Read Kambera DA HAKIMU 3 Bible Online

DA HAKIMU 3 - Kambera bible

DA HAKIMU 3

¹Ka kama wànja da tau Ihirailu mandedi handàkangu pahunggu pabera la Kanaàngu, i MIRI na-pahia-nja ba mapira-ha da banjaru la pangia pa-engangu la tana nuna.

²Hi tuna nu i MIRI màta ka pandàma wànja da ana Ihirailu handàni - handàni la pa-pabera, ri - rihi nyuda da mandedi handàkangu pa-kikungu la pa-pabera.

³Da banjaru da mani-njapa la tana nuna jiaha: da banjaru da ma-ngiangu la lima mbua parai Pilitingu, mbuu ndàbada da banjaru Kanaàngu, na banjaru Hindungu dàngu na banjaru Hewi da ma-ngiangu la palindi Limbanongu, piti welingu la Palindi Mbaàlu-Herumungu lupa tàka la ànda na ma-hanggangu la Hamàtu.

⁴Hi ninja lai nu nyuda màta ka jiaha da pakama wànya na banjaru Ihirailu. Ba tunanja nu màta ka pi wànja da banjaru Ihirailu jàka tuba manundu-da la pareta - pareta da pambàda wuana i MIRI da boku la mangilu-da la ngaruna i Muha.

⁵Nuna-duya na pakiri-na hi da-padaingu pa-engangu la tana nuna da tau Kanaàngu, Heti, Amori, Perihu, Hewi dàngu Yembuhu anguda na banjaru Ihirailu.

⁶Na banjaru Ihirailu nalalei na-mangoma pa-korungu dàngu da banjaru nuda, dàngu da-tundungu-mbu palumu-nja da marapu-da nyuda.

⁷Na banjaru Ihirailu nanjala-ka lai MIRI, Alada. Da-maromba-nya Nyuna, hi lupa dalumu-nja da marapu Mbaàlu dàngu Ahera.

⁸Ka hàngga-duna-nyaka i MIRI na banjaru Ihirailu, dàngu hi na-pahia-nja la pa-pakàku-ha paraïna hanganji Kuhàngu-Rihataïmu welingu la Mahupatamia. Walu mbua ndaungu mandaina na hanganji nuna ba na-kuaha-ha nyuda.

⁹Tunaka nu na banjaru Ihirailu hi na-warangu ba nakarai pa-ndulangu lai MIRI, ka wua-nanjaka i Otunialu nyuna i MIRI la pa-pahàla-ha nyuda. (I Otunialu anana i Kenàhu-ya, na erina i Kalipu.)

¹⁰Na Ngahuna i MIRI na-tunggulu-ya i Otunialu, hi lupa nyuna na maliku-urunya na banjaru Ihirailu. Nalaku pa-pabera, tàka i MIRI hi nawua-nya patalu wàngu la hanganji Mahupatamia.

¹¹Ka mànjaku-nanyaka na tana patu kambulu ndaungu mandaina. Tunaka nu ka meti-nanyaka i Otunialu.

¹²Na banjaru Ihirailu hilu njala-mananyai lai MIRI, ka lupa wua-duna-nyaka paraïna i MIRI i Enggulungu, hanganji Muapu la parihi kapàru wàngu welingu la tau Ihirailu.

¹³Na hanganji Enggulungu da-pakuhingu dàngu banjaru Amungu dàngu Amaliku, hi datalu-ya na tau Ihirailu, dawàhi-ya la Yeriku, na paraingu kòruma.

¹⁴Hakambulu walu mbua ndauna na banjaru Ihirailu, ba na-panyàku-ha paraïna i Enggulungu.

¹⁵Tàka ba nawara-ka na banjaru Ihirailu ba nakarai pa-ndulangu lai MIRI, ka wua-nanjaka i Ehutu la pa-pahàla-ha nyuda. I Ehutu tau kalaiya; nyuna anana i Nggera-ya welingu la kabihu Mbanyamingu, dàngu nyuna-maka na makàli lua patuu hilu katiku la hanganji Enggulungu, da pawotu-na na banjaru Ihirailu.

¹⁶La hau lodu i Ehutu na-pandoi hapungu hapanda madàka mbeli mbapa tika pa-paradua matiru-na na madita-na. Na-pakàna-nya nuna na hapanda la bànggina la kawana-na daa la kuru kalembi-na,

¹⁷ka lua-nanyaka pawotu-ha da hilu katiku-na na banjaru Ihirailu la Hanganji Enggulungu. Na hanganji nuna panjànji nda ukuya.

¹⁸Ba napakei-njaka nuda da hilu katiku, paràha-nanjaka da tau da maduku-ha nuda da àmahu rara pabeli.

¹⁹Tàka nyuna wiki i Ehutu pànjangu-nanyaka ba tàkaka la watu pa-huratu la lihina la Ngginggalu, hàla beli-nanyaka lai Enggulungu. La rehi nu nyuna i Enggulungu ninya la kurungu ma-maringu la handàdiku dita la umana. Hi napanii i Ehutu lai Enggulungu, “Miri pa-ngarangu! Ningu lii pa-winingu pa-patàka-nggunggau,” wànanya. Napaya na hanganji, “Nedingu pàku,” wànanya; hàla hi nawua-nja pareta da atana paluhu ka puli mehanya nyuna-a dàngu i Ehutu. Tunaka nu nyuna i Ehutu hi nalua lihinya na hanganji ba mandapu-na padua, hi napanii, “Ningu lii welingu lai Ala pa-patàka-nggunggau!” wàna. Narongu-yaka nuna hi na-hadangu na hanganji.

²¹Ndedi mbàdiku-na i Ehutu, wàngu lima kalaina butuhu madua-nanyaka na hapanda-na la bànggi kawana-na, hàla hi natanju pa-tanjiku-nya la kambuna na hanganji. Handàka tambuhuku-ma-ana na dàkana na hapanda natama-mbu na uluna nalota hàlaya na aparu kambuna na hanganji, pa-ràpangu la kajia-na. Nyuna i Ehutu namàta-ma-anya nuna na hapanda lai nu,

²³hàla luhu-nanyaka hi nabita-nya dàngu hi nakuhi-ya na pindu kurungu nuna,

²⁴tunaka nu laku-nanyaka. Ba damaika da ata maràmba ita-danjaka da pindu ba pakuhi-ha, na pa-pangàda-da ninya duna daa na hanganji dàngu talànga luana pa-hambeli wàda bia.

²⁵Ba ràka patia mandaingu-madaka tàka na hanganji ndedi-mapa na bunggahu-ya na pindu, mbingu-danyaka, hàla piti-danyaka kuhi hi da-bunggahu-ya na pindu. Ka nggàraipa ita-danyaka na hanganji ba tawàlahu-na padua-ka la tana.

²⁶Nu ba talànga patia-tiangu-da, nyuna duna i Ehutu mbàda palai-naka la Haira, ba nali ningu la watu pa-huratu.

²⁷Ba natàka-ka la ma-palindingu la Epuraïmu, manyamalu hapui-madua-nanyaka na taleli, ba napaau-nya na tau Ihirailu la pa-pabera. Ka mai-danyaka hi na-karia-nja papuru welingu la ma-palindingu.

²⁸“Kikungga nyungga!” wànanja, “I MIRI na-pakàku-haka da tau Muapu, muhumi, ndumami nyimi,” wàna. La pa-irungu-na i Ehutu, puru-madua-danyaka da tau Ihirailu welingu la ma-palindingu. Da-hihiku-ya na ngia papala-da da tau Muapu la Luku Yorundangu. Nda ningu ndoku haàtu muhuda pa-pahia-da papala dàngu ma-lundungu.

²⁹Nu la pa-kangaburungu-da ràkangu 10.000-ha da tanatara Muapu mahàmu halawàla da pa-pameti-da; nda hili ningu haàtu ma-tamàhiku.

³⁰La lodu nuna kàku-nanyaka na tau Muapu welingu la tau Ihirailu. Ka mambiru-nanyaka nuna na tana walu kambulu ndaungu mandaina.

³¹Na liku-uru na ma-pandàkingu, jiaya i Hàmunggàru anana i Anàtu. Nyunambu na ma-patarangu dàngu la pa-pahàla-ya na tau Ihirailu. Ba nawàngu bia tokungu paweli wàngu hapi, ba na-pameti-ya na tau 600 tau Pilitingu.