Read Kambera DA HAKIMU 5 Bible Online

DA HAKIMU 5 - Kambera bible

DA HAKIMU 5

¹La lodu nuna ludu-danyaka i Ndembora dàngu i Mbaràku anana i Ambinuamu:

²Wotunya i MIRI, nadu da ma-kaborangu Ihirailu ba dakita etida pa-patarangu, tàka na rayatu nawàngu etina palua pa-pabera.

³Rongu ha hanganji dàngu ha ana maràmba, nyungga duku ludu-nggunya ndumana na Ala Ihirailu, nu i MIRI.

⁴Bau hadangu welingu la Heyiru dou MIRI, dàngu bau dunjaku-nya la ngaba tana Endumu, naridu na tana, da londa awangu da-hanganga, da karumangu hi na-papuru-nya na urangu.

⁵Da-kanggauhaku da palindi la hangga na ma-kuaha la Hinai, la hanggana i MIRI, Ala Ihirailu.

⁶La rehina i Hàmunggàru anana i Anàtu, dàngu la rehina i Yaïlu-mbu, nda ningu pajuru tau danggangu la paraingu, nda ningu ma-njadangu la ànda bokulu.

⁷Da paraingu la Ihirailu nda da-pataungu da-malinggitu, mahàna hi lupa utàka nyumu Ndembora, bau tàka hama tuna na ina pa-mbuhangu.

⁸Ba na-lumungu-ka marapu na Ihirailu, tumbu-nanyaka na pabera la paraida; la honga patu kambulu rata mini mbeni hanggangu nda haàtu-a ma-yayapu madàka.

⁹La liku uru kaborangu Ihirailu da mawàngu etida pa-ndàharungu, ku-patàka-nja na pawili-nggunja na manda najaru. Wotunya i MIRI!

¹⁰Ha nyimi ma-kaliti kalandai bara, nyimi ma-mandapu la topu pa-kambuli, dàngu nyimi mbuu ndàbami mali la wihi, bobaru pakada-nyawa yiana na ruku talu.

¹¹Parongu maludu pa-mbabungu la hu - humuru, dapeka hili weli - hili weliya na taluna i MIRI, na taluna na Ihirailu banjaru-na i MIRI. Ka pajurungu-duda-nyaka nyuda la pindu paraingu.

¹²Hadangu-wa dumu Ndembora, hadangu-wa dumu Mbaràku, weli-njawa da tanawangu!

¹³Da mini la ngora da ma-kanjepi da-hurungu la liku-uruda, damai dàngu hawanjiru-da la pa-patara ndumana Nyuna.

¹⁴Welingu la Epuraïmu da-kamburungu la lolangu, dandàki-ha da pamba Mbanyamingu la hanggada. Nàmu-manjai duda da liku uru welingu la Makiru, hadangu-madanyai duda da ma-kaborangu Hembulungu.

¹⁵Da ma-pangora la Ihakàru damai karia-nya i Ndembora, langatàka nàmu-manya i Ihakàru, dàngu na-tundungu-mbu i Mbaràku; dakiku-nya nyuna pa-kamburu-nya na lolangu. Tàka da tau Rumbingu nda nggikina wàda-a ba nda dakahau etingu-a nyuda.

¹⁶Nggikina hi enga hanida la honga mbimbi? Ka marongu ma-pawangu ma-paaungu banda wàda? Deningu-mana ba nda nggikina wàna-a na kabihu Rumbingu ba nda dakahau etingu-a nyuda.

¹⁷Da Hembulungu dàngu Nàputali da-ruhungu patungu tara la rarana, na kabihu Ndàngu kaliti-nanya kapalu duna, na kabihu Nggàtu hanina la pahunga lodu Yorundangu, na Ahiaru ngudu-nanya duna nda dabihu pa-hinggilu, welingu la pangia-da la halinggi wara.

¹⁹La Taanàku lihi luku la Manggindu da-pabera da hanganji, da hanganji Kanaàngu da-patarangu tàka nda ningu àmahu bara taribu pangàndi-da.

²⁰Da kandunu la awangu da-tundungu-mbu pa-patara palawa-nya i Hihera welingu la ngia papaï-da la kuru awangu.

²¹Na Luku Kihungu na-obungu pakauta-ha da muhu, ndàharungu, ndàharu-wa wàngu kaborangu-mu ha hamangu-nggu!

²²Dawàngu pa-tapanangu ba da-kangguruku da kambiha njara, ba da-kandàraku-nja tau ma-kaliti-ha.

²³“Ràtunya la Meruhu dàngu da mangia-nya,” wàna na Papalewa-na i MIRI, ba nda damai pa-pandulangu ba ma-kaborangu-ha ka pa-tarangu ndumana i MIRI.

²⁴Wangu-naka duna Yaïlu, papaha-na i Hembiru tau Keni, welingu la mbuu ndàbana na ma-ngiangu la maü tera, nyuna marihi pa-kanyurungu.

²⁵Ba nakarai wai i Hihera, tàka nyuna nawua-nya wai huhu, na-payema-nya wai huhu la kanaingu ma-paràkangu la nduma maràmba.

²⁶Wàngu kandutuku dàngu pàha la limana, i Yaïlu na-nàhaku-ya i Hihera hi nalàjaru na katiku-na.

²⁷Ba nambàpa la lihi wihina i Yaïlu nda ningu-apa lurina, na-tanulahu la tana ba jia-yaka na njàpuna.

²⁸La manggawa punduku katonga na-butingu na inana i Hihera hi napanii, “Ka nggikina hi nda nalu tàka na kareta-na, ka nggikina hi nda parongu-ha da kangguruku njarana?” wàna.

²⁹Nahema na marihi pa-manggàna welingu la ata malumu-nya, na pahunggu-na la eti wikina,

³⁰“Paberi-danjapa da malanja pa-ribangu, haàtu madua ana karia tungguna na haàtu tanatara, i Hihera duna tera kalembi mbana wili, na maràmba kawini tera halenda pa-pahikungu,” wàna.

³¹Màla àru ka nameti na muhumu hama tuna i Hihera, ou MIRI! tàka da ariyaa-mu ka dandudu meha hama tuna lodu la awangu. Tunaka nu mambiru-nanyaka na tana patu kambulu ndaungu mandaina.