Read Kambera DA HAKIMU 8 Bible Online

DA HAKIMU 8 - Kambera bible

DA HAKIMU 8

¹Da tau Epuraïmu dapanii-nya i Nggindiungu, “Nggikina nyuma hi ndau wànda-kama bau hadangu palua pabera-ya na tau Mindiangu? Ka nggikina nyumu hi tumu-nggama nu nyuma?” Wàdanya ba dapulu-nya i Nggindiungu.

²Tàka nahema i Nggindiungu, “Nu na paruku-nggu nyungga nda ana pira-ana jàka pamenja-nya na paruku-mi nyimi. Jiapa ka ana hawutu-na na paruku-mi, tàka nuna na ma-hawutu-na na-pawilingu ningupa welingu la mbuu ndàbana na paruku-na na angu kalibaru-nggu nyungga.

³Nyimika mangala-nya na kuaha welingu lai Ala, hi lupa mimàka papameti-ha i Oripu dàngu Heyipu da tau madua da ma-pangora la tau Mindiangu! Jàka pamenja-nya nuna, nggàra-ayaka na rukunggu nyungga?” wànanja. Ba napanii tunaka nu i Nggindiungu, nda dahili mbeni-apa.

⁴La rehi nuna i Nggindiungu dàngu da tau tailu ngahu tau karia-na tàka-danyaka la hapapa Luku Yorundangu. Kanjupu manggilu-ha tàka yaulu pangala-mada-nyapa na muhu.

⁵Tunaka nu tàka-danyaka la Hukutu. Lai nu i Nggindiungu napanii-nya na tau na mangia-nya na paraingu, “Wua àrunja hawutu pangangu da karia-nggu. Lalu mbana mànggilu-mada tàka hi yaulu-mama-njapa i Njemba dàngu i Hàlamuna, da hanganji Mindiangu,” wàna.

⁶Tàka da ma-pangora la Hukutu dahema, “Ai ha, ndedi-mbupa miyàpa-ha i Njemba dàngu i Hàlamuna, mbàda karaimi nyimi pangangu. Nggàra lingu-naka ba wuanja pangangu da karia-mu?” wàdanya.

⁷Napaya i Nggindiungu, “Hamudu! Kau napa jàka nawua-nggaka i MIRI patalu wàngu lai Njemba dàngu Hàlamuna, napa ku-ajaru wànggai rii paketu dàngu tara manu welingu la maràda bulu wara!” wànanja.

⁸Tunaka nu i Nggindiungu hi na-pangala-nya na lakuna lupa datàka la Panuilu. Lai nu jia-mayai ba nakarai-nja pangangu da karia-na. Tàka na hemana na tau la Panuilu hama-mana na hemana na tau la Hukutu.

⁹Jia-duyaka nu i Nggindiungu hi napanii-nja, “Napa kubeli-ma mangu mànangu. Napa la rehina nuna ka ku-panjoru-ya na lewatu-na na paraingu yiana!” hi wànanja.

¹⁰Ba talànga tuna nu nyuda i Njemba dàngu i Hàlamuna dàngu mbuu ndàbana na pambana ninja padua la Kàrakòru. Welingu la nggubulu pambana na tau la maràda bulu wara, ningu tau 15.000-kia-yaka na marihi; tau 120.000-yaka na tanatara-na na mambàda hanggubalu.

¹¹I Nggindiungu na-pipitu-ya na padira maràda bulu wara la pahunga lodu Nomba dàngu Yòkumbeha, hàla hi na-kangaburu harabànda-ya na muhu.

¹²I Njemba dàngu i Hàlamuna, da hanganji Mindiangu ba dadua dapalai, tàka i Nggindiungu na-nutaku payaulu-ha hi nayàpa-ha, hi lupa nggubulu ndàbana na kanguhuru pabera-da nda dapingu tubada.

¹³Tunaka nu ba dabeli welingu la pa-kangaburungu, i Nggindiungu nali ningu la pa-kandekalu la Herihu.

¹⁴Lai nu nayàpa-ya na haàtu na bidi mini welingu la Hukutu, hi da-paàra-nya da tamuda da ma-pangora la Hukutu. Ka tulihu-nanyaka nuna na tau da tamuda ndumana i Nggindiungu — mbuu ndàbada tau pihu kambulu mapihu-ha.

¹⁵Hàlaka nu lua-nanyaka i Nggindiungu la ma-pangora la paraingu nuna hi napanii-nja, “Iluka, yiada-haka i Njemba dàngu i Hàlamuna. I namu-duyapa ba ndai bihu pa-pandulangu, ba ndedi kuyàpa-ha yiada, wàngguka? Tàka nyimi ndai bihu pawua-nja pangangu da tau karia-nggu; làti la rehi nuna mànggilu-madanya,” wànanja.

¹⁶Hàlaka nu i Nggindiungu piti-nanyaka rii paketu dàngu tara manu welingu la maràda bulu wara, hàla hi na-ràmbahu-ha da ma-pangora la paraingu Hukutu.

¹⁷La Panuilu-mbu panjoru-nanyaka na lewatu paraingu dàngu hi na-pameti hàlaha da tau mini la paraingu nuna.

¹⁸Hàlaka patuna nu i Nggindiungu na-paàranja i Njemba dàngu i Hàlamuna, “Nggikida da tau pa-pameti-mi yia nana la Tamburu?” wànanja. Dahema i Njemba dàngu i Hàlamuna, “Nyuda mbuu ndàbada daeru-makau nyumu, da-pahada ana maràmbangu,” wàdanya.

¹⁹“Nuda angunggu paluhu-maha, anana na ina-manggunja,” wàna i Nggindiungu. “Làti jàka ndai pameti-ha nyuda, kumeti-ki nda jia pameti-anggunggai làti nyimi,” hi wànanja.

²⁰Hàla i Nggindiungu napanii-nya i Yetiru kawunga anana, “Màla, pameti-hawa!” wànanya. Tàka i Yetiru lalu bidi mini-napa. Jia hi na-mangàdatu, hi nda natoru mbeni pa-butuhu-ya na hapanda-na la pa-pameti-ha.

²¹Napaha i Njemba dàngu i Hàlamuna, “Màla, nyumu jàka mini-dukau, wàngu lima wiki biamu bàdi bau pameti-kama,” wàdanya. Ka pameti-nanjaka paraïna i Nggindiungu, hi napiti hàlaha da ngaüda da maninja la nggoru otada.

²²Tunaka nu hi napanii na banjaru Ihirailu lai Nggindiungu, “Nyumuka ma-pahàla-kama welingu la kuaha tau Mindiangu. Jia-duya màtawa nu ka nyumu biawa liku-uruma, nyumu dàngu da wàla wuamu,” wàdanya.

²³Nahema i Nggindiungu, “Ndia-a! Nda nyungga-a duku liku urumi, da ananggu ndiambu. I MIRI jia-aya na liku-urumi,” wànanja.

²⁴Tàka tunaka nu hili panii-nanyaka i Nggindiungu, “Ninya hangia-ana duku na pakarai-nggu, da pula da papiti màngimi welingu la muhu kai wua hàla-nggaha nyungga,” wàna. (Na tau Mindiangu nakàli tungu pula àmahu rara; hama-mana na ta - tauka na ma-ngiangu la maràda bulu wara.)

²⁵“Hàmu,” hi wàda, “dàngu hàmu eti-mama nu ba mawua-nggauha,” wàdanya. Hàla hi da-pawàlahu hawàla hinggi, tunaka nu haàtu - haàtu namai hi na-bànjalu-ha lai nu da pula da papiti màngida welingu la muhu.

²⁶Mbuu ndàbada da pula àmahu rara da pawua-danya i Nggindiungu la rehi nuna na mbotuda tika padua kambulu kiluda, ndedi datama da ngaü, da kuramoki, da hinggi mbaü atu mitingu da pa-pakida da maràmba Mindiangu, dàngu da nggelu nggoru da maninja la nggoru otada.

²⁷Welingu la àmahu nuda, i Nggindiungu na-pandoi hau kahala hada marapu, hi natu niya la ndehana la Òpura. Mbuu ndàbana na tau Ihirailu lua-nanyaka lai nu la pa-maraku-nya nu na kahala hada marapu, hi lupa nda dahili eti wa-anyapa i MIRI. Na rukuna nuna hama tuna hiru-yaka lai Nggindiungu dàngu kuru umana.

²⁸Da tau Mindiangu nda dahili katiku kapàku-apa, ba pakàku-mana-njaka tau Ihirailu. Ka mambiru-nanyaka na tana patu kambulu ndaungu, ba talànga lurina i Nggindiungu.

²⁹Ba hàlaka nu pa-pakabungu beli-nanyaka duna i Nggindiungu la kuru kotaku kanjangaru-na, hi na-paengangu lai nu.

³⁰Nyuna ningu tau pihu kambulu-ha da anana mini nadu ba dadangu da papaha-na.

³¹Nimbunya na haàtu na papaha kala wihina la Hikimu; welingu la kala wihina yiana na-ngalangu haàtu anakeda mini, Ambimeliku, wàna ba na-patamu-nya.

³²Ba làpahu kaweda nàkapu-manaka hina-duka i Nggindiungu anana i Yoàhu hi nameti. Datani-nya la retina i Yoàhu amana. Na reti nuna ninya la Òpura, na paraingu kalibaru Ambiyehiru.

³³La hambeli metina i Nggindiungu, na tau Ihirailu nda nahili tuturu-apa lai Ala. Dalumu-nja da marapu Mbaàlu, dàngu hi datuya i Mbaàlu-Mberitu marapu-da nyuda.

³⁴Nda dahili lumungu-apa lai Ala, MIRI-da, na mambàda pahàla-ha welingu la kuaha muhu - muhuda da maweli winggiru-nja.

³⁵Nyuda nda da-papapa-mbuya na hàmuna i Nggindiungu la nua kalembi-na, rukuda mbuu ndàbada da paraï rukuna hanggangu la tau Ihirailu.