Read Kambera DA HAKIMU 19 Bible Online

DA HAKIMU 19 - Kambera bible

DA HAKIMU 19

¹Ba ndedi ningu hanganji-na la Ihirailu, ninya na haàtu na tau Lewi na ma-ngiangu la tana ringu la ngaba ma-palindingu la Epuraïmu. Napiti haàtu bidi kawini la Mbetulehimu tana Yahunda hi natuya kala wihina.

²Tàka la malamiri na kawini nuna nambeni-nya[18] nyuna, hi nabeli la uma amana la Mbetulehimu. Hàlaka ba patu mbua wula-naka nuna na tau kawini ba na-ndàdiku lai nu,

³lua-nanyaka na tau Lewi na-karia-nya haàtu-na na atana dàngu hi nangàndi dua ngiuda da kalandai. Ba tàkaka lai nu, karia-nanyaka la amana paraïna nuna na kawini. Ba naita-yaka nyuna paraïna amana nuna na kawini ka kataku hàmu eti-nanyaka,

⁴hàla na-dàhiku-ya ka àmbu nabeli. Jia hi na-ndàdiku lai nu tailu mbua lodu, hi dangangu ngunungu dàngu hi datodu lai nu dàngu na kala wihina.

⁵La lodu papatu wàna, hada mba - mbarungu-danyaka hi da-kanoma palaku. Tàka na amana na tau kawini napanii dànya nuna na tau Lewi, “Ngangu pàku na kai halangatu, kai mangu palaku,” wànanya.

⁶Ka mandapu-nanyaka na tau Lewi hi dangangu ngunungu dàngu nu na amana na tau kawini. Tàka ba na-hadangu-ka ka kulaku ba wànaka, ka pamanda-nanyaka paraïna amana na kawini ka àmbu nalaku, “dàngu todu pàku yiahu,” wànanya. Ka hili ndàdiku-nanyaka hau rudungui lai nu na tau Lewi.

⁸La lodu palima wàna, la mba - mbaru, ka lakuwa ba wànaka, napaya na amana nuna na tau kawini, “Màla ngangu pàku nu, taï duna kai lakuka,” wàna. Ka nga pa-matarungu-danyaka dàngu damange - ngenahu lundu mereni tama-nanyaka na lodu.

⁹Tunaka nu na tau Lewi dàngu kala wihina lupa na atana ka malaku-wa ba wànaka, napanii na amana, “Ha ai, ka ni ba rudungu-amana-ka. Tiangu-ki kapàtangu-nanyaka. Rihingu hàmu kai todu pàku, ka tamba - mbawaki. Haromu la mba - mbaru kai lakuka duna, kai beli la umami,” wànanja.

¹⁰Tàka nuna na tau Lewi nda nahili bihu-apa patodu lai nu. Laku-danyaka dàngu kala wihina, pa-kariangu hàla dàngu na atana, dàngu da kalandai-na ba dua ngiuda, da pambàda tungu hela. Ba mareni rudungu-ama-naka, tàka-danyaka la Yembuhu (nu na Yeruhali). Hàla na atana hi napanii-nya na mirina, “Umbu, nahàmu ka ta-pànjangu pàku ka tatodu bia la paraingu tau Yembuhu lai yiahu,” wàna.

¹²Nahema na mirina, “Ndia-a! Nda ta-pànjangu-a la ngia pa-ngiangu tau nda tau Ihirailu. Maiwa ka ta-pangala-nya na àndanda hawutu-ki dàngu napa ka tatodu la Nggimbia jàka ndia la Rama,” hi wàna.

¹⁴Jia-duyaka hi dalaku pangalangu, hi nda da-pànjangu la Yembuhu. Tama-mana-nyaka na lodu ba datàka la Nggimbia la ngaba kabihu Mbanyamingu.

¹⁵Da li patodu lai nu, hi datama la paraingu da lua pa-mandapu la mambila. Tàka nda ana haàtu-a mawànda-ha patodu ningu la uma.

¹⁶Ba talànga mandapu-daka la mambila paraingu, tàka-nanyaka na haàtu na ma-kaweda na mabeli welingu paràma la woka. Làti nyuna tau ma-pawelingu la ma-palindingu Epuraïmu-ya, tàka nàhu ndàdiku-nanya la Nggimbia. (Hawiangu da ma-ngiangu la Nggimbia tau kabihu Mbanyamingu-ha.)

¹⁷Nuna na ma-kaweda ba naita-yaka na tau Lewi la mambila, paàra-nanyaka, “Ka nggi welimi angu dedi dàngu nggi luami?” wàna.

¹⁸Nahema na tau Lewi, “Nyuma bidi welima la Mbetulehimu la tana Yahunda dàngu laku beli-manyaka la uma[19] la tana ringu la ma-palindingu Epuraïmu. Nyungga, welinggu lai nu. Nda ana haàtu-ma welingu la mangu paraingu ma-mbuhangu pa-pahia-nggama umada la patodu.

¹⁹Nyuma duma nda nggàra maihi wàngu-a làti ngga - nggàra, datoma-ma duma da bàlangu-ma. Ninguma rembi dàngu pangada da kalandai-ma; ninguma roti dàngu wai angguru ndumanggu nyungga dàngu yiana na papaha-nggu dàngu na atanggu,” wàna.

²⁰Nanapa-ya nuna na ma-kaweda, “Àmbi handuka wàdunya, napa nyungga mandula kai. Àmbi todudu la mambila lai yiahu,” wànanja.

²¹Tunaka nu hi na-karia-nja da tau nuda la umana, hàla natunja uhuda da kalandai-da. Dàngu ba dahàla-ka pabaha wihida da ariyaa-na, ngangu-danyaka.

²²Ba talànga mba - mbawa-daka nu, hi jia nggupulu bia-danya nu na uma paraï da tau kabularu la paraingu nuna. Ndo - ndòru-danya na pindu hi dapanii dànya na ma-kaweda mangu umangu, “Ha pulinya nana na tau mini na pa-karia-mu la umamu. Màta ka mawàngu etima,” wàda.

²³Na ma-kaweda naluhu hi napanii dànja, “Ai ha, màtangu àru angu dedi! Ku-kamahi-nggai àmbi tudunya ma-akatu dàngu na manda ràkangu tungu nu, nadu nyuna ba ariyaa-nggunya.

²⁴Napa kuwua bia-nggainya na kala wihina dàngu na ana karia-nggu nyungga. Pekuna nyuda ka lundu hoda-minja. Mili kai màtangu pa-akatu wànya na ariyaa-nggu!” wàna.

²⁵Tàka nu da tau kabularu patidungu-madanya; jia-duyaka na tau Lewi hi na-jukaru-nya na kala wihina lai nyuda la hambeli. Ka rumbaku-madua-danyaka nu na tau kawini, nda dapànja ndokunya lundu waihangu-na.

²⁶Ba na-pabarahu-ka beli-nanyaka nuna na tau kawini, ba tuna la ngaru pindu umana na ma-kaweda, ngia patodu-na na leina, meti widi-nanyaka. Ba nahunga-ka na lodu ni bia-nyapa lai nu.

²⁷Nu la mbaru, ba na-hadangu-ka na leina hi na-bunggahu-ya na pindu ka laku ba wàna, ita-nanyaka na kala wihina ba na-tanulahu la hangga uma dàngu yàpa-nanya na pindu.

²⁸“Hadangu,” hi wànanya, “màlawa ka talaku,” wànanya. Tàka na kawini nuna nda nahema-apa ba mbàda metina-ka. Jia hi nadanda-nya hi nawotu-ya la kalandai, tunaka nu hadangu-nanyaka hi nabeli la umana.

²⁹Tàkaka la uma, tama-nanyaka hi napiti kahidi hàla hi nakadi - dipuya na metina na kala wihina lundu hakambulu dua kadipu-na. Tunaka nu pangàndi-nanjaka da hakambulu dàmbu kabihu banjaru Ihirailu, ha-kadipu hau kabihu - hau kabihu.

³⁰Mbuu ndàbana na maita-ya nuna, panii-nanyaka, “Ndedi ta-handàkangu pa-itangu ma-hamangu tungu nu piti weli àmangu, kandai luhuna na banjaru Ihirailu welingu la Mehiru lundu nàhu. Àmbu ta-kandii-dunyapa bàdi yiana. Batangu-maka bàdi, ka ta-himbalu-ya,” wàda hàla.