Read Kambera PABOWANGU 13 Bible Online

PABOWANGU 13 - Kambera bible

PABOWANGU 13

¹Tunaka nu ita-nggunyaka na heu na banda na ma-mumuku welingu la tehiku. Nyuna ningu hakambulu-da da kaduna hi pihuda da katiku-na. La hapungu - hapungu kaduna ningu hau tubuku, dàngu la nimbihu katiku-na ningu tamu pa-tulihu ma-paaka-nya i Ala.

²Nuna na banda paita-nggu na hadana hama mahangu kadutulu-ya, da wihina hama wihi mbaruangu, tàka na ngorana hama ngora hingaya. Hàla na banda nuna nawua-nya paraïna ularu nangga na kapàru wikina, dàngu na kanjàka-na, dàngu na kuaha-na na ma-bokulu.

³Na hau katiku welingu la mapihu-da nuna na banda hama tuna ma-manua mandàkangu-ya ba itaya, tàka na manua-na nalànga-ka. Na pinu tana nggubulu-na dakiku-nya nuna na banda dàngu da maratangu-nya.

⁴Dàngu dalumu-nya nuna na ularu nangga ba nawua-nya na kuaha-na nuna na banda. Dàngu dalumu-mbunya nuna na banda. Dapanii, “Nda ningu hamana na banda nuna! Nda ningua mamàka pa-pabera dànya palawa-nya nyuna!” wàda.

⁵Na banda nuna pa-pulingu-ya pawunda hangia - hangia ma-katadaku dàngu ma-paaka-nya i Ala. Nyuna papuli-nya pa-pareta patu kambulu dàmbu wulangu mandaina.

⁶Hàla pakiringu-nanyaka pa-paaka-nya i Ala, dàngu na tamuna i Ala. Hamanai na ngia pa-ngiangu-na i Ala, dàngu mbuu ndàbada da ma-ngiangu la awangu-mbu na-paaka-nja.

⁷Nyuna pa-pahiangu-mbuya la palawa-nya na banjaru-na i Ala dàngu la patalu-ya. Dàngu la pa-kuaha-ya mbuu ndàbana na kabihu, na nanggara, na hilu, dàngu na banjaru pa-wuangu-mbuya lai nyuna.

⁸Na banda nuna na-marubuku ndàbanya napa parai tau la pinu tana, hinggilu-da da tau da mambàda ningu tamuda ba ndedi padika-nya na pinu tana, nu da pa-tulihu daa la mbuku tau luri manguna na Ana Mbimbi na pambàda hambàli.

⁹Jia ba tuna, jàka iduluku-du pa-patingingu, patingi-nyawa yiana na lii langu:

¹⁰“Na tau na pawuku ka na-tanawangu, jiangu ba tanawanya. Na tau na pawuku ka nameti la hapanda, jiangu ba pameti wànya hapanda. Nunaya na pakiri-na hi lupa na-torungu dàngu na-tuturu-ma bàdi na banjaru-na i Ala,” wàna.

¹¹Hàla ita-nggunyaka na hili heu banda na ma-mumuku welingu la tana. Nyuna ningu dua mbunguda da kaduna hama kadu ana mbimbi. Na talia nggoru-na hama talia nggoru ularu nanggaya.

¹²La hanggana nuna na banda na ma-wungangu nawàngu kuaha bokulu-na na pangala-na welingu la banda nunamai. Nggubulu-na na pinu tana dàngu na mangia-nya na-pambana-ha la pa-marubuku-nya na banda na ma-wungangu, na ma-manua mandàkangu na mambàda lànga.

¹³Na banda padua wàda natuu pa-hangàtarungu da manda najaru. La hanggana mbuu ndàbana na tau nyuna na-papuru-nya la pinu tana na epi welingu la awangu.

¹⁴Dàngu mbuu ndàbana na tau na maluri la pinu tana na-panyonga wànya pa-hangàtarungu da pawunda-na la hangga banda na ma-wungangu. Dàngu nyuda mbuu ndàbada na-paràha-nja pa-pahada-nya kahala hadana na banda na mambàda manua la hapanda, tàka ba daingu luri biana.

¹⁵Na banda na padua wàda pa-pahiangu-ya patunya kayeku luri nuna na kahala hada, hi lupa napingu pakareuku dàngu hi na-pameti hàlaya na tau na manda bihu palumu-nya.

¹⁶Mbuu ndàbana na tau, ma-matua anakeda, mawulu mamila, ata kabihu, na-pambana-ha paraïna banda la pakei tanda la lima kawana-da jàka ndia la kaba matada.

¹⁷Nda haàtu ndoku ma-ngalangu pakei jàka ndia pa-danggangu ngga - nggàra, jàka nda ningu lai nyuna tanda tungu nu, nu na tamuna na banda, jàka ndia tanda diha ma-pawuwa-ya na tamuna nuna na banda.

¹⁸Lai yiahu ningu-maka bàdi pamàhi wàngu. Na tau na ma-manggàna napingu padihaya na tanda dihana na tamuna nuna na banda, nadu na tanda diha nuna ba tamu tauya. Na tanda diha jiaya na 666-ya.