Read Kambera DA HAKIMU 6 Bible Online

DA HAKIMU 6 - Kambera bible

DA HAKIMU 6

¹Tàka hili tu-mananyai manjala na tau Ihirailu lai MIRI, hi lupa napuli-nja pa-panyàku-ha banjaru Mindiangu, pihu mbua ndaungu mandaina.

²Na tau Ihirailu lalu mbana mangàdatu-nanya na tau Mindiangu, hi lupa dalaku pa-kapàndi nàhu la kubu liangu jàka ndia la pangia ma-hinggilu la palindi - palindi.

³Hinggilu-nai handàka tondu - handàka tondungu-na na tau Ihirailu, mai-madua-nanyaka na tau Mindiangu ba dahada karia-nja da tau Amaliku dàngu na tau - tau hawiangu-ka welingu la maràda telangu la pa-làndahu-nya na tau Ihirailu.

⁴Nyuda da-pamaü terangu ningu la ngaba tana tau Ihirailu, hi lupa da-paruha hàlaha da patondu-da lai nu lupa tàka la ngaba ma-winggiru-nya la Nggaha la mbara luru. Dàngumbu da mbimbi, hapi dàngu kalandai tau Ihirailu dapalai ngàndiha. Nda ningu-maki ana ngga - nggàra pabili-da, hi lupa nda nggàra ndokuma maningu pangana na tau Ihirailu.

⁵Da tau nuda damai panunda - nundangu dàngu banda dàngu maü terada màlai ba nda ngeri danguda. Nyuda dàngu da otada lalu mbana danguda hi nda papingu padiha-ha. Nyuda maida pa-paruha-ya na tanama,

⁶na banjaru Ihirailu nda ana nggikina wàda ndokuma hanggangu lai nyuda.

⁷La malamiri pa-dudurungu-nanyaka na banjaru Ihirailu ba nakarai pa-ndulangu lai MIRI la palawa-nya na tau Mindiangu.

⁸I MIRI na-palewa-ya na haàtu wunangu lai nyuda. Na Wunangu napanii, “Tuna yia na puluna i MIRI, Ala Ihirailu, ‘Nyimi ku-pahàla-kaika welingu la paata la Mehiru.

⁹Nyimi ku-pamàna-nggaika welingu la tau Mehiru dàngu welingu la tau - tau la tana yiana na mabera-kai. Nyuda kuwàngga-haka welingu la tana yiana ba jiaya na bera-minja, hàla hi kuwua-nggai tana nyimi.

¹⁰Mbàda panii-nggunggaika, ba Nyungga MIRI Alami, dàngu nda uku nyimi la palumu-nja da marapu-na na banjaru Amori, na mangu tanangu na ngia pa-ngiangu-mi nàhu. Tàka nyimi ndai patundu-anya na pareta-nggu’, wàna,” hi wàna.

¹¹La hau na lodu na papalewa-na i MIRI namai la paraingu Òpura, hi na-mandapu la lumbu ai tarambàtingu, manguna i Yoàhu, kalibaru Ambiyehiru. Na anana na ma-tamungu Nggindiungu, talànga pàmbalungu-na uhu nggàndumu la ngia papohu angguru. Nu ba tuna nu paloku winingu-nanya ka àmbu naita-ya tau Mindiangu.

¹²Na papalewa-na i MIRI na-pawuwangu wikina lai nyuna, hi napanii, “Ha bidi mini kaborangu! I MIRI na-angunggau!” wànanya.

¹³Nahema i Nggindiungu, “Malangu-mu miri! Jàka tuba angu-maduna-nggama i MIRI, nggikina yiana mbuu ndàbana hi na-handauni-kama? Nggihaka da tanda pa-hangàtaru-ngu da pa-patumbu-na i MIRI àmangu, na palara lii wàda da boku la mangilu-ma rukuna i MIRI ba na-paluhu-ha welingu la Mehiru? Nàhu duma na-dunjaku-nggamaka i MIRI, hi napuli-nggama ba na-panyàku-kama paraï tau Mindiangu,” wàna.

¹⁴Tunaka nu i MIRI hi nawua-nya na pareta yiana i Nggindiungu, “Màtawa kau wànya mbuu ndàbana na àtalu-mu, lakuwa kau pahàla-ya na banjaru Ihirailu welingu la lima tau Mindiangu. Nyungga ma-paràha-nggau,” wànanya.

¹⁵Nahema i Nggindiungu, “Ka ni hi nyungga, MIRI? Nggiki peku-naka nyungga la pa-pahàla-ya na banjaru Ihirailu welingu la kuaha tau Mindiangu. La kabihu Manahi na biliku-nggu duku jia-ma-ayaka na marihi malinjangu. Tàka la biliku-nggu duku hili nyungga-ma-ai marihi nda palingu,” wàna.

¹⁶“Jiangu bau màka,” wàna i MIRI, “nadu ba Nyunggadu mandula-kau. Da tau Mindiangu napa namuda-ma-a bau pamija mauha, beri hama tuna tau haàtu-ma-aya na pahangga-mu,” wàna.

¹⁷Nahema i Nggindiungu, “Jàka tuba langatàka-madu ba nambuha-ngga i MIRI, màla kau wuangga hau tanda ba ma-tubangu-maya ba i MIRI wikima na mawua-ngga pareta nyungga.

¹⁸Ku-kamahi-nggau màla àru MIRI kau nedingu pàku lai yiahu màta ka ku-paloku pàkunggau pangangu kau ngangu MIRI,” wàna. “Hàmu,” wàna i MIRI, “Napa ku-nedingu-madu ka lupa mubeli,” hi wàna.

¹⁹Kabeli-nanyaka i Nggindiungu hi na-paloku-ya na heu kamàmbi kanguraku dàngu hakambulu kilu kanguta hi na-pandoi roti panda tungu tai wolu. Hàla, hi natuya na tolungu la karànjangu, tàka na wai rii la wurungu-nanya, hi nangàndi ndàbaha hi na-bànjalu-ha la hangga papalewa-na i MIRI na ma-nedingu lua la lumbu ai tarambàtingu.

²⁰Hi napanii na Papalewa-na i MIRI, “Bànjalu-ha da roti dàngu da tolungu ni la pinu watu kau mangu paburi-ya na wai rii tolungu la pinuda,” wànanya. Ka pa-namatungu-nanyaka Nggindiungu la pareta pa-wuangu-ya.

²¹Hàlaka nu na-pajolangu limana na papalewa-na i MIRI hi na-jonggaru wànya hupu ai la limana nuda da tolungu dàngu da roti. Ka roka-nanyaka na watu hi da-lundungu paraï pa-mutungu da roti dàngu da tolungu. Tunaka nu munangu-nanyaka na papalewa-na i MIRI.

²²Ka pi-duna-nyaka i Nggindiungu ba jia wiki-maya na papalewa-na i MIRI nu na mamai lai nyuna. Wàngu mangàdatu-na napanii Nggindiungu, “Hanggàmaru-nggunyaka duku ou MIRI Mahupu jangga! Nadu ba mbàda paita mata-maka dàngu na papalewa-mu!” wàna.

²³Tàka i MIRI hi napanii-nya, “Hànangu-ka. Àmbu mangàdatu! Nyumu nda jia meti-amu,” wànanya.

²⁴Hàla i Nggindiungu hi na-pahadangu ngia pawotu maraku lai nu, “MIRI Matawai Mànangu,” wànanya tamuna. Nuna na ngia pawotu maraku ni-manyapa la Òpura, la paraingu tau Ambiyehiru.

²⁵La rudungu nuna puru peka-nanyaka i MIRI lai Nggindiungu, “Pitiwa hapi minina na amamu mahàmu halawàla[6] mapihu mbua ndauna na lurina. Nyànggaru-ya na ngia pawotu maraku pa-pahada-na na amamu ndumana na Mbaàlu, hàla kau panjoru-ya na andu katoda maü marana na marapu kawini Ahera na maninya la papa ngia pawotu maraku nuna.

²⁶Pahadangu-wa la pinu tanyungguru-na hau ngia pawotu maraku pambàda kaka pa-hàmungu. Tunaka nu nuna na hapi mini, lupangu-ma kau tunu mangu heunya ka kameti maraku-ya ndumana i MIRI. Tunaka nu kau ai pa-mutungu wànya na andu katoda maü marana na marapu kawini i Ahera na pambàda panjoru-mu,” wànanya.

²⁷Ka pindi-nanjaka da tau hakambulu da atana i Nggindiungu hi dalua pa-pahàra-nya na pareta-na i MIRI lai nyuna. Tàka ba lalu mangàdatu-nanya na hapa-kalembi-na hamanai na hapa-angu ndehana, nda natoru mbeni palaku-nya nuna la lodu. Jia-duyaka hi na-palaku-ya nuna la rudungu.

²⁸Ba na-hadangu-ka la mbaru na tau la paraingu, ita-danyaka na ngia pawotu maraku la Mbaàlu dàngu na andu katoda maü marana na marapu kawini Ahera ba mbàda njoru-daka. Daita-mbuya lai nu la pangia-da ba mbàda ninguika hau ngia pawotu maraku dàngu ba ningu-mbuka patunu lai nu heu hapi mini patuu kameti maraku.

²⁹Ka paàrangu-danyaka dàngu anguda, “Nggamuka ihi na matuna nu?” wàda. Ba da ma-nginjiru-yaka pi-danyaka ba i Nggindiungu anana i Yoàhu-ka na maruku-nya.

³⁰Hàla hi dapanii lai Yoàhu, “Na anamu na-nyànggaru-yaka na ngia pawotu maraku lai Mbaàlu dàngu na-panjoru-mbuyaka na andu katoda maü marana na marapu kawini Ahera la papana na ngia pawotu maraku. Jia-duyaka luhu ngàndiya na anamu yiahu. Nameti-ma bàdi nyuna,” wàdanya.

³¹Tàka i Yoàhu hi nahema-ha mbuu ndàbada da mapapa-nya, “La ngabana i Mbaàlu-kaika nu nyimi? Ka ma-kahiri-ya nyuna wàmika nu? Nggamuya na ma-ndolaku la ngabana nyuna, jia-yaka na pa-pameti la lodu nàhu! Jàka ala-maduya i Mbaàlu, puli bianya duna ka na-kahiri wikina, nadu ba ngia pawotu maraku-na manguna nyuna-duya na pa-nyànggaru,” hi wàna.

³²Rukuna ba napanii i Yoàhu, “Puli bia-nyaka duna i Mbaàlu ka napapa wikinya i Nggindiungu, nadu ba na-nyànggaru-yaka nyuna na ngia pawotu maraku manguna,” wàna, piti welingu nuduka “Yerumbaàlu”[7] hi wànanya tau i Nggindiungu.

³³La rehi nuna mbuu ndàbada da tau Mindiangu, tau Amaliku dàngu na kabihu - kabihu hawiangu la maràda telangu la pahunga loduna na Yorundangu, pauhi hàla-danyaka. Dapala-ya na Luku Yorundangu, hi da-pamaü terangu la Lolangu Yihireyilu.

³⁴Tàka i Nggindiungu tunggulu-nanyaka Ngahuna i MIRI, hi napini taleli ba napaau-nya na tau biliku Ambiyehiru la pamai pa-kapuli dànya nyuna.

³⁵Na-paràhangu-mbu papalewa la kabihu Ahiaru, Hembulungu, Nàputali dàngu kabihu Manahi na maninya la pahunga lodu hama-manai na maninya la patama loduna na Luku Yorundangu, pakarai-ha ka da-kapuli-ya nyuna. Ka nàmu hàla-madua-njaka nyuda mbuu ndàbada pandula-ya i Nggindiungu.

³⁶Hàla hi napanii i Nggindiungu lai Ala, “MIRI, hupu liimu nyumu-mayaka ba nyunggaka pa-patanggu-mu la pa-pahàla-ya na banjaru Ihirailu.

³⁷Jàka tu langatàka-duna, la kàli ngia paurutu-ma uhu nggàndumu welingu la wilina, mbàda bànjalu-nggunyaka na wulu mbimbi pa-nggutingu. Haromu jàka jia-aha da wulu mbimbi-a da mambaha la mburungu, tàka na tana hi ndia-i, tanda-dunaka ba nyungga napa pa-patanggu-mu la pa-pahàla-ya na banjaru Ihirailu,” wàna.

³⁸Ka jia-madua-yaka na ma-patutungu: Ba na-hadangu-ka la mbaru i Nggindiungu dàngu ba napohu-haka da wulu mbimbi, hau kabana na wai hamburungu na pangala-na.

³⁹Hàla hi napanii lai Ala, “MIRI, àmbu jia hàngga dumungga, jàka ku-handàkangu-ki pahili panii. Puli àrungga ka ku-kama-kinja handàkangu da wulu mbimbi pa-nggutingu. Tàka la handàka-na nàhu màta ka da wulu mbimbi-a da ma-padaingu pamàdu, tàka na tana ka nambaha,” wàna.

⁴⁰La rudungu nuna patutu-nanyaka i Ala na pakarai-na i Nggindiungu, jia-duyaka hadangu la mbaru dàngu màdu biada da wulu mbimbi, tàka na tana mbaha-nanyaka paraï mburungu.