Read Kambera DA HAKIMU 4 Bible Online

DA HAKIMU 4 - Kambera bible

DA HAKIMU 4

¹La hambeli metina i Ehutu, hilu njala-mananyai na banjaru Ihirailu lai MIRI.

²Ka puli-najaka paraïna i MIRI ba na-pakàku-ha paraïna i Yambingu, hanganji Kanaàngu na ma-mandapu la paraingu Hahuru. Na liku uruna la pa-pabera jiaya i Hihera na ma-ngiangu la Harohitu-Hanggoyimu.

³I Yambingu ningu 900-da da kareta bàhi pa-pabera wàna. Dua kambulu ndaungu mandaina ba na-panyàku-ya na tau Ihirailu ba nawànja mbàringu-na. Tunaka nu ka wara-duda-nyaka lai MIRI.

⁴La rehi nuna na ma-kapipi-ya na tau Ihirailu jiaya na haàtu wunangu kawini, Ndembora-ya na tamuna, papaha-na i Lapindutu.

⁵Nyuna i Ndembora na pakàli wàna na-mandapu mànu la lumbu pingi kòruma, la manggawa Rama dàngu Mbetilu, la ngaba ma-palindingu la Epuraïmu. Lai nuduka na tau Ihirailu ba namai ningu pa-katana-ya na panaungu-na.

⁶La hauna lodu na-paràhangu tau papaau-nya i Mbaràku, anana i Ambinuamu, welingu la paraingu Kendihu la tana ngaba Nàputali. Hàla napanii-nya i Mbaràku, “Yiana-ya na pareta-na i MIRI, Ala Ihirailu lai nyumu, ‘Pa-uhingu-wa tau 10.000 tau mini welingu la kabihu Nàputali dàngu Hembulungu, kau karia-nja nyuda la Palindi Tamburu.

⁷Napa ku-pawiti-nya i Hihera, na liku uru pabera-na i Yambingu, ka nahada-nggai nyimi la Luku Kihungu, ba na-wànggai tanatara dàngu kareta pabera la pabera-kai nyimi. Na nyuna Nyungga duku mawua-nggai pamàna wàngu nu la pa-kangaburungu,’ wànanggau,” wànanya.

⁸Napaya i Mbaràku lai Ndembora, “Jàka mulua-madu nyumu, kulua duna. Tàka jàka ndau lua nyumu, nyungga nda kulua-mai duku,” wàna.

⁹Nahema i Ndembora, “Hàmu, napa ku-kikungu! Na nyuna namuya, napa nda nyumu-apa ma-kangeha-nya na wotungu. Nadu i MIRI ba na-palua-nya la tau kawini-ka duna na ma-taluya i Hihera,” hi wàna. Ka hadangu laku-danyaka i Ndembora dàngu i Mbaràku la Kendihu.

¹⁰I Mbaràku na-dundilu-ya na kabihu Hembulungu dàngu Nàputali la Kendihu. Da matundu-nja i Mbaràku dàngu i Ndembora la rehi nuna tau 10.000-ya.

¹¹La rehi nuna i Hembiru tau Keni, na-kawàri-ka wikina welingu la angu banjaru-na. (Na banjaru Keni jiaha da wàla wuana i Hombàpu, yerana i Muha.) Nyuna i Hembiru mbàda laku-naka pawulu maüna la pangia madangu ai tarambàtingu la Haanaimu, nda nggi tuna marauna welingu la Kendihu.

¹²Ba narongu-kiyaka i Hihera ba hambàda-naka i Mbaràku la Palindi Tamburu,

¹³pauhi-madua-nanjaka da hiwa ngahu kareta bàhi pabera-na dàngu mbuu hàlada da pamba tanatara-na na-karia-nja welingu la Harohitu-Hanggoyimu hi dalaku la Luku Kihungu.

¹⁴Hàla panii-nanyaka i Ndembora lai Mbaràku, “Màla, ndàharungu-wa! I MIRI na mairu ngàndikau. La lodu nàhu Nyuna wua-nanggauka patalu wàngu lai Hihera,” wàna. Ka puru-nanyaka i Mbaràku welingu la Palindi Tamburu ba na-karia-nja da tauna da ma-hakambulu ratada,

¹⁵tunaka nu kangaburu-madua-nanyaka i Hihera. Tàka i MIRI hi na-kubaru hàlaya na pamba tanatara-na i Hihera hamanai da kareta pabera-na, hi lupa napuru i Hihera welingu la kareta-na, hi nawàngu papalai la wihi.

¹⁶I Mbaràku nutaku-mananja payaulu-ha da kareta pabera dàngu da pamba muhuda lupa datàka la Harohitu-Hanggoyimu, mbuu ndàbada da pamba tanatara-na i Hihera, na-pameti mbuta-maha; nda ningu haàtu pabili-na paluri.

¹⁷Ba talànga tunaka nu palai-nanyaka i Hihera la maü terana i Yaïlu, papaha-na i Hembiru, tau Keni. Nadu na Hanganji Yambingu welingu la Hahuru da-paariyangu dàngu da hapa-kalembi-na i Hembiru.

¹⁸Ba natàka-ka i Hihera, nanggepi-ya paraïna i Yaïlu dàngu hi napanii-nya, “Mai Miri, tamakau daa la maü teranggu; àmbu mangàdatu-du,” wànanya. Ka tama-nanyaka i Hihera daa la maü tera, hàla i Yaïlu hi na-palumburu-nya hinggi ka na-kawiningu ba wàna.

¹⁹I Hihera nakarai lai Yaïlu, “Wua àrunda wai hawutu ka ku-unungu; lalu madauka”, wàna. Tàka i Yaïlu hi na-bunggahu-ya na taneku manulangu-na, ngia pa-pahàmu-na wai huhu, hàla hi nawua-nya i Hihera hi na-unungu, tunaka nu hi nahili palumburu-nya hinggi.

²⁰Hàla i Hihera hi napanii-nya i Yaïlu, “Ndolaku àru la pindu maü. Jàka ningu tau matàka ma-paàrangu, ningu tau yiahu jàka wàna, nda ningua wàmunya,” wànanya.

²¹Nyuna i Hihera ba lalu mànggilu-na ka tàtiku-nanyaka hi na-minjalu. I Yaïlu napiti-ya na hapungu na pàha dàngu na hapungu na kandutuku nduma maü tera, hàla hi nangeri lihi kangunguhu-nya i Hihera. Tunaka nu hi na-lajiku-nya na kandutuku la kamiti-na na-pòluhungu la tana. Tuna nu i Yaïlu ba na-pameti-ya i Hihera.

²²Nu ka tàka-nanyaka i Mbaràku ba na-kanuka-ya i Hihera, i Yaïlu nanggepi-ya i Mbaràku hi napanii-nya, “Mai, napa ka ku-paita-nggaunya na tau na pahimbu-mu,” wàna. I Mbaràku natama karia-nya i Yaïlu, ka ita-nanyaka i Hihera ba mbàda metina-ka, tanggunggulu-na-padua-ka la tana, na kandutuku maü tera jiapa-yaka ba na-tanjungu la kamiti-na.

²³La lodu nuna i MIRI nawua-nya patalu wàngu na tau Ihirailu lai Yambingu, hanganji Kanaàngu.

²⁴Na hanganji nuna roduku pangala-mananya paraï tau Ihirailu lupa la malamiri hanggàmaru-nanyaka.