Read Kambera DA HAKIMU 7 Bible Online

DA HAKIMU 7 - Kambera bible

DA HAKIMU 7

¹La hau na lodu i Nggindiungu dàngu mbuu ndàbada da tau pa-karia-na dahada mba - mbarungu. Ka laku-danyaka hi da-pamaü terangu la lihi matawai Harutu. Na ngia pa-pamaü terangu-da da tau Mindiangu la mbara diaha welingu lai nyuda, la lolangu lihina na Tandula Mori.

²I MIRI napanii-nya i Nggindiungu, “Lalu mbana danguna na tau pa-karia-mu. Nda kuwua-anja patalu wàngu la tau Mindiangu, napa da-pangàda-dunya ba ruku màka wiki-mada hi datalu, ka nda dawotu-anggapa Nyungga.

³Jia ba tuna pakada-nja da karia-mu, ‘Nggamuya na ma-mangàdatu, màta ka napare - renggangu pa-dunjaku-nya yiana na Palindi Nggiliatu ka nabeli la umana,’ wàmunya,” wàna. Ningu tau 22.000-ya na mabeli, hi ana tau 10.000-kia-yaka na ma-ndàdiku.

⁴Hàla i MIRI hili panii-nanyaka i Nggindiungu, “Na tau karia-mu lalu dangu-manapa. Karia-njawa la luku. Lai nu napa ka ku-hambangi-nggau karia-mu. Jàka kupanii-nggau, ‘Na tau yiana màta kau karia-nya,’ jàka wànggunggau, màta nyuna ka nalua. Tàka, ‘Na tau yiana àmbu nalua karia-nggau,’ jàka wànggunggau, nyuna àmbu nalua-du,” wàna.

⁵Ka karia-nanjaka i Nggindiungu nuda da tau la luku, hàla panii-nanyaka i MIRI lai Nggindiungu, “Na tau na majàli wai hama tuna ahu, màta kau kawàri-ya welingu la tau na mawàngu pa-patika la pa-unungu,” wànanya.

⁶Ningu tau 300-ya na mawàngu pajàli wai welingu la limana, mbuu ndàbada hawiangu dawàngu pa-patika ba da-unungu.

⁷Tunaka nu i MIRI hi napanii-nya i Nggindiungu, “Wànja nada da tau tailu ngahu da ma-pajàli ahungu wai, jiaka-maa napa ba ku-pahàla-kai dàngu ba kuwua-nggai patalu wàngu la tau Mindiangu. Paràha-njawa nada hawiangu ka dabeli,” wànanya.

⁸Jia-duyaka i Nggindiungu hi na-paràha hàlanja da tau Ihirailu hawiangu pabeli, hinggilu-da nuda da tau tailu ngahu. Mbuu ndàbada da bàlangu dàngu da tarapitu-da da tau da mabeli, hi napiti-ha i Nggindiungu. Da tau Mindiangu ninja la lolangu la wawa ngia pa-pamaü terangu-da da tau Ihirailu.

⁹La rudungu nuna i MIRI napanii-nya i Nggindiungu, “Hàdangu-wa, Nggindiungu! Luawa kai nàhaku-ya na ngia pa-pamaü terangu-na na tau Mindiangu. Napa kuwua-nggau patalu wàmunja nyuda.

¹⁰Tàka jàka umangàdatu, wàndaya i Pura atamu kai pa-kariangu la ngia pa-pamaü terangu-na na muhu.

¹¹Napa nyumu murongu-ha jàka nggàraya na papanii-da da muhu, ba ruku tuna nu napa mutoru mbeni wànguka pa-nàhaku-ha,” wànanya. Ka lua-danyaka i Nggindiungu dàngu i Pura la padira ngia pa-pamaü terangu-da da muhu.

¹²Da tau Mindiangu, Amaliku dàngu da tau hawiangu welingu la maràda telangu, da-tanyalangu la nggi - nggini la lolangu nuna. Ba itaha hama tuna na pa-karunggingu-da da kabala. Da otada lalu mbana danguda hama tuna na wara la hingi tehiku.

¹³Ba natàka-ka i Nggindiungu lai nu, rongu-nanyaka na haàtu na tau ba talànga peka-nanya na manggadipangu-na la anguna. Na tau nuna napanii, “Ku-manggadipangu nyungga ba ninya na hau roti na manggu - nggunggulu hi natama la ngia pa-pamaü terangu-nda, hàla hi na-janggilu-ya na hau na maü tera hi lupa nanjoru, hi hama ndidaru tanaya,” wàna.

¹⁴Nahema na anguna, “Ai ha, nuna jia-yaka na hapanda-na i Nggindiungu anana i Yoàhu, tau Ihirailu! Na ihina nuna i Ala mbàda wua-nanyaka patalu wàngu hangganya na tau Mindiangu hamanai nggubulu ndàbana na kanguhuru pabera-nda nyuta!” wàna.

¹⁵Ba narongu-yaka na manggadipangu-na na tau nuna dàngu na ihina nyuna i Nggindiungu, ka patika maràbaku-nanyaka lai Ala. Tunaka nu beli-nanyaka la ngia pa-pamaü terangu-na na tau Ihirailu hi napanii, “Hawanjiru-wa! I MIRI nawua-nggainyaka na patalu wàngu la kanguhuru pabera-na na tau Mindiangu!” wàna.

¹⁶Hàla kawàri-nanjaka i Nggindiungu da tau tailu ngahu pa-karia-na, na-katailu jurunja. Haàtu - haàtu na-pakata-nja hapungu taropitu dàngu hau kadihi patungu epi hulu.

¹⁷I Nggindiungu napanii-nja, “Jàka kutàka-ka la padira ngia pa-pamaü terangu-da da tau Mindiangu panau pahàmu-mangga nyungga, dàngu kai wàmanya na pawànggu nyungga.

¹⁸Jàka jia-yaka na rehina nyungga dàngu na juru karia-nggu ba mapini-ha da taropitu, màta kai pini-mbuha nyimi da taropitu-mi. Hàla kai wara la winggiru-na nuna na ngia pa-pamaü terangu-da, ‘Lumuna i MIRI dàngu lumuna i Nggindiungu!’ ka wàmi,” wànanja.

¹⁹Ba mareni mandalora-yaka, i Nggindiungu dàngu da tauna, tàka-danyaka la padira ngia pa-pamaü terangu-na na muhu. La rehi nuna da tau da ma-manggangu ngia pa-pamaü terangu, bidi hàla-ma-ada pa-pahilungu pa-manggangu. Hàla i Nggindiungu dàngu da juruna pini-danjaka da taropitu-da dàngu bera-danjaka da kadihi epi huluda.

²⁰Da dua juru banjaru tuda numai duda. Hàla hi handàka jakaru-danja da epi huluda la lima kalaida dàngu hi dapini-ha da taropitu-da la lima kawana-da. Ka wara-danyaka, “Hapanda ndumana i MIRI dàngu ndumana i Nggindiungu!” wàda.

²¹Nyuda mbuu ndàbada jiapa-maha na ndolaku pa-daingu-da haàtu - haàtu la pangia-na ba daweli winggiru-nya na ngia pa-pamaü terangu. Mbuu ndàbana na kanguhuru pabera-na na muhu wala-danyaka wikida papalai ba la - ladada.

²²Ba talànga palingu-da taropitu i Nggindiungu dàngu da karia-na, i MIRI na-pawiti-nya na muhu hi lupa da-pabelingu dàngga anguda ba da-palàndahungu hapanda. Palai-danyaka hanggangu la Harera lupa datoma la Mbetu Hita dàngu la paraingu Ambilu-Mahola la lihina la Tambàtu.

²³Hi dapaau-mbunya na kabihu Nàputali, na kabihu Ahiaru dàngu na kabihu Manahi, na maninya la pahunga lodu dàngu la patama lodu Luku Yorundangu. Ka yaulu-danjaka da tanatara Mindiangu.

²⁴Hamanai nggubulu-na la ngaba ma-palindingu Epuraïmu, palewa-mananya tau i Nggindiungu pa-pangàndi-nja langu, “Puru hàla ka tabera-ya na tau Mindiangu. Patoru-manya na Luku Yorundangu dàngu mbuu ndàbada da ana luku lupa tàka la Mbetu-Mbara. Àmbi pahia-dunya na tau Mindiangu papala ningu lai nu,” wànanja. Ka koda-danjaka da tau Epuraïmu, hi wari hàlaya la pa-patoru-nya na Luku Yorundangu lupa mbuu ndàbada da ana luku lundu tomaya la Mbetu-Mbara.

²⁵Tau madua-ha da ma-pangora la tau Mindiangu da payàpa-da nyunda, jiaha i Oripu dàngu i Heyipu. I Oripu da-pameti-ya la Watu Oripu tàka i Heyipu da-pameti-ya la ngia papohu angguru Heyipu. Da tau Epuraïmu pa-nutakungu-madanya payaulu-ha da tau Mindiangu, hàla hi dangàndi-ha da katiku-da i Oripu dàngu i Heyipu lai Nggindiungu la hapapa Yorundangu la pahunga loduna.