Read Kambera PABOWANGU 11 Bible Online

PABOWANGU 11 - Kambera bible

PABOWANGU 11

¹Hàlaka patuna nu nawua-ngga nyungga ba ha-kadipu-na na ai tika papahama dàngu tokungu pa-hukutu wàngu, hi dawuangga lii pareta, “Luawa kau hukutu-ya na Uma Ala dàngu na ngia pawotu maraku. Dihaya jàka pira danguna na tau na ma-lumungu nu daa.

²Tàka màtangu pa-hukutu-ya na talora la liu Uma Ala, nadu la ngabana nuna ba pambàda pa-wuangu-haka da tau da manda tandaya i Miri. Napa nyuda da-kalijaku-nya na paraingu matua lundu patu kambulu dàmbu wulangu mandaina.

³Napa Nyungga ku-paràha-nja da hakahii-nggu da tau madua da mapaki paki hawina, dàngu nyuda napa dapakadanya na liina i Ala 1260-ya lodu mandaina,” wàna.

⁴Da hakahii madua jia-duhaka da dua reti pingi haitungu dàngu da dua mbungu tandai palita da maninja la hanggana i Miri pa-nggubulu awangu.

⁵Jàka ningu tau ma-kamangu pawuku-ya na manda hàmu lai nyuda, napa naluhu na epi welingu la ngaruda na ma-patàlaru-ha da muhuda. Ruku matungu nu, ba pameti-ya napa mbuu ndàbana na tau na ma-mbuhangu pa-pahundaka-ha nyuda.

⁶Nyuda ningu kuaha-da la pa-ràpitu-ya na awangu ka àmbu napuru na urangu ba talànga pakada-danya na lii langu welingu lai Ala. Ningumbu kuaha-da nyuda la mbuu ndàba matawai, la pa-pambeli-ha wai ria. Dàngu ningumbu kuaha-da nyuda la pa-làndahu-nya na pinu tana wàngu manjurangu hangia - hangia, pirangu bia jàka da-mbuhangu patuda nu.

⁷Ba dahàla-ka pa-panjàpu-ya la pabobaruya na lii languda, na banda na maluhu welingu la rokapu meti napa nalawa-nja nyuda.

⁸Dàngu napa da metida nyuda da-taneparu la ànda bokulu, la parai bokulu, la ngia pa-harika-nya na Mirida. Na tamu pamenjangu-na nuna na paraingu, jia-duyaka la Hondumu jàka ndia la Mehiru.

⁹Da tau welingu la mbuu ndàba nanggara, la kabihu, la hilu, dàngu la banjaru, napa daita-ha da metida tailu ha-kawita loduda mandaina, dàngu nda pa-pahiangu-a la patani-nja nuda da metida.

¹⁰Na ma-mandapu la pinu tana napa nggaüru-danyaka nu ba dameti nuda da tau madua hakahii. Napa nyuda dambabunya, hi da-kawàra pa-ngàndingu pawua juangu-da, nadu da wunangu tau madua nuda, lalu dangu-manaka na mayila na pa-patàka-danya na tau la pinu tana.

¹¹Pa-làngangu-ka tailu mbua lodu hakawita tàka-nanyaka na ngahu luri welingu lai Ala na matama-nja nuda da wunangu tau madua. Hadangu-danyaka hi da-ndolaku, hi lupa na-mangàdatu hàla na tau na mangita-ha.

¹²Tunaka nu nuda da wunangu tau madua rongu-danyaka wara pa-kodungu mapaau-nja nyuda welingu la awangu, “Mai heikai yiahu!” wàdanja. Hàla la hangga matada da muhuda, hei-danyaka la awangu, ba na-palàmbaru-nja karumangu.

¹³Nu la rehina nuna tungu-nanyaka na upungu manda najaru. Na ha-kawàri hakambulu-na nuna na paraingu làjaru-nanyaka, dàngu pihu rataya na tau na mameti rukuna nuna na upungu. Da tau hawiangu lalu mangàdatu-ha, ka wotu-danyaka i Ala na ma-bokulu la awangu.

¹⁴Na manjurangu na padua wàda, làpahu-nanyaka. Tàka tàngaru! Na manjurangu na patailu wàna tiangu-ki tàka-nanyaka.

¹⁵Hàla na papalewa na papihu wàda hapui-nanyaka na taropitu-na, hi ronguya la awangu na talia lii ma-pawàndingu na mapanii, “Na kuaha la pa-pareta-ya na pinu tana nàhu ninyaka la limana na Mirinda dàngu la Hanganji Pamànangu na paràndi-na. Napa Nyuna na-pareta lundu nu - nu!” wàna.

¹⁶Nu da madua kambulu patuda da liku uru da ma-mandapu la kanjàka-da la hanggana i Ala, maràbaku-danyaka ba da-marubuku-nya i Ala.

¹⁷Hi dapanii, “Miri, Ala Mahupu-mbiha, na maninya dàngu na mambàda ninya! Ma-pamalangu-nggau Nyumu nadu bau wànyaka na kuaha bokulu-mu, dàngu ba pakirungu-munyaka pa-pareta!

¹⁸Da tau da manda tandaya i Miri, da-pakalulukungu nadu ba jia-yaka na rehimu Miri bau huburu-nya na hànggamu, dàngu ba jia-mbuyaka na rehina bau patanda-nja wai ngerada da tau meti. Yiana rehi-nanyaka bau wuanja wundada da atamu, ba hapajia-ha da wunangu, dàngu mbuu ndàbana na banjaru-mu, nu na tau mbuu ndàbana na malumu-nggau Nyumu, ka ma-matua ka anakeda-yakai. Yiana rehi-nanyaka la pa-palàjaru-ha da tau da ma-palàjaru-ya na pinu tana!” wàda.

¹⁹Ka tabunggahu-nanyaka na Uma Ala la awangu, dàngu ka wuwa-nanyaka na Pàti Pa-ràndingu nu daa. Ka tungu-nanyaka na kabilaku na ma-pahimbu hàmburungu dàngu na lingu kanduruku na mandu - nduruna dàngu na mata - tàrana, màlai na upungu dàngu na ura watu.