Read Kambera PABOWANGU 14 Bible Online

PABOWANGU 14 - Kambera bible

PABOWANGU 14

¹Tunaka nu hi ku-tàngaru, ka wuwa-nanyaka na Ana Mbimbi ba na-ndolaku dita la Tandula Hiungu. Da karia-na Nyuna ninja da tau 144.000-ya, na maningu tulihungu la kaba matada na tamuna Nyuna dàngu na tamuna na Amana.

²Hàla kurongu lii welingu la awangu na ma-kawoku hama tuna na wai harangi bokulu-ya dàngu hama tuna na lingu kanduruku manda najaru-ya. Na lii nuna hama tuna lingu malingu pambabu wànguya welingu la majungga da ma-kàritu junggada.

³La hangga kanjàka hanganji dàngu da dika banda da mapatu-da hamanai ba hapajia-ha da liku uru la winggiru-na na kanjàka, da tau 144.000 wunda-danyaka ludu bidi. Na ludu nuna nda peku ajaru-ananya tau hawiangu mbulungu nyuda-a da tau 144.000 da pambàda pahàla welingu la pinu tana.

⁴Nyuda jiaha da tau da ma-padaingu pa-yahangu, hama tuna na kawini na mandedi pingu mini, nadu nyuda ba nda da-angungu-a kawini duda. Nyuda da matundu mànunya na Ana Mbimbi la nggi bia nalaku ningu. Welingu la nggubulu dedi tau jia-haka nyuda da pa-pahàla, ma ba maraku kawunga wua-duhaka nyuda lai Ala dàngu la Ana Mbimbi.

⁵Nda da-handàkangu-ma duda pa-kambàliku; dàngu nda ningu ndokuma duda nyurada.

⁶Hàla ita-nggunyaka na hili haàtu papalewa, na ma-hawuru pa-janggangu la awangu. Na papalewa nuna ngàndi-nanya lii rukuna na Lii Mànangu na ma-palupangu la pa-patàka-nya na tau la pinu tana nu mbuu ndàbana na banjaru, kabihu, hilu dàngu nanggara.

⁷Nuna na papalewa nawara pakodungu, “Mangàdatu-nyawa i Ala, dàngu wotunya na bokulu-na! Nadu ba rehi-naka i Ala ba na-patanda-nya ngerana na tau. Marubuku-nya Nyuna na ma-padika-nya na awangu, na tana, na tehiku dàngu mbuu ndàbada da matawai!” wàna.

⁸Na papalewa na padua wàda nandutu-ya na ma-wungangu, ba dàngu warana, “Nahanggubalu-ka! Na paraingu Mbambilu bokulu na-hanggubalu-ka! Mbàda pawiti-nanyaka mbuu ndàbana na banjaru la pa-maüku wàngu wai angguru — nu da angguru ruku itirungu-na pa-njuraku!” wàna.

⁹Na haàtu na papalewa na patailu wàda nandutuha nuda da madua papalewa, ba dàngu wara pa-kodungu-na, “Na tau na malumu-nya nuna na banda dàngu na kahala hadana, dàngu na maningu tanda bandangu la kaba matana jàka ndia la limana,

¹⁰na tau nuna naunu-nya napa na wai angguru-na i Ala, nu na wai angguru hànggana, na pambàda burina la kanaina, ba nda na-pakura-manya ana hakudu! Mbuu ndàbada da tau nuda napa jia-haka da pa-mayila wàngu epi dàngu tanalira la hanggada da papalewa matua dàngu la hanggana na Ana Mbimbi.

¹¹Na kutuna na epi na papamayila wànguha nuda da tau napa na-kapulingu panga - ngalangu lundu nu - nu. Lodu rudungu nda ninya na pànjangu la pa-pajàra-ha, nu da tau da malumu-nya nuna na banda dàngu na kahala hadana, lupa mbuu ndàbana na tau na maningu tanda tamuna nuna na banda,” wàna.

¹²La ngerana yiana na banjaru-na i Ala na ma-manundu la pareta - pareta-na i Ala dàngu na ma-tuturu lai Yehu, da-patorungu-maka bàdi.

¹³Hàla rongu-nggunyaka lii welingu la awangu na mapanii, “Tulihu-yawa yiana: Piti welingu nàhu, oha-adaka da tau da mameti ba dàngu lumu-danya i Miri!” wàna. “Deningu!” wàna na Ngahuna i Ala. “Nyuda napa pànjangu-danyaka paràma pa-mbangatungu, nadu na ruku lumungu-da napa ba karia mànu-madanja,” wàna.

¹⁴Tunaka nu hi ku-tàngaru, ka wuwananyaka na hau na karumangu mabara. Nu dita la pinu karumangu ninya na ma-mandapu na mahama tauya ba itaya. La katiku-na ninya na tubuku àmahu rara, dàngu la limana ninya ba hapungu-na na kahidi ketu na madàka.

¹⁵Tunaka nu na papalewa haàtu luhu-nanyaka welingu la Uma Ala. Wàngu pa-kodungu-na nawara-nya Nyuna na ma-mandapu la pinu karumangu, “Payalu-nyawa na ketumu, dàngu mutiwa nu, nadu ba jia-mayaka na rehi muti; na pinu tana rara-mana-nyaka la pamuti-ya!” wàna.

¹⁶Hàla Nyuna na ma-mandapu la pinu karumangu payalu-nanyaka na ketuna, ka muti-nanyaka na pinu tana.

¹⁷Tunaka nu hilu ita-nggunyaka na papalewa haàtu na maluhu welingu la Uma Ala la awangu. Nyunambu na-katangu hapungu kahidi ketu madàka.

¹⁸Hàlaka nu, na hili haàtu na papalewa, na ma-kuaha-ya na epi, namaiya welingu la ngia pawotu maraku. Dàngu pa-kodungu-na nawara-nya na papalewa na ma-katangu ketu dàka, “Payalu-nya na ketumu, kau kàtahu-ha da wua pingi angguru la pinu tana, nadu da wua angguru ba rara-mada-nyaka!” wàna.

¹⁹Nuna na papalewa na-payalu-nya na ketuna la pinu tana, ka kàtahu-nanjaka da wua angguru la pingida, hàla ndauha-nanjaka daa la ngia papohu wai angguru hànggana i Ala na mambinu lembaru.

²⁰Nuda da wua angguru papohu la hambeli paraingu-ha, dàngu welingu la ngia papohu njànjaru-danyaka da wai ria hama tuna luku, tailu ngahu kilu-metiru-na na marauna, dàngu tika padambu metiru manjolungu-na.