Read Kambera DA HAKIMU 18 Bible Online

DA HAKIMU 18 - Kambera bible

DA HAKIMU 18

¹La rehi nuna la Ihirailu nda ningu hanganji. Na kabihu Ndàngu hi - himbu-mana-nyapa pangia la patuya tana ngabada, nadu ba ndedi-mapa da-ngalangu tana hama tuna da kabihu hawiangu.

²Jia-duyaka hi dapindi tau malima mini papingi welingu la mbuu ndàba kalibaru la kabihu-da nyuda da ma-ndàdiku la Hora dàngu la Ehitaülu, hàla hi da-patanggu-nja nuda da tau malima la pa-kanuturu-ya nuna na tana. Ka laku-danyaka nuda da tau hi datàka la ma-palindingu la ngaba Epuraïmu. Lai nu hi datodu la umana i Mika.

³Ba datama-nyaka nuna na uma darongu-ya kareuku-na na bidi mini Lewi, dàngu da tandaya na laku kareuku-na. Jia-duyaka hi dalua tomaya hi da-paàra-nya, “Ka nggikina hi ninggau yiahu? Nggàra ulamu? Nggamu ma-karia-nggau?” wàdanya.

⁴Nahema na bidi mini, “Hi ningga yiahu mulana i Mika. Nyuna-maka na mawotu-ka panjadi ratuna nyuna, dàngu hi nawua-ngga wundanggu,” wàna.

⁵Hàla nyuda hi dapanii-nya, “Jàka tuna nu màla àru kau paàra-nya i Ala na palaku wàma nàhu na-palingu hi ndia?” wàdanya.

⁶Nahema na ratu, “Àmbi ndua ndandidu. I MIRI naora-nya na palaku wàmi yiana,” wànanja.

⁷Hàlaka nu laku-danyaka nuda da tau malima da-hanggangu la Layihu. Lai nu da-hamata-ya na tau mangia-nya. Daita-ya na huri lurida da tau la Layihu na-pahama na huri lurina na banjaru Hindungu. Jiapa ka la ma-indiku-ha dàngu ka damarau welingu la banjaru Hindungu, tàka daluri ngudu dàngu da-mànjaku, nda ningu muhuda, da-mbokaru, dàngumbu nda nggàra manjaka-nja.

⁸Ba dabeli-ka nuda da tau malima la angu kabihu-da la Hora dàngu la Ehitaülu, màla palara-nya na palaku wàmi, hi wàdanja.

⁹Ka panii-danyaka, “Màla ka ta-kaporuku-nya la Layihu. Mbàda lua-maka lai nàhu, dàngu maita-ya ba nahàmu na tanana, na-lerangu dàngu na mbokaru, nda nggàra-a manda ningu. Àmbu pa-engangu-du yiahu dàngu nda nggàra ulanda. Manyamalu lai nàhu ka wàhiya nuna na tana. Jàka mitàka lai nu napa, mitoma-manya duna na tau na mangia-nya lai nu ba nda na-mbutingu ndokua ba ningu napa ma-kaporuku-nya,” wàda.

¹¹Jia-duyaka nu, hadangu-danyaka welingu la Hora dàngu Ehitaülu da tau nomu ngahu kabihu Ndàngu. Mbinu madàka-mada,

¹²dalaku hanggangu la patama loduna na Kiriyàtu-Yiaarimu la ngaba Yahunda, hàla hi da-pamaü terangu lai nu. Nuna-duya na pakiri-na na pa-ngiangu nuna la Kotaku Maü tera Ndàngu hi wàda-manyapa.

¹³Welingu lai nu laku pangalangu-danyaka la ngaba ma-palindingu Epuraïmu lundu tàka la umana i Mika.

¹⁴Da tau malima ma-hamata da pa-paràha-da yia nana dapanii-nja da anguda, “Ipinya nyimi la hau na uma lai yiahu ba ningu kahala hada patapu wàngu àmahu bara? Ningu-maipa kahala hada hawiangu dàngu Eputu. Kamangu pa-kanandi dànda jàka nggikina wàndaka bàdi,” wàda.

¹⁵Ka lua-danyaka la umana i Mika, na ngia pa-ndàdiku-na na bidi mini Lewi, hi da-paàra-nya jàka ndiadu nggàra ehina.

¹⁶Nu ba tuna nu, da tau nomu ngahu panjuri kabihu Ndàngu, da mambinu ma-dàkada, ndolaku-danya la ngaru pindu bokulu.

¹⁷Nuda da tau malima ma-hamata, pangalangu-madanya patama la uma, hi dapiti-ya na kahala hada ai na patapu wàngu àmahu bara dàngu da kahala hada hawiangu lupa na eputu. La rehi nuna na bidi mini Lewi talànga ndolaku dànanja da panjuri nomu ngahu la ngaru pindu bokulu.

¹⁸Ba datama-ka nuda da tau malima la umana i Mika dàngu ba dapiti-ya na eputu dàngu da kahala hada marapu, ka paàrangu-nanyaka na bidi mini Lewi, “Nggàraya hiana na pawunda-mi?” wànanja.

¹⁹Napaya nyuda, “Kandii! Àmbu paàrangu-du. Kiku bia-nggama nyuma, napa nyumu kau njadi ratu dàngu kau tanggu panau-nggama nyuma. Welingu bau ratu la hau kuru uma-a, rihingu hàmu kau ratu ningu la hau kabihu!” wàdanya.

²⁰Nuna na bidi mini Lewi nahàmu ba nareki-ya na papanii-da. Jia hi napiti-ya na eputu dàngu da kahala hada marapu hi nakiku-nja nyuda.

²¹Tunaka nu pangala-danyaka na lakuda nuna na ma-pajurungu, ba da-pamangilu-ha da anada, da bandada dàngu da malanja-da.

²²Ba làpahu marau-daka, i Mika wànda-nanjaka da angu kaliungu-da ka da-pakariangu payaulu-ha da tau la kabihu Ndàngu. Ba dalihi-njaka,

²³warangu-danyaka i Mika dàngu da karia-na. Da-nggilaku da tau Ndàngu hi da-paàranya i Mika, “Nggàraya? Ka ni hi tu-inaka na dangumi bai mai?” wàdanya.

²⁴Nahema i Mika, “Bai palai ngàndi-duha da kahala hada mangunggu dàngu na ratuda hi lupa nda nggàra ndoku-mapa duku lai nyungga, tàka nyimi, ‘Nggàraya,’ ” hili wàmi.

²⁵Napaha da tau Ndàngu, “Rihingu hàmu kau ràpitu-ya na ngarumu. Jàka ndia, napa dambeni-du yiada da tau, hi da-kaporuku-nggau dàngu hi lupa da-pameti-kau nyumu dàngu na kuru umamu,” wàdanya.

²⁶Hàlaka nu da tau Ndàngu laku pangalangu-danyaka. I Mika ba naita-haka ba darihi kapingatu-pa nyuda, ka beli ànga bia-nanyaka.

²⁷Ba dahàla-ka da tau Ndàngu papalai ngàndiya na ratu dàngu da malanja pa-habarangu wàngu manguna i Mika, laku-danyaka pa-kaporuku-nya la Layihu, na paraingu ngia pangudu ngia pa-mànjaku-da da tau mangia-nya. (Na paraingu nuna daaya la hau lolangu dàngu na paraingu Mbetu-Rehupu.) Nuda da tau Ndàngu da-pameti hàla-maha da tau mangia-nya la Layihu, hàla hi datunu-ya na paraingu. Nda ningu ndoku tau mandula-ha da tau Layihu, nadu na paraingu nuna ba lalu indiku-na dàngu namarau welingu la Hindungu. Hàlaka nu da tau Ndàngu hili pahada beli-danyaka na paraingu, tunaka nu ngiangu-danyaka lai nu.

²⁹Na tamuna na paraingu da-panjilu-nya, la Ndàngu wàdanya, tundunya na tamu boku la mangilu-da i Ndàngu, anana i Yakupu.

³⁰Na kahala hada marapu da-pandolaku-ya la paraingu nuna hàla hi dawotu-ya i Yunatàngu, anana i Nggerihomu, umbuku-na i Muha, na ratuda. Da wàlana yiana i Nggerihomu, jia mànu-mahaka da ratu la kabihu Ndàngu, lupa tomaya na rapa paleli-nja ba wàrunja da banjaru Ihirailu la tana hau paraingu.

³¹Na kahala hada marapu pa-pandoi-na i Mika daingu ni-manyapa la Layihu, la ngala ba ninya na Maü terana i MIRI la Hilu.