Read Kambera PABOWANGU 16 Bible Online

PABOWANGU 16 - Kambera bible

PABOWANGU 16

¹Hàla nyungga rongu-nggunyaka talia lii ma-bokulu weli dalungu la Umana i Ala na mapanii-nja da pihu papalewa, “Lakuwa kai huburu-nja da ihida ba pihu mbuada da kanai hànggana i Ala la pinu tana!” wàna.

²Na papalewa wungangu lua-nanyaka hi na-huburu-nya na ihina na kanaingu la pinu tana. Ka tumbu-danyaka da manggàri da mambana dàngu da malalu hanggàri-da la mbuu ndàbana na tau na maningu tanda bandangu, dàngu da tau da ma-marubuku-nya na kahala hadana.

³Hàlaka nu na papalewa na padua wàda, huburu-nanyaka na ihi kanaingu-na la tehiku. Ka hama wai ria tau meti-yaka na wai tehiku, dàngu ka meti-danyaka mbuu ndàbada da dika da maluri la tehiku.

⁴Tunaka nu na papalewa na patailu wàda huburu-nanyaka na ihi kanaingu-na la luku - luku dàngu la matawai - matawai, ka dedi hàla-nanyaka wai ria.

⁵Kurongu-ya na papalewa na ma-kuaha-ya na wai ba napanii, “Na hukungu na papuha-mu na-padeningu, dou Mahupu-matua, Ala maninggau, dàngu mambàda ninggau!

⁶Nyuda mbàda buu-danjaka da wai riada da banjaru-na i Ala dàngu da wai riada da wunangu; nàhu Nyumu paunu-munjaka wai ria nyuda. Na-jàngapu-maka nu lai nyuda!” wàna.

⁷Hàla rongu-nggunyaka talia lii welingu la ngia pawotu maraku, na mapanii, “Miri, Ala Mahupu-mbiha, da-deningu dàngu datànji da hukungu da papuha-mu!” wàna.

⁸Hàlaka nu na papalewa na papatu wàda, huburu-nanyaka na ihi kanaingu-na la mata lodu, ka puli-nanyaka na mata lodu la papakehiya na tau wànya na mbanana na ma-mbàringu.

⁹Na tau na-pakehi wànya mbanana na ma-mbàringu, tàka nyuda daràtu-nya na tamuna i Ala, na ma-kuaha-ha da manjurangu. Jiapa ka tuna nu, nda dabihu-a nyuda papanjilungu welingu la nja - njalada dàngu nda dabihu pawotu-nya na mangunju-na i Ala.

¹⁰Hàla na papalewa na palima wàda huburu-nanyaka na ihi kanaingu-na la kanjàka-na na banda nuna. Ka kapàtangu hàla-nanyaka na ngia pa-pareta-na na banda nuna, na tau nakati làmana paraï pakatiu.

¹¹Hàla ràtu-danyaka i Ala la awangu paraï pahidu dàngu paraï da manggàri-da. Tàka jiamaya ba nda da-panjilungu welingu la paruku - parukuda da ma-akatu.

¹²Hàlaka nu na papalewa panomu wàda, huburu-nanyaka na ihi kanaingu-na la Luku bokulu Epuràtu. Ka mihi-nanyaka na luku nuna hi lupa dalaku li ningu da hanganji welingu la pahunga lodu.

¹³Hàla nyungga ita-nggunjaka ba tailuda da wàndi akatu, na hadada hama kapaki-ha. Nimbihu-da da kapaki daluhu welingu la ngaruna na ularu nangga, welingu la ngaruna na banda, dàngu welingu la ngaruna na wunangu kabàli.

¹⁴Nyuda jiaha da wàndi akatu da ma-patumbu pa-hangàta - pa-hangàtarungu. Nuda da wàndi akatu matailu dalua la mbuu ndàbada da hanganji - hanganji la nggubulu pinu tana hi da-pauhi-nja la pa-pahànjalungu la Lodu Bokulu, nu na Lodu welingu lai Ala Mahupu-mbiha.

¹⁵“Patingingu! Nyungga kutàka hama tuna ma-manganga! Oha-naka na tau na ma-rimangu mànu dàngu na ma-manggangu pakina, hi nda nalaku mangu kalulungu dàngu hi na-makia la hangga madangu!” wàna.

¹⁶Tunaka nu da wàndi nuda pauhi-danjaka da hanganji la pa-ngiangu na ma-tamungu Haramanggindongu la hilu Imbarani.

¹⁷Hàlaka nu na papalewa na papihu wàda huburu-nanyaka na ihi kanaingu-na la kuru awangu. Ka parongu-yaka na talia lii ma-hàdirungu welingu la kanjàka la Uma Ala, na mapanii, “Njàpu-nanyaka!” wàna.

¹⁸Ka tungu-nanyaka na kabilaku kabàla na ma-làndahu pahimbu hàmburungu dàngu na lingu kanduruku na mandu - nduruna dàngu na mabe - berina, lupa na upungu na manda najaru. Ndedi handàkangu patungu na upungu matungu nu kandai padika-nya na tau. Yiana-yaka na upungu na mahupu nda najaru!

¹⁹Na paraingu bokulu nuna nambera katailu ngiangu, dàngu làjaru-danyaka da paraingu la mbuu ndàba nanggara la pinu tana. Hàla nandi-nanyaka na parai bokulu Mbambilu paraïna i Ala. Tàka i Ala na paunu-nya wai angguru welingu la kanai angguru-na i Ala — nu na angguru hànggana na mambinu lembaru.

²⁰Mbuu ndàbada da nuha da-munangu, dàngu mbuu ndàbada da palindi-mbu da-molungu.

²¹Na ura watu bokulu, ba lima kambulu kiluda hau - hau, puru-nanyaka welingu la awangu na ma-pinjalu-nya na tau. Ka ràtu-danyaka i Ala rukuna na ura watu nuna na manda najaru.