Read Kambera PABOWANGU 18 Bible Online

PABOWANGU 18 - Kambera bible

PABOWANGU 18

¹Hàlaka nu ita-nggunyaka na hili haàtu na papalewa na mapuru welingu la awangu. Nyuna ningu kuaha bokulu-na, dàngu na handaraku-na na-pahambila hàlanya na pinu tana nggubulu-na.

²Nawara pakodungu, “Na-hanggubalu-ka! Na parai Mbambilu bokulu na-hanggubalu-ka! Nàhu pangia-da da wàndi kambàliku dàngu da wàndi akatu-kiaka. Lai nu ngia paluri-da màtu - màtu mahawurungu ma-iraku, dàngu da panda mbuha tau.

³Nadu mbuu ndàbada da banjaru ba mbàda unungu-daka angguru-na na itirungu njuraku-na. Da hanganji pinu tana da-njuraku dànya nyuna, da mini danggangu la pinu tana, dawulu wànguka paraï ruku itirungu-na na panda roputu ndoku,” wàna wàmu.

⁴Hàla rongu-nggunyaka hili hau talia lii welingu la awangu na mapanii, “Luhuwa dimi, banjaru-nggu! Luhuwa weli dalungu! Àmbi tundu-dunja da njalana, tàka hi huku papohu-nggai!

⁵Da njalana da-pabundungu-ka lupa la awangu, dàngu i Ala nda na-maromba-anya na akatu-na.

⁶Timinya numai duna hama tuna ba tunanggai nu nyimi; himbalu pandua wundanya ndumana mbuu ndàbada da paruku-na lai nyimi. Paihi-nya na kabana pandua hama danguna na pa-unungu marihi mbangatu welingu la pa-unungu na pa-payema-nanggai nyimi.

⁷Wuanya nyuna mayila dàngu handuka pahama daanya na bokulu dàngu na mbokaru na pawua-nanya na tàda ihi wikina. Nadu ba nakàli paninya na wikina, ‘Nyungga yia hanganji kawini ma-pareta-ka! Nyungga nda kawini meti lei-aka; nda jia hunggu-anggu napa pa-hawina wàngu!’ wàna.

⁸Rukuna nuna-duka, hi la hau lodu jua-a napa ba na-handepa ma-manjurangu — panyaki, hawina, dàngu rimbangu. Dàngu nyuna napa kàrangu-nanyaka la epi, nadu ba ma-kuaha-ya duna i Miri Ala na ma-patanda-nya ngerana,” wàna.

⁹Da hanganji la pinu tana da mapanamatunja da pawunda-na dàngu na itirungu-na nuna na kawini, napa dahii dàngu da-paduduru-nya nuna na paraingu, jàka daita-yaka ba na-kahuluku na kutu epi na ma-pakàra-nya.

¹⁰Napa nyuda da-ndolaku marau, nadu ba da-mangàdatu napa napala-du na mayila-na. Dapanii, “Ai a-ai, manda najaru-ya na manjurangu-na yiana na paraingu mahunga tamuna — na paraingu Mbambilu na ma-kapingatu! La dalu hau njàmu jua-a ba pahàra-nya na hukungu-mu!” wàda.

¹¹Ba hapajia-ha da tau danggangu la pinu tanambu dahii dàngu da-hawina-nya nuna na kawini, nadu ba nda hili ningu-apa haàtu makeiha da malanja padangga-da.

¹²Nda ningu-apa makei àmahu marara, mabara, mata tawuru dàngu da mutiara-da; dàngumbu da tera linangu, da tera rara atu mitingu, da tera hàtingu, dàngu da tera rara kàtungu; da màtu - màtu ai na manda muda la pangala-nja, da malanja papandoi welingu nggedingu, dàngu welingu la ai mbotu wili, welingu la wudu, bàhi, dàngu wàtu màmaru;

¹³da tàda kaninggu, da rungu, da karanu, da muru,[8] dàngu da kaminyangu; da angguru dàngu da lonahu; da kanguta dàngu da uhu nggàndumu; da hapi dàngu da mbimbi, da njara dàngu da kareta, da ata, lupa na lurina na taumbu.

¹⁴Ba hapajia-ha da tau danggangu dapanii la kawini nuna, “Mbuu ndàbada da pambuha-mu ka kumangu-nja ba wàmu nda hilu ningu-apa, dàngu mbuu ndàbada da pa-mbokaru wàmu dàngu da pa-manandangu wàmu damauka. Ndau hili ita-ahapa!” wàdanya.

¹⁵Ba hapajia-ha da ma-danggangu da mambàda wulu wàngu ba da-danggangu la paraingu lai nu, napa ndolaku marau-danyaka, ba da-mangàdatu napa napala-du na mayila-na. Napa dahii dàngu da-hawina,

¹⁶hi dapanii, “Ai a-ai, manda najaru-ya na manjurangu-na yiana na paraingu mahunga tamuna! Làti ba nakàli paki tera linangu, tera rara atu mitingu dàngu tera rara atu; làti duna nawotu mbinu paki pa-pamanandangu wàngu àmahu rara, mata tawuru, dàngu mutiara!

¹⁷Tàka la dalu hau njàmu jua-a, handàka molungu-maada da pawuluna!” wàda. Mbuu ndàbada da anakonda kapalu, da tau mahei, dàngu da maràma la kapalu, hamanai mbuu ndàbana na tau na mahimbu lurina la tehiku, da-ndolaku marau.

¹⁸Hi da-kaladaku ba daita-yaka na-kutungu na ma-kahuluku welingu la epi na matunu-ya nuna na paraingu. Da-warangu, “Ndedi handàkangu paningu paraingu hamana na parai bokulu yiana!” wàda.

¹⁹Ka buri-danjaka aü da katiku-da tanda hawina-da, hàla hii-danyaka ba la - ladada, “Ai a-ai, manda najaru-ya na manjurangu-na na parai bokulu yiana! Rukuda da pawulu-na hi lupa dawulu mbuu ndàbada da tau da maningu kapalungu la tehiku! Tàka la dalu hau njàmu jua-a handàka molungu-maada mbuu ndàbada-ka!” wàda.

²⁰Ha awangu, hanggela hawola-wa rukuna na làjaru-na na paraingu yiana! Ha banjaruna i Ala, pa-pahurungu, dàngu wunangu - wunangu, hanggela hawola-wa! Nadu i Ala ba huku-nanyaka, ba jiaya na himbalu-da da paraï paruku-na hanggangu lai nyimi!

²¹Hàlaka nu na haàtu na papalewa na ma-kaborangu dendi-nanyaka na hau na watu — hama watu nggihu bokulu-ya — hi nakawukanya hu daa la tehiku, hi napanii, “Nuya na ngerana na paraingu Mbambilu mahunga tamuna yiana ba kawuka-nya hi lupa nda pahilu hungguya.

²²Dalingu-da da malingu pambabu wàngu la ma-pajulu wàngu jungga da mini ludu, da mahapui taleli dàngu da mahapui taropitu, nda pahili rongu-apa daa la kurumu! Nda tahili hàmburu-apa haàtu tau mapingu paràma lai nu, dàngu da lingu watu nggihu nda pahili rongu-ahapa.

²³Nda nahili ita-apa harii epi palita na tau daa la kurumu; dàngu nda pahili rongu-mbupa maremi pamaü papa lai nu. Da ma-danggangu-mu jia-mahaka da ma-pangora la pinu tana, dàngu bau wànja da kabeli matamu nyumu mu-panyonga-ya mbuu ndàbana na banjaru la pinu tana!” wàna.

²⁴Hi kiri hukunya na Mbambilu, jiaya ba mbàda ninjaka lai nu da wai riada da wunangu, riada da banjaru-na i Ala — kababa-na riada mbuu ndàbada da tau da pambàda pameti-da la pinu tana.