu? Nggàraka bàdi pahondu wàngukau ka na-àlingu na pa-kapàru wàmu? Kamangu na kau paniiya na winina!” wànanya.

⁷Nahema i Himuhungu, “Nyungga duku jàka hondu wàngga pihu walangu liku pàndi pana da mandedi màdu hàmu, malijangu-nggunyaka hama tu-ma-anaka na tau hawiangu,” wàna.

⁸Hàla da ma-kuaha la Pilitingu wua-danyaka i Ndelila pihu wàlangu liku pàndi pana mabidi da mandedi màdu hàmu. Tunaka nu, ba talànga patiangu-da da tau Pilitingu la kurungu hau, i Ndelila nahondu-ya i Himuhungu ba nawànja nuda da liku hi na-warangu, “Himuhungu! Ninjaka da tau Pilitingu!” wàna. Ka bota-madua-nanjaka i Himuhungu da liku pàndi. Nuda da liku dambota hama tuna lulu kamba panggàna epi. Na wini kapàru-na ndedi-mapa na-habukaru.

¹⁰Hàla i Ndelila hi napanii lai Himuhungu, “Ai ha, tau kambaliku-kau! Nyumu paànga-ma-amungga. Màla na, paniingga jàka nggikina ka peku hondukau,” wànanya.

¹¹Nahema i Himuhungu, “Nyungga duku jàka hondu wàngga kaloru bidi pandedi wàngu, malijangu-ma-anggunya hama tuma-ana na tau hawiangu,” wàna.

¹²Ba talànga patiangu-da la hau kurungu da tau Pilitingu i Ndelila napiti pi - pira walangu kaloru bidi, hi nahondu-ya i Himuhungu. Hàlaka hi na-warangu, “Himuhungu! Da tau Pilitingu ninjaka!” wànanya. Tàka i Himuhungu na-ràmbitu-ma-aha da kalorungu hama tuna na tau na mabota lulu kamba.

¹³Hàlaka hi napanii i Ndelila lai Himuhungu, “Ai ha, nyumu hili julu-ma-amungga. Kambàliku-pàkumu. Màla na paniiki, nggàrama bàdi hi peku hondukau!” wànanya. Nahema i Himuhungu, “Nyungga duku na lungginggu ba pihu kalipa-na jàka jilunya la lulu kamba tinungu, hàla ka pakanya la ai pa-tinungu wàngu, mangonangu-nggunyaka hama tu-ma-anaka na tau hawiangu,” wànanya.

¹⁴Nyuna i Ndelila pa-mahuru-nanyaka i Himuhungu, hàla hi najilu-nja ba pihu kalipa-na na lunggina la lulu kamba tinungu. Hàlaka hi napaka-nya la ai pa-tinungu wàngu, hàla hi nawara-nya, “Himuhungu! Da tau Pilitingu ninjaka!” wànanya. Ka hadangu-nanyaka i Himuhungu hi na-pandàngi-ya na lunggina hi lupa na-pahàlangu welingu la pa-tinungu wàngu.

¹⁵Tunaka nu panii-nanyaka i Ndelila lai nyuna, “Ai ha, kumbuha-nggau wàmu àngangga, tàka na etimu nàhu biaya welingu lai nyungga! Mbàda pandilu wundangu-muka bau panyonga-ka, lundu nàhumbu ndau peka-ngganya jàka nggikina hi tu-ina na kapàru-mu,” wànanya.

¹⁶Hau lodu - hau lodu nua naingu-mana i Ndelila ba na-kareji-nya dàngu ba na-dàhiku-ya, ka lupa mayau-nanyaka i Himuhungu parongu-ya.

¹⁷La njàpuna i Himuhungu peka-duna-nyaka na pa-winingu la etina, “Na lungginggu ndedi na-handàkangu panggàna-ya kahidi kikiru. Nyungga pambàda wotu-kaka lai Ala hi namangu mehangga. Welingu ba hina kudedi-maka duku ba tau Paràkingu-na[16] i Alaka. Jàka kikiru-kaka yilangu-madua-nanyaka na pa-kapàru wànggu, ma-ngonangu-nggunyaka hamama-anaka na tau hawiangu,” wàna.

¹⁸Ba nareki-ya i Ndelila bunggahu-duna-nyaka na wini etina i Himuhungu, wànaka. Ka pangàndi-duna-njaka langu da ma-kuaha la Pilitingu, “Hili maikiwa nu handàkangu. I Himuhungu na-bunggahu hàla-yaka na wini etina lai nyungga,” wànanja. Ka mai-madua-danyaka dàngu dangàndi-manya àmahu ndumana i Ndelila.

¹⁹Hàlaka nu i Ndelila naowa-ya i Himuhungu hi lupa na-mahuru la babana, hàla paaungu-nanyaka tau dàngu hi na-paràha-nya pa-kikiru-ya na lunggina ba pihu kalipa-na. Tunaka nu ka pa-kiringu-nanyaka i Ndelila pa-kumilu-ya i Himuhungu, nadu ba na-munangu-ka duna na pa-kapàru wàna.

²⁰Hàla wara-nanyaka nuna na tau kawini, “Himuhungu! Da tau Pilitingu yàpa-danggauka!” wànanya. Ka hadangu-nanyaka i Himuhungu ba nakaka-ya ba peku pa-hàlangu-na hama tuna la rehi na ma-làpahu. Nda napi-anya ba mbàda dunjaku-nanyaka paraïna i MIRI.

²¹Ka yàpa-nanyaka tau Pilitingu hi daruki-ha da wua matana. Hàla hi dangàndi-ya la Nggaha dàngu dahondu wànya dua walangu nggili wudu hi dapuhi-ya la uma kapàtangu. Lai nu da-paràha-nya panggihu.

²²Tàka la ngala mandai tuna nu hili tumbu beli-nanyaka na lunggina.

²³Tunaka nu la hau lodu pauhi-danyaka da ma-kuaha la Pilitingu, ba mbabu bokulu-danya pawotu padangu maraku lai Ndanggungu, na marapu-da. Ka ludu-danyaka, “Na marapu-nda nawua-ndaka talu hanggangu lai Himuhungu na muhunda,” wàda.

²⁴Ba talànga hanggela hawola-da dapanii, “Karia-nya nàmu i Himuhungu ka tariki wàngu,” wàda. Ka karia-danyaka i Himuhungu welingu la uma kapàtangu hi datuya pariki wàda nyuda. Da-paràha-nya pa-ndolaku la manggawa dua mbungu kambaniru lundungu. Ba daita-yaka i Himuhungu, wotu-danyaka i Ndanggungu dàngu lududa, “Na marapu-nda mbàda wua-nandaka talu la muhunda na ma-paruha-ya na tananda dàngu na ma-pameti kanjupu dangu tau da angunda nyuta!” wàda.

²⁶Ka panii-naka i Himuhungu la anakeda na malonda-ya, “Pahàla-nja da limanggu ka peku ràma-ngguha da kambaniru lundungu, ka ku-haria wànggu,” wàna.

²⁷Na wàngu pakàha kihungu la tau nuna na uma. Da tau malima ma-kuaha la Pilitingu nimanja lai nu. Tàka la ndàdiku ditana nuna na uma ràkangu 3000-ya na tau. Mbuu ndàbada nyuda imingu-dànya dàngu paaka-danya i Himuhungu.

²⁸Ka kamahingu-nanyaka la rehi nu i Himuhungu lai MIRI, “Dou MIRI Mahupu jangga, namu àruka, màla àru kau pa-kapàru-ka nàhu jua-a, dou Ala, ka peku handàkangu-kinggu patungu hilu la tau Pilitingu da mambàda rukiha da wua matanggu,” wàna.

²⁹Tunaka nu i Himuhungu na-anggunja da kambaniru ba dua bunguda la padua dehi da mandema-ya na uma, hàla hi na-handera la hapungu kambaniru na lima kawana-na dàngu la kambaniru hapungu na lima kalaina.

³⁰Ka wara-nanyaka i Himuhungu, “Màta biawa ka kumeti karia-nja da tau Pilitingu yiada,” wàna. Hàla katinga rarangu-nanyaka ba na-jukaru-nja da kambaniru, ka njoru-nanyaka na uma hi na-pinjalu-nja da lima ma-kuaha Pilitingu dàngu mbuu ndàbana na tau na maninya daa la uma. Nameti-mbu i Himuhungu. Tàka la rehi metina narihi dangupa na tau pa-pameti-na welingu la rehi lurina.

³¹Hàlaka nu mai-danyaka lai nu da angu dedina dàngu mbuu ndàbada da kalembi-na papiti-ya na metina. Dangàndi beliya na metina hi datani-nya la retina i Manuahu na amana. Nuna na reti ninya la manggawa Hora dàngu Ehitaülu. Dua kambulu ndaungu mandaina ba liku uruya i Himuhungu la Ihirailu.