Read Kambera 2 YUHANI 1 Bible Online

2 YUHANI 1 - Kambera bible

2 YUHANI 1

¹Tàkanya i Ràmbu na papindi-na i Ala, dàngu da anana.[1] Na huratu yiana paweli-na lai nyungga liku uru kabungguru, na mambuha langatàka-nggai nyimi. Nda mbulungu nyungga bia tàka mbuu ndàbana na matanda-ya i Ala na ma-deningu, dambuha hàla-manggai.

²Nadu ba na-ngiangu i Ala daa la etinda, dàngu napa ba ni mànu-manya lai nyuta lundu nu - nu.

³Mili àru ka nawua-nda kanyuru, pa-namungu dàngu mànjaku paraïna i Ala Ama, dàngu i Yehu Karitu na Anana i Ama. Mili àru nuda mbuu ndàbada ka tamangu-nja wàngu eti tànjinda dàngu mbuhangu-nda.

⁴Lalu nggaüru-ya na etinggu ba kupinya ba ninja da anamu Ràmbu, da maluri tundunja da lii pa-ajaru-na i Ala, hama tuna na pareta pambàda wua-nanda i Ala Ama lai nyuta.

⁵Jia ba tuna Ràmbu, kukarai langatàka-kau ka pekuna nyuta mbuu ndàbanda ka ta-kawàra pa-mbuhangu. Yiana na pa-jàkaru-nggu nda bidi pareta-aya; na pareta yiana mbàda pa-wuangu-mataka piti welingu la kawunga pawainda.

⁶Na mbuhangu ba wànda, jiaya jàka taluri tundunja da pareta-na i Ala. Dàngu da pareta da pambàda rongumi welingu la wungana, jia-duyaka bai luri pa-mbuhangu-ma bàdi dàngga angumi.

⁷Nadangu na ma-palapingu na ma-tanyalangu la pinu tana nggubulu-na. Nyuda jiaha da tau da manda pajia-ya ba mbàda mainaka la pinu tana la hada tau i Yehu Karitu. Da tau tungu nu ma-palapingu-ha, dàngu Muhuna i Karitu-ha.

⁸Jia ba tuna, manggangu-ma ka àmbu jia mbulangu-na na pambàda pamukaru-ma ndumami nyimi.[2] Pamukarungu-ma ka peku ngala-minja welingu lai Ala nggubulu-da da wundami.

⁹Na tau na manda pamàndu-nja da lii pa-ajaru-na i Karitu, tàka hi hiliru bia-nanya welingu la lii pa-ajaru-na i Karitu, na tau nuna nda namangu-anya i Ala. Na tau na ma-padaingu la lii pa-ajaru-na i Karitu, hangia tandaya lai nyuna ba mangu-nanya i Ala Ama dàngu i Ana.

¹⁰Jia-duya nu, jàka era ningu tau matàka dàngu hi na-bobaru-nggai lii pa-ajaru na panda ajaru-na i Karitu, àmbi kataku-duya na tau nuna la umami jàka ndia àmbi pekanya lii malangu.

¹¹Nadu na tau na mapeka-nya lii malangu na tau tungu nu, tundu-mbunanya na tau nuna la palaku-nya na pawunda na ma-akatu.

¹²Dadangu-pa làti da ma-paihikungu da pa-patàka-nggunggai, tàka nahàmu-mapa ka àmbu kutuha la huratu yiana. Ku-monungu la pamai pa-tadalu-kai dàngu ka peku panii daa wiki-nggunggai, ka da-nggaüru langatàka da etinda.

¹³Da anana na angumu kawini na papindi-mbuna i Ala,[3] da pangàndi-nggau nyumu lii malangu Ràmbu.