Read Kambera PABOWANGU 15 Bible Online

PABOWANGU 15 - Kambera bible

PABOWANGU 15

¹Tunaka nu nyungga ku-itangu la awangu ninya hangia-na na pa-hangàtarungu dàngu na manda uku mbana mbàringu-na. Ninja ba tau mapihu-ha da papalewa dàngu ba pihuda da manjurangu hupu njàpuna. Yiana jia-yaka na hupu njàpuna na huburu-nanya na hànggana i Ala.

²Hàlaka nu itanggu-nyaka na hangia, na mahama tehiku kaninu pa-korungu epiya ba itaya. Kuita-mbuha da tau da mambàda taluya na banda dàngu kahala hadana, dàngu da matalu-ha da tau da maningu tanda dihana na tamuna na banda. Nuda da tau da matalu da-ndolaku la hingi tehiku kaninu dàngu katangu-da jungga pawua-nanja paraïna i Ala.

³Dàngu ludu-danjaka da luduna i Muha, atana i Ala, dàngu luduna na Ana Mbimbi. Tuna yia na linguna, “Ou Miri, Ala Mahupu-mbiha, nggiki bia-naka na bokulu-na dàngu ba hangàtaru-nja da paraï paruku-mu! Ou Hanganji-na mbuu ndàbana na banjaru,[7] nggiki bia-naka na tànji dàngu na deningu-da da pawunda-mu!

⁴Nggamu na manda mangàdatu-nggau, Miri? Nggamu na manda bihu pa-bobaru-ya na mangunju-mu? Nyumu meha-a ma-matua. Mbuu ndàbada da banjaru napa damai pa-marubuku-nggau Nyumu nadu ba mbàda ita hàla-dahaka paraï mbuu ndàbana na tau da pawunda-mu da matànji,” wàda.

⁵Hàlaka nu nyungga ita-nggunyaka na Umana i Miri la awangu ba na-tabunggahu, dàngu na Maü Terana i Miri ninya daa.

⁶Hàla da pihu papalewa dàngu da pihu manjurangu luhu-danyaka welingu la Uma Ala. Da pakida tera linangu ili dàngu kalilangu-ha. Nyuda ningu ndàbi kuruda welingu la àmahu rara.

⁷Tunaka nu na heu welingu la banda da mapatu-da dawua-nja da papalewa mapihu nuda pihu kanai welingu la àmahu rara da mambinu wàngu hànggana i Ala, — na Ala na maluri lundu nu - nu.

⁸Nuna na Umana i Ala mbinu wàngu-nanyaka kutungu maluhu welingu la mangunju-na dàngu la kuaha-na i Ala. Dàngu ngala mandaida da manjurangu pangàndi-da da pihu papalewa ba ndedi danjàpu, nda hili ningu ndoku haàtu mapeku patama daa la Umana i Ala.