Read Kambera PABOWANGU 10 Bible Online

PABOWANGU 10 - Kambera bible

PABOWANGU 10

¹Hàla ita-nggunyaka na haàtu na papalewa na ma-kaborangu welingu la awangu. Nyuna na-panggàbalu-nya karumangu dàngu na hau na kapuri na mawunjulinya na katiku-na. Na matana na-handaraku hama mata lodu, dàngu da wihina hama tuna na kambaniru epi.

²La limana ninya ba hauna na kuluru mbuku kudu na ma-tawàlahu. Na wihi kawana-na na-tunggulu la tehiku, tàka na wihi kalaina na-tunggulu la mara.

³Hàla hi nawara pa-kodungu hama na kaladaku-da da hinga. Ba nahàla-ka pawara nuna na papalewa, hema-danyaka da kanduruku ba pihuda ba dawàngu pandu - nduruda.

⁴Ba dalingu-ka nu da kanduruku ba pihuda, ka ku-tulihu-ya ba wàngguka làti, tàka rongu-nggunyai na lii welingu la awangu, “Kàpinja da papeka-da da kanduruku ba pihuda, àmbu tulihu-duha!” wàna.

⁵Hàla ita-nggunyaka na papalewa na ma-tunggulu la tehiku dàngu la mara, na-jakaru-nya na lima kawana-na la awangu.

⁶Hi nahara wànya na tamuna i Ala na maluri lundu nu - nu, na ma-padika-nya na awangu, na tana dàngu na tehiku lupa da mani - ninjaka nu daa. Nuna na papalewa napanii, “Na rehina nda pahili panedi-anyapa!

⁷Tàka jàka nahapui-ya na taropitu-na paraïna papalewa papihu wàda, palaku-nanyaka paraïna i Ala na pa-pakaka winina, hama tuna na pambàda peka-nanja da atana, nu ba hapajia-ha da wunangu,” wàna.

⁸Tunaka nu na lii na pambàda rongunggu welingu la awangu, hili peka-nanggai. Napanii, “Luawa kau pitiya na kuluru mbuku na ma-tawàlahu la limana na papalewa na matunggulu la tehiku dàngu la mara,” wàna.

⁹Ka lua-nggunyaka la papalewa nuna hi kukarai-ya ka nawua-ngganya nuna na kuluru kudu lai nyungga. Napanii, “Piti-yawa kau nganya. Napa daa la kambumu napaita, tàka la ngarumu nalàngga hama tuna manggaluwangu,” wàna.

¹⁰Ka piti-nggunyaka nuna na kuluru kudu welingu la limana hi kunganya. La ngarunggu ku-pàdanya hama tuna manggaluwangu, tàka ba ku-kawàluku-nyaka, daa la kambu paita-nanyaka.

¹¹Tunaka wua-nanggaka lii pareta, “Hili bobaru-kiya na liina i Ala rukuda da banjaru, da paraingu, da hilu dàngu da hanganji,” wàna, wàmu.