Read Kambera PABOWANGU 1 Bible Online

PABOWANGU 1 - Kambera bible

PABOWANGU 1

¹Na ihina yiana na mbuku jiaha jàka nggàraha da pa-pawuwa-na i Yehu Karitu rukuda napa da matumbu - matumbu. I Ala napeka-nya i Karitu, ka na-paita-nja da atana i Ala jàka nggàraha tiangu da madedi. I Karitu na-paràhangu papalewa-na lai Yuhani atana, ka napeka-nya nyuna nuda da matumbu - matumbu.

²Ka wàlahu-nanjaka paraïna i Yuhani mbuu ndàbada da paitana; dàngu yiada-haka da pa-patàka-na na ngera hupu liina i Ala, da pa-pakaràngi-na i Karitu la pahakahiina.

³Oha-naka na tau na mambaha-ya dàngu na marongu-ya na lii pa-wunangu la mbuku yiana hamanai na matundu-nya jàka nggàraya na pa-tulihu nu daa. Nadu ba nda na-mandai-apa napa padedi nuna mbuu ndàbana.

⁴Angu dedi maninggai la pihu mbua kabungguru la tana Ahia! Nyungga, Yuhani, ku-monungu ka nawua juanggai kanyuru dàngu mànjaku nyimi mbuu ndàbami paraïna i Ala — ni Nyuna na maninya, na mambàda ninya dàngu na mahili ni pangalanya — dàngu welingu la pihu ngahu da maninja la hangga kanjàka-na i Ala,

⁵dàngu welingu lai Yehu Karitu, na hakahii na ma-tuturu. Nyuna na ma-kawunga hadangu paluri beli welingu la meti dàngu Nyuna-maka na ma-kuaha-ha da hanganji la pinu tana. I Yehu nambuha-nda, dàngu ruku metina Nyuna na-pahàla-ta welingu la nja - njalandaka,

⁶dàngu hi natuta nyuta hau banjaru ratu - ratu paleha la palumu-nya i Ala, na Amana. I Yehu Karitu nuna-duka na ma-bokulu dàngu na ma-kuaha lundu nu - nu. Amingu!

⁷Tàngaru, nàmunya Nyuna ba na palumburunya karumangu! Mbuu ndàbana na tau napa naita hàlaya Nyuna, lupa nyudambu da mambàda haronjaku-ya. Mbuu ndàbana na banjaru la pinu tana napa da-padudurungu lumuna Nyuna. Deningu-mana, ma-langatàka-ya! Amingu!

⁸“Nyungga ma-wungangu dàngu mamalamiri,” wàna i Miri Ala, na maninya, na mambàda ninya, dàngu na mahilu ni pangalanya, Mahupu-mbihaya.

⁹Nyungga Yuhani, angu dedimi na hama ndewa hama urami la pa-pàdangu mayila, na pahunggu-na nimbihu-na na makiku-nya i Karitu. Nyuta ka ta-patoru-nya la pa-handepa-ya ma ba mangu-dunanda. Nyungga pawàrunguka la nuha Pàtumu, nadu ba ku-bobaru-ya na hupu liina i Ala, na pa-pakaràngi-na i Yehu, ba nawàngu pa-hakahii-nya.

¹⁰La loduna i Miri, nyungga naharua-ka paraïna Ngahuna i Ala, ka rongu-nggunyaka talia lii ma-pakodungu — ba hama tuna lingu taropitu-ya — na kareuku la kajia-nggu.

¹¹Na talia lii nuna napanii, “Tulihu-ya jàka nggàraya na paita-mu, dàngu kau pangàndi-nja na mbukuna la pihu mbua kabungguru, yiada da ma-pandàkingu: Epihu, Hamiruna, Peranggamu, Tiatira, Haràndi, Pilandepia, dàngu Laündikia,” wàna.

¹²Ku-nggilaku la kajia-nggu, ka kuita-ya jàka nggamuya na mapanii dàngga, wànggu. Ka ita-nggunjaka ba pihu mbunguda da tandai palita da pa-pandoi welingu la àmahu rara.

¹³La padua-da nuda da tandai palita na-ndolaku na haàtu ba hama tuna tauya. Nyuna napaki kalembi bokulu malai lundu la wihina. La kuruna napaki ndàbi kuru àmahu rara.

¹⁴Na lunggina nabara hama tuna wulu mbimbi, bara hama kambaya. Da wua matana hama tuna handaraku epiha;

¹⁵da wihina da-kareriku hama tuna wudu patunu. Na talia nggoruna hama kawoku wai harangi bokulu-ya.

¹⁶Na lima kawana-na na-katangu pihu mbua kandunu, dàngu welingu la ngaruna naluhu na hapungu hapanda dàka mbeli mbapa. Na matana na-kajilaku hama tuna mata lodu la harii mbila.

¹⁷Ba kuita-yaka nuna, ka njoru panggubu-nggunyaka la hanggana hama tuna tau metika. Tàka na-padambaku-ngga lima kawana-na, hi napanii, “Àmbu mangàdatu! Nyungga na ma-wungangu dàngu ma-malamiri.

¹⁸Nyungga-maka yia maluri! Mbàda meti-ngguka, tàka tàngaru, Nyungga luri-nggunyaka lundu nu - nu. Nyungga ma-kuaha-ya na meti, dàngu na pangia tau meti.[1]

¹⁹Jia ba tuna, tulihu-hawa mbuu ndàbada da paita-mu, nu jàka nggàraha da maninja nàhu, dàngu jàka nggàraha napa da manàmu-nja.

²⁰Yiada-haka da panda pingu rukuda da kandunu pihu mbua da paita-mu la lima kawana-nggu, dàngu rukuda da pihu tandai palita àmahu rara: Da pihu mbua kandunu jia-duhaka da papalewa pihu mbua kabungguru, tàka da pihu mbungu tandai palita jia-duhaka da pihu mbua kabungguru,” wàna.