Read Kambera DA HAKIMU 21 Bible Online

DA HAKIMU 21 - Kambera bible

DA HAKIMU 21

¹Ba jiaya na pauhi-na na tau Ihirailu la Mihipa, da-paràndingu-ka lai MIRI ba nda haàtu-a welingu lai nyuda ma-pahiangu anana kawini ka natu papaha-na na tau Mbanyamingu.

²Nàhu lua-danyaka la Mbetilu hi da-mandapu handuka eti lundu rudungu-na la hanggana i MIRI. Dahii dàngu hi dawara,

³“Ou MIRI, Ala Ihirailu, nggikina yiana mbuu ndàbana hi natumbu? Na kabihu Mbanyamingu, na kabihu angu banjaru-ma, mbuta-ama-naka,” wàda.

⁴Hadangu harii, la mba - mbaru hada rudungu, na banjaru Ihirailu pandoi-danyaka ngia pawotu maraku lai nu, hàla hi da-maraku-nya i MIRI kameti maraku patunu dàngu kameti maraku papeku.

⁵Tunaka nu ma-nginjiru-danyaka la honga kabihu - kabihu Ihirailu, napa hi ningu yia nana na manda lua pa-pauhi la hanggana i MIRI la Mihipa. (La rehi nuna ba mbàda harangu-dudaka jàka nggamuya na manda tutuya na dundangu la Mihipa, lupangu-ma huku pameti-ya, ba mbàda wàda-duka.)

⁶Da tau Ihirailu damila-nja eti da angu dedida da tau Mbanyamingu, hi dapanii, “La lodu nàhu na-maromba-ka na hau kabihu la Ihirailu,” wàda.

⁷“Nggikina wàndaka bàdi ka peku ningu papaha-da da tau Mbanyamingu da mani-kinjapa, nadu ba mbàda harangu-ndaka lai MIRI, napa ba nda ta-pahia-nja da ananda kawini la patuha papaha-da da tau Mbanyamingu!” wàda.

⁸Ka kanuturu-danyaka hi ningu bia hau kalibaru welingu la kabihu Ihirailu na manda lua pa-pauhi la Mihipa. Ka hunggu-danyaka da tau Yambihu la Nggiliatu, ba nda haàtu-a malua la Mihipa.

⁹Nadu ba da-tàngaru-haka da huratu pa-màtungu, nda haàtu-a tau welingu la Yambihu maningu tamuna daa la huratu.

¹⁰Jiaya ba tunaka nu, da tau da ma-pauhi la Mbetilu hi da-paràhangu tau 12.000, tau marihi kaborangu la hongada nyuda, la pa-pameti màra haàtu-ya na tau la Yambihu, mini kawini anakeda.

¹¹Dawua-nja pareta la pa-pameti ndàbaya na tau mini, dàngumbu na kawini na manda ana karia.

¹²La honga tauka na maninya la Yambihu, dahunggu kawini tau patu ngahu da maana karia. Ka ngàndi-danjaka nuda da bidi kawini la kotaku maü tera la Hilu, na maninya la tana Kanaàngu.

¹³Tunaka nu nggubulu-da da banjaru Ihirailu palewa-danyaka tau la tau Mbanyamingu da maninja la palindi - palindi watu la Rimungu, ka pamanda-nja la pa-papeku beli.

¹⁴Jia-duyaka ba tuna nu da tau Mbanyamingu hi da-kabeli; hàlaka nu na banjaru Ihirailu hi dawua-nja ha da ana karia welingu la Yambihu da panda pameti. Tàka na danguda nuda da ana karia nda da-jàmungu-a da tau Mbanyamingu.

¹⁵Na banjaru Ihirailu damila-nja eti da tau Mbanyamingu, nadu i MIRI ba na-paràta-yaka na pa-mbulungu-da da kabihu Ihirailu.

¹⁶Jia-duyaka da ma-pangora - pangora da ma-pauhi la Mbetilu dapanii, “La kabihu Mbanyamingu nda ningu ndokupa kawini. Nu ba tuna, màlawa nyuna; nda peku-anapa nyuta ka ta-pahia-nja da ananda kawini ka da-mangoma lai nyuda, nadu ba mbàda hara-ndanyaka nimbihu-na na tau lai nyuta na ma-pahiangu ana karia-na pa-mangoma la tau Mbanyamingu! Jia ba tuna nggikina wànda-njaka nyuda nu da mani-kinjapa ka peku ningumbu papaha-da? Napa na-maromba-du na hau kabihu welingu la hakambulu dàmbu kabihu la Ihirailu. Tahimbu-ka bàdi ànda ka peku ningu wàla wuana na kabihu Mbanyamingu, dàngu ka pa-daingu mangu-danya na tanada,” wàda.

¹⁹“Tuna yia na hau ànda luhu,” wàda “jia-duyaka la rehi remi ndaungu ndumana i MIRI la Hilu,” wàda. (La luruna yiana la Hilu ninya na paraingu Mbetilu, la patama loduna ninya na anda bokulu welingu la Mbetilu hanggangu la Hikimu, tàka la mbara diana ninya na paraingu Lembona.)

²⁰Ka panii-danjaka da tau Mbanyamingu da mani-injapa paraï da ngora pauhi la Mbetilu, “Milua-wa pa-kapàndi la woka - woka angguru la Hilu,

²¹dàngu kai pandapungu lai nu. Napa jàka daluhu-ka parenja da bidi kawini Hilu nu la remi ndaungu ndumana i MIRI, lupangu-ma kai luhu nyimi welingu la woka - woka angguru. Hàla lupangu-ma nyimi nimbihu-mi kai yàpa haàtu bidi kawini la hongada nyuda kai palai ngàndiya la ngaba Mbanyamingu kai tu papaha-mi.

²²Napa da amada jàka ndia da ana minida jàka damai pa-karuhi-ha, pekuna nyimi[21] papanii, ‘Ma-kamahinggai, pahia bianja lai nyuma. Nda paramba-ma la pa-kabungu-aha. Dàngu ba nda nyimia mawua-ha lai nyuma nda pangga-aminya na pa-ràndingu, ba tuna ndai njala-a,’ ” wàminja.

²³Ka pa-namatungu-danyaka da tau Mbanyamingu la kareuku pa-paningu-ha. Da-patunggu màra haàtungu ba dapalai ngàndi bidi kawini marenja la Hilu. Tunaka nu beli-danyaka la tana ngaba wikida dàngu hi da-pahada belinja da parai - paraingu-da, hi da-paengangu lai nu.

²⁴Tàka da tau Ihirailu hawiangu beli-mada-nyaika duda la tana manguda la ngaba wikida haàtu - haàtu, tundunya na kalibaru-da dàngu na kabihu-da.

²⁵La rehi nuna ndedi ningu hanganji la Ihirailu. Nimbihu-na na tau wàngu-nanya papi eti biana.