Read Kambera PABOWANGU 12 Bible Online

PABOWANGU 12 - Kambera bible

PABOWANGU 12

¹Hàla hi itaya la awangu hangia-na na pa-hangàtarungu dàngu na mahau hadana. Na haàtu kawini na mapaki mata lodu ba beri paki-nanya, dàngu ndolaku-na la pinu wulangu. La katiku-na ninya hauna na tubuku àmahu rara na maningu kandunungu hakambulu dàmbu.

²Na kawini nuna pa-anakedangu-nanya, tàka ba jia-mayaka na rehina la pa-habola, ka kaladaku-duna-nyaka paraï pakatiu.

³Hàla paita-mbuya la awangu na hangia na pa-hangàtarungu. Ninya heuna na ularu nangga na mambana bokulu-na, na maningu pihu katikungu dàngu kadu hakambulu. Nimbihuda da katiku-na ningu tubuku-da.

⁴Nawànya na kikuna na-ruruhu-ha ba ha-kawàri tailuda da kandunu la awangu hi na-kawuka-nja la pinu tana. Nuna na ularu nangga na-ndolaku la hanggana na kawini na ma-patikingu pa-habola, na pawuku-na ka ku-kawàluku-nya na anana wàna jàka nadedika.

⁵Hàla nuna na kawini habola-nanyaka na haàtu na anakeda mini, na ma-pareta-ya napa mbuu ndàbana na banjaru ba nawàngu tokungu bàhi. Ba tuna na anakeda nuna pawàhi-ya welingu la tau kawini, hàla hi ngàndiya lai Ala la hangga kanjàka-na.

⁶Ka palai-nanyaka na kawini nuna la maràda telangu, na pa-ngiangu na pambàda payema-nanya paraïna i Ala. Hi kulipu-ya lai nu 1260 lodu mandaina.

⁷Ka tumbu-nanyaka na pabera la awangu. I Mikayilu dàngu da papalewa-naka da-pahànjalu dànya na ularu nangga, na ularu nanggambu dandula-ya paraï da papalewa-na, ba da-pahànjalu dànya i Mikayilu.

⁸Tàka nuna na ularu nangga pa-pakàku-ya. Nyuna dàngu da papalewa-naka nda papahiangu-ahapa pa-ngiangu la awangu.

⁹Nuna na ularu nangga bokulu pa-kawukangu-yaka la hambeli! Nyuna jia-duyaka na ularu kaweda, i Kambàliku jàka ndia i Wàndi Akatu, ba wàdanya tamuna, na ma-panyonga-ya na pinu tana nggubulu-na. Nyuna pa-wàrungu-yaka la pinu tana dàngu mbuu ndàbada da papalewa-na.

¹⁰Hàla hi kurongu-ya na talia lii na mawara pa-kodungu la awangu, “Nàhu rehi-naka i Ala ba na-pamàna-nya na banjaru-na! Nàhu i Ala pa-jiliku-nanyaka na kuaha-na ba Hanganji-ya! Nàhu na Hanganji Pa-mànangu na paràndi pa-jiliku-mana-nyaika duna na kuaha-na! Nadu na makàli kàlaha da angu dedinda la hanggana i Ala lodu rudungu, nàhu pa-paluhu-yaka welingu la awangu.

¹¹Datalu-yaka nyuna paraï da angu dedinda, datalu wànya wai riana na Ana Mbimbi, dàngu na lii ma-deningu welingu lai Ala na pa-bobaru-da. Da-mbuhangu-ma duda pa-yàmihu-ya na lurida lundu metida.

¹²Jia ba tuna, màtawa la awangu dàngu mbuu ndàbana na mangia-nya, ka da-hawola mbaha eti! Tàka manjurangu-nanyaka la pinu tana dàngu la tehiku, nadu i Kambàliku ba puru-nanyaka lai nyumu ba nawàngu mbeni mbana etina, nadu ba napi-dunya na rehina ba dànggitu-nanyaka,” na mawàna.

¹³La rehi nuna na ularu nangga ba napàda-nyaka ba pa-wàrungu-yaka nyuna la pinu tana, pakiringu-madua-nanyaka payaulu-ya na kawini na ma-paanangu anakeda mini.

¹⁴Tàka na kawini nuna pa-wuangu-ya dua mbàla wulu kàpa ranjawali bokulu, ka peku hawurungu-na la pangia-na la maràda telangu, lai nu hi kulipu-ya tailu mbua ndau ha-kawita, hi nahinggilu welingu la ularu nangga na makeha-nya.

¹⁵Na ularu nangga na-hawurutungu welingu la ngaruna kanjupu danguya na wai hanggangu la kawini nuna, la pa-pamili-ya.

¹⁶Tàka na pinu tana natula-nya nuna na tau kawini; na pinu tana na-hanganga hi nakawàlukunya na wai na maluhu welingu la ngaruna na ularu nangga.

¹⁷Kanjupu karaü-ya na etina na ularu nangga la tau kawini, hi nalua ningu pa-hànjalu-ha hawiangu da wàla wuana na tau kawini, nu mbuu ndàbada da tau da mamanundu la pareta - pareta-na i Ala, dàngu na ma-hakahii-nya na rukuna i Yehu dàngu na kuaha-na.

¹⁸Hàla ndolaku-nanyaka na ularu nangga nuna[6] la hingi tehiku.