Read Kambera DA HAKIMU 9 Bible Online

DA HAKIMU 9 - Kambera bible

DA HAKIMU 9

¹La hau na lodu i Ambimeliku anana i Nggindiungu, nalua la paraingu Hikimu na pangia-da da kalembi inana. Lai nu hi napanii-nja nyuda.

²“Kamangu pa-paàra hàlanya na tau na mangia-nya la Hikimu, nggiya na marihi hàmu: Da-pareta-kai da tau pihu kambulu anana i Nggindiungu, jàka ndia ka na-pareta-kai tau haàtu-a? Panamu-mbunja, nyungga yia ba nua wai ria-dangga,” wàna.

³Ka lua-danyaka da kalembi inana i Ambimeliku la tau Hikimu hi da-patàka-nya na paniina i Ambimeliku lai nyuda. Hàla da tau da mangia-nya la Hikimu bota-danyaka la pakiku-nya i Ambimeliku, nadu tundunya na pa-kanandi-da ba nua wai ria-danya.

⁴Tunaka nu wua-danyaka pihu kambulu àmahu bara, da papiti welingu la uma ngia pa-maraku-nya i Mbaàlu-Mberitu. Wànja da àmahu nuda hewa-nanjaka da kapuli tau akatu da maangu-nya nyuna,

⁵hàla hi dalaku la kotaku-na na amana la Òpura. Lai nu, na-pameti-ha da pihu kambulu anguna paluhu la pinu hau watu. Tàka i Yotàmu, na ana kamuri-na i Nggindiungu, nda pa-pameti karia-anja rukuna ba na-kawiningu.

⁶Ka pauhi-nanyaka mbuu ndàbana na tau mangia-nya la Hikimu dàngu la Mbetu-Milu, hàla hi dalaku la lumbu ai tarambàtingu la Hikimu. Lai nu katua-danyaka i Ambimeliku la pa-hanganji.

⁷Ba narongu-ka i Yotàmu na rukuna nuna, laku-nanyaka hi na-ndolaku dita la pinu Palindi Nggerihimu, hi nawara la tubada da tau nuda, “Ronguka ha tau Hikimu, ka peku rongu-mbunanggai nyimi i Ala,” wàna.

⁸“Tuna wàda handàka, da-pauhi da pingi ai dangu, ka tapindi hanganji-nda wàda. Ka panii-danyaka nyuda la pingi ai haitungu, ‘Nyumuka na hanganji-ma,’ wàdanya.

⁹Nahema na ai haitungu, ‘Ai ha nda kubihu duku. Nadu jàka ku-hanganji-nggaika nyimi, ku-pànjangu-duka bàdi pa-wuangu ihi mina haitungu na pawàngu ba maraku-nja da marapu dàngu tau,’ wàna.

¹⁰Hàla panii-danyaka da pingi ai la ai kanjilu, ‘Nyumu bia kau hanganji-nggama,’ wàdanya.

¹¹Nahema na ai kanjilu, ‘Nda kubihu-a duku, nadu jàka ku-hanganji-nggai nyimi, ka ku-pànjangu-duka bàdi patu wua kanjilu malàngga,’ wàna.

¹²Hàlaka nu, panii-danyaka da pingi ai la pingi angguru, ‘Na, nyumuka ma-hanganji-nggama,’ wàdanya.

¹³Tàka nahema na pingi angguru, ‘Nggiki-naka bàdi hi jia pànjangu bianggu patu wuanggu ma-paminjalu eti marapu dàngu tau, paraï pa-hanganji-nggai nyimi,’ wàna.

¹⁴Ruku tunaka nu panii-danyaka la pingi rii madàka, ‘Nyumu biawa kau hanganji-nggama,’ wàdanya.

¹⁵Nahema na rii madàka, ‘Jàka langatàka-maminya la patuka nyungga hanganji-mi, pa-maingu biawa kai pamaüngu la lumbunggu. Tàka jàka ndai bihu, napa welingu la kahanga-nggu da madàka naluhu na epi na matunu pambuta-ha da pingi linu la Limbanongu,’ ” wàna.

¹⁶“Na,” wàna i Yotàmu ba na-pangala-nya, “Màla bai katua-yaka i Ambimeliku la pa-hanganji, wàngu tànji eti-mamiku nu ba timi nu? Mbàda wunda-minyaka na ma-paràkangu hanggangu lai Nggindiungu na amanggu, dàngu hanggangu la kuru umana? Mbàda tu-minyaka himbalu-na na paraï ruku hàmuna na amanggu,

¹⁷na matika pa-patarangu rukumi nyimi? Ngàdaya, nyuna ba màtu nda nawaiya na luri wikina ba nalumu dànggai nyimi la pa-pahàla-kai welingu la kuaha tau Mindiangu.

¹⁸Tàka la lodu nàhu kabeli puha mihaka da kuru umana na amanggu. Da anana bai pameti hàlaha — tau pihu kambulu-ha bai handàka pameti-ha la hau watu. I Ambimeliku anana na ama-madu-nggunya welingu la atana kawini. Tàka nyimi mi-katua-yaka la pa-hanganji la Hikimu, jia-maaya ba nua wai ria-nanggai nyimi.

¹⁹Na, na pahada ngàndimi la lodu nàhu hanggangu la amanggu dàngu kuru umana, jàka matànji dàngu jàka maweli eti-maya, màlawa nu kai hanggela hawola dànya i Ambimeliku, dàngu màtawa nyuna ka na-hanggela hawola dànggai nyimi.

²⁰Tàka jàka nda tuna nu bidua, màla àruki ka na-kandulangu na epi welingu lai Ambimeliku na matunu hàlaya na tau na mangia-nya la Hikimu dàngu la Mbetu-Milu. Dàngu màla àruki welingu la tau mangia-nya la Hikimu dàngu la Mbetu-Milu ka na-kandulangu na epi na matunu hàlaya i Ambimeliku,” wàna.

²¹Hàlaka nu wala-nanyaka wikina papalai, hàla laku ndàdiku-nanyaka la Mbeyiru, nadu ba na-mangàdatu-nya i Ambimeliku, anguna paluhu.

²²Tailu mbua ndauna mandaina i Ambimeliku ba na-pareta-ya la Ihirailu.

²³Hàla patumbu-nanyaka i MIRI na pa-pamuhungu wàda i Ambimeliku dàngu da tau mangia-nya la Hikimu, ka lawa-duda-nyaka nyuna.

²⁴Na rukuna nuna hi natumbu màtawa ka himbalu wànya na akatu-na i Ambimeliku dàngu da tau Hikimu da marunda-ya la pa-pameti-ha da anana i Nggindiungu, ba tau pihu kambulu-ha.

²⁵Da tau Hikimu datu tau ma-pandapungu la pinu palindi - palindi la payàpa-ya i Ambimeliku. Tàka nggamu biaya na tau na mali lai nu daramba-nya paraï da tau ma-pandapungu. Na rukuna nuna da-patàka-nya i Ambimeliku.

²⁶La rehi nuna tàka-nanyaka i Nggaàlu anana i Embitu, pa-maingu-danyaka dàngu da angu dedi-naka pa-ndàdiku la Hikimu; tàka da tau Hikimu damonu-manya nyuna.

²⁷Dalua papàpu angguru la wo - woka angguru, hi da-pandoi wai angguru pa-unungu, hi da-patumbu remi. Nyuda dangangu ngunungu la ngia palumu-danya na marapu-da ba dàngu ra - ràtu-danya i Ambimeliku.

²⁸Tàka i Nggaàlu, “Ka nggamuta nyuta yia hi lupa ta-karuduku bia lai Ambimeliku?” wàna. “Nggamuya duna làti nyuna? Ka nda anana i Nggindiungu-aya nyuna ba dàngu anguda i Hembulu na wakilu-na ba naata-nja paraïna Hemuru amana i Hikimu na boku la mangilu-nda nyuta,” wàna.

²⁹Làti jàka nyungga ma-kapipi-ya yia na tau la Hikimu, jia la njàpu-kiaka na lurina i Ambimeliku! Napa ka wànggunya,[8] “Màla undàharungu! Wariha da tanatara-mu kau mai ka ta-paràkapu la pabera!” wànggunya, wàna.

³⁰I Hembulu, na ma-kuaha la paraingu Hikimu, hàngga-nanyaka ba narongu-ya na papanii-na i Nggaàlu.

³¹Palewa-nanyaka tau lai Ambimeliku la Aruma, pa-patàka-nya yiana na panii, “I Nggaàlu anana i Embitu dàngu hapa-anguda paluhu da ma-pamaingu la Hikimu, darunda-ya na tau la Hikimu la palawa-nggau nyumu.

³²Jia ba tuna, màtawa nyumu dàngu da taumu kai lua pa-kapàndi la ma-pawokangu nu la rudungu.

³³Haromu la mbaru jàka nahunga-ka na lodu, kau ràkapu harabànda-ya na paraingu. Tàka jàka naluhu-ka i Nggaàlu dàngu tauna palawa-nggau, rehi-madua-naka bau kaporuku-nya,” wàna.

³⁴Ka laku-madua-nanyaka i Ambimeliku dàngu da karia-naka nu la rudungu. Da kapatu pambangu ba dapai - ihangu, hàla hi dalaku pa-kapàndi la winggiru paraingu Hikimu.

³⁵Ba daita-kiyaka paraï da i Ambimeliku dàngu tau karia-na ba naluhu pa-ndolaku i Nggaàlu la ngaru pindu paraingu, luhu hàla-danyaka welingu la ngia pa-kapàndi-da.

³⁶I Nggaàlu naita-ha, hi napanii-nya i Hembulu, “Tàngaru! Ningu tau mapuru yiahu welingu la pinu - pinu palindi!” wàna. “Ha, nuda nda tauaha” wàna ba nahema i Hembulu, “nuda ninu-aha duda la palindi,” wàna.

³⁷Hàla nahili panii i Nggaàlu, “Deningu-mana! Ningu tau mapuru welingu la karaha palindi, tàka hilu hapamba-nai na ma-hanggangu nàmu welingu la tubana na pingi ai tarambàtingu na mahàri,” wàna.

³⁸Ka panii-nanyaka i Hembulu lai Nggaàlu, “Ka na, nggiyaka na ngarumu na pawanga-mu. Làti la wungana, nggàra tuba-naka ba ta-marubuku-nya i Ambimeliku, ba wàmu. Yiada jia-duhaka da tau pa-paaka-mu. Màla ndàharungu nu kau ràkapu-ha!” wànanya.

³⁹Hàla i Nggaàlu hi naluhu ngàndiya na tau Hikimu, hi dalawa-nya i Ambimeliku.

⁴⁰Tàka hi na-ràkapu-ya paraïna i Ambimeliku, hi lupa nawala wikina papalai. Dadangu da mameti lundu la pindu bokulu paraingu.

⁴¹La njàpuna beli-nanyaka duna i Ambimeliku la Aruma; tàka i Hembulu hi nawàngga-ha i Nggaàlu dàngu hapa-anguda paluhu welingu la Hikimu. Nda peku-anapa nyuda pa-ndàdiku lai nu.

⁴²Hadangu harii pakiringu-nanyaka na tau Hikimu pa-dunjaku-nya na paraingu ka lua la woka, tàka na rukuna nuna hi patàka-nya i Ambimeliku.

⁴³Jia-duyaka i Ambimeliku hi na-pauhi-nya na tauna, hi na-kawàri katailu pambanja, hi dalaku pa-kapàndi nàhu la ma-pawokangu. Ba naita-yaka na ihi paraingu ba na-hanggangu la woka, luhu madua-nanyaka welingu la ngia pa-kapàndi-na hi na-pameti-ha.

⁴⁴Ba talànga ri - ringa-naka i Ambimeliku dàngu na pambana pa-ndàharungu pa-kangaburu-ya na pindu paraingu, da dua pamba anguda dayaulu-ha dàngu da-pameti-ha da tau da mambàda palai la woka.

⁴⁵I Ambimeliku na-kanjupu-ya na lodu ba na-kangaburu pangala-nya na paraingu hi lupa na-mandapu-nya na paraingu, na ihi paraingu na-pameti-ya, hàla hi na-nyànggaru-ya, tuna ka nu hi na-wewaru-nya mehi.

⁴⁶Ba darongu-ka da tau da maninja la tindingu Hikimu na rukuna nuna, laku-danyaka pa-kawiningu la kubu liangu uma marapu Elu-Mberitu.

⁴⁷Nu ka patàka-danyaka tau i Ambimeliku na rukuda da tau la tindingu Hikimu ba pauhi-danyaka lai nu.

⁴⁸Jia-duyaka i Ambimeliku dàngu da tauna hi dalua la palindi Hàlamongu. Lai nu napunggu wàngu kataka kahanga - kahanga ai, hàla hi naduku-ha la kunduna. Hi na-paràha-nja da anguna patundu-nya hama tuna nyuna ba tuna nu.

⁴⁹Ka haka-punggu - haka-punggu-daka kahanga ai da tauna, hi dakiku-nya i Ambimeliku. Mbuu ndàbada da kahanga ai hi da-pabundu-nja la ngaru liangu uma marapu, hàla hi datunu-ya, dàngu ninja-padua daa da tau Hikimu. Jia-duyaka hi dameti mbuta da tau mangia-nya la Hikimu, ràkangu tau harata-ya mini kawini.

⁵⁰Hàlaka nu laku-nanyaka i Ambimeliku la Tembihu. Na-nggupulu-ya nuna na paraingu hi na-mandapu-nya.

⁵¹Daa la padua paraingu ninya na hau lewatu ma-kapingatu. Mbuu ndàbana na tau na mangia-nya na paraingu nuna palai-danyaka lai nu, datama daa la kuru lewatu hàla hi dakuhi-ya dàngu hi dahei hu dita.

⁵²Tunaka nu tàka-nanyaka i Ambimeliku lai nu la pa-ràkapu-ya nuna na lewatu. Ba natàka-ka la pindu lewatu, dàngu ka tunuya ba wàna,

⁵³na haàtu na kawini napuha-nya hau watu panggihu wàngu la katiku-na hi lupa naràta na kaba katiku-na.

⁵⁴Ka paau parengga-nanyaka i Ambimeliku na haàtu na bidi mini na matanggu dukuha da ma-dàkana, hi napanii-nya, “Butuhu-ya na hapanda-mu kau pameti-ka, nda ku-mbuhangu ka napulu-ngga tau, ba tau kawini-ma-a ma-pameti-ka,” wàna. Ka hunju-nanyaka paraïna nuna na bidi mini hi nameti.

⁵⁵Ba naita-yaka paraï da tau Ihirailu ba meti-nanyaka i Ambimeliku, ka beli hàla-danyaka.

⁵⁶Tuna nu na pawàna i Ala ba natunya himbalu-na na akatu pa-pandoi-na hanggangu la amana, ba jiaya na pameti-nanja da anguna paluhu ba tau pihu kambulu-ha.

⁵⁷Dàngumbu i MIRI nahuku-nya na tau la Hikimu ruku akatu-da. Tubangu-ma hama tuna ba wàna i Yotàmu anana i Nggindiungu, na rukuda nyuda ba jiaya na ràtu-nanja.