Read Kambera DA HAKIMU 2 Bible Online

DA HAKIMU 2 - Kambera bible

DA HAKIMU 2

¹Na Papalewa-na i MIRI welingu la Ngginggalu nalua la Mbòkimu hi napanii-nja da tau Ihirailu, “Mbàda paluhu-nggunggaika nyimi welingu la Mehiru, dàngu hi ku-karia-nggai la tana na pambàda ràndi-nggunja da boku la mangilu-mi. Dàngu mbàda panii-mbungguka, ‘Na ràndi na pambàda ràndinggu Nyungga dàngu nyimi nda kubota-aya.

²Jia-duya àmbi tura hau pa-ràndingu nyimi dàngu na tau na mangia-nya yiana na tana. Da ngia pawotu maraku-da lupangu-ma kai nyànggaru-ha,’ wànggunggai. Tàka nyimi ndai wà-anya jàka nggàraya na pa-paretanggu-nggai. Jiapa hi panjànga-kimi-nyaipa!

³Jia nàhu, kai pa-tingingu! Nda kuwàngga-ayapa paluhu na tau la tana yiana jàka mi-pabera dànja nyuda. Jia-haka nyuda da muhumi, dàngu napa nyimi hiru-danggaika, hi lupa mi-tundungu palumu-nja da marapu-da,” wàna.

⁴Ba nahàla-ka nuna na papalewa pa-palundu ndàbanya nuna na pulungu, nggubulu ndàbana na banjaru Ihirailu hii-nanyaka.

⁵Nuna-duyaka na pakiri-na na pa-ngiangu nuna la Mbòkimu[5] hi wàdanya. Hàlaka, lai nu nyuda da tau Ihirailu hi dawotu-nya kameti maraku i MIRI.

⁶Ba napuli-njaka palaku da tau Ihirailu i Yuhua ka laku-danyaka duda pa-mandapu-nya na tana pa-pandumangu-ha nimbihu-da.

⁷La ngala luri-napa i Yuhua, na tau Ihirailu na-manundu-madupa lai MIRI. Ba hina-apa nahàla pameti i Yuhua, da-manundu-mapa lai MIRI ba jiaya na kapipi-nahapa paraï da tau da mambàda ita wàngu mata wikida mbuu ndàbada da pa-hangàtarungu da pa-patumbu-na i MIRI lumuna na tau Ihirailu.

⁸I Yuhua anana i Nungu — atana i MIRI — nameti ba 110 ndaunaka na lurina.

⁹Pa-taningu-ya la tana mangu wikina, nu la Timunàtu-Hera, la tana ma-palindingu la Epuraïmu la mbara diana na Tandula Nggaàhu.

¹⁰La malamiri meti hàla-danyaka da tau rànja ndalaru-na. Tàka na ndalaru na ma-pamalamiringu nda datanda-ayapa i MIRI, nadu ba nda da-hanggau-anyapa na pa-patumbu-na i MIRI lumuna na banjaru Ihirailu.

¹¹Tunaka nu na tau Ihirailu tu-nanyaka-manjala lai MIRI. Nda dahili lumu-anyapa i MIRI, Ala boku la mangilu-da, nu na Ala na mambàda iru ngàndiha paluhu welingu la Mehiru. Pakiringu-danyaka nyuda pa-lumungu Mbaàlu dàngu Ahitoritu lupa da marapu hawiangu da palumu-da da banjaru da maweli winggiru-nja. Ka hàngga-duna-njaka paraïna i MIRI, hi napuli-maanja la tau ma-panggupulu la pa-nyairaku-ha dàngu la paramba-nja. Nda da-duluku-a nyuda la pahangga-nja da muhuda da maweli winggiru-nja.

¹⁵Handàka lua - handàka luada pa-kangaburungu, i MIRI-ma duna na mapapa-nja, hama tuna ba mbàda wàna hahanja. Jia-duyaka hi dahunggu-ya na ma-kalutu bokulu.

¹⁶Nahilu wunda - hilu wundaya i MIRI ba nawua-nja liku uru ma-patara la pa-pahàla-ha nyuda welingu la kapuli ma-rambangu.

¹⁷Tàka nyuda nda da-wàrihu-aha nuda da liku uru. Dalumu ninja da kamàla ala, hi nda da-manundu lai MIRI. Nda datundu-anja da hurida da boku la mangilu-da da ma-manundu mànu la pareta - pareta-na i MIRI.

¹⁸Jàka nawua-nja haàtu liku uru i MIRI da banjaru Ihirailu, Nyuna i MIRI nandula-maya duna nuna na liku uru. Dàngu ba talànga luri-napa nuna na liku uru, i MIRI na-pahàla mànu-maha duda la muhu - muhuda. Nyuna namila-nja eti jàka narongu-ha ba da-pangiba ruku pa-mayila-danja dàngu ruku panyàku-danja.

¹⁹Tàka jàka nameti-ka duna nuna na liku uru, hili manaü iraku-ma-anai na hurina na banjaru nuna welingu la ndalaru ma-mangilu. Pa-atangu-danyaka wikida la kamàla ala ba dalumu-nja nuda da kamàla ala. Beli-ma-adanya la huri memada na ma-akatu dàngu nda da-mbuhangu-a pa-panjilu-nya na hurida.

²⁰Jia-duyaka nu i MIRI hi nahàngga halawàla-nya na banjaru Ihirailu, hi napanii, “Mbàda pareta-manggu-njaka da boku la mangilu-da na banjaru yiana ka dayàpa pamàndu-nya na pa-ràndingu-nggu Nyungga dàngu nyuda. Ba tuna na banjaru yiana nabota-ma-aya na karàndi-na na pa-ràndingu, ba dapangga-ya na pareta-nggu.

²¹Nàhu nda kuhili bihu-apa pawàngga-ya jiapa nda nggàra banjaru-ya na mani-nyapa la tana yiana ba jiaya na metina i Yuhua.

²²Napa Nyungga kupaki-ha nuda da banjaru la pakama-nya na banjaru Ihirailu, ka peku pi wànggunya jàka tuba pa-tundungu-duna na banjaru Ihirailu la pareta - pareta-nggu hama tuna da boku la mangilu-da, hi ndia, wànggu,” wàna.

²³Nuna-duyaka na pakiri-na i MIRI hi nda nawua-nya patalu wàngu i Yuhua la ba - banjaru nuda. Tàka na nyuna pahia pàku ananja pa-engangu la tana nuna paraïna i MIRI hi nda narengga la pawàngga-ha.