Read Kambera PABOWANGU 19 Bible Online

PABOWANGU 19 - Kambera bible

PABOWANGU 19

¹Hàlaka nu rongu-nggunyaka malingu hama tuna lingu kangguhuku tau danguya welingu la awangu na mawa - wara, “Wotunya i Ala! Na Alanda Ala mapamànanguya; Nyuna Ala ma-bokulu-ya dàngu ma-kuaha-ya!

²Na-patandangu-na ngera nadeningu dàngu nawàngu manggàna-na! Mbàda puha-nanyaka hukungu na ma-kajari bokulu, na ma-paruha-ya na pinu tana paraï kajari-na. I Ala nahuku-nyaka nuna na ma-kajari, nadu ba na-pameti-duhaka da atana i Ala,” wàna.

³Hàla na talia nggoru tau dangu hili wara-nanyai, “Wotunya i Ala! Na kutuna na epi na ma-pamutu-nya na paraingu bokulu napa na-kahuluku dàngu nda ana pànjangu-na!” wàna.

⁴Da liku uru da madua kambulu mapatu-da dàngu ba patuda da banda da ma-winggiru-nya na kanjàka maràbaku-danyaka hi damarubukunya i Ala, na ma-mandapu dita la kanjàka. Dapanii, “Amingu! Wotunya i Ala!” wàda.

⁵Hàla rongu-nggunyaka welingu la kanjàka na talia lii na mapanii, “Wotunya i Ala ha mbuu ndàbami atana i Ala, dàngu mbuu ndàba tau — ma-matua anakeda — ma-marubuku-nya i Ala!” wàna.

⁶Hàlaka nu kurongu-ya na mahama talia lii tau ma-pauhi kanjupu danguya na linguna hama lingu ngalingu mawura-ya dàngu hama tuna kanggurukuna na kanduruku-ya. Kurongu-ha nyuda ba dapanii, “Wotunya i Ala! Nadu i Miri, na Alanda na Mahupu-mbiha nàhu pareta-nanyaka!

⁷Màlawa ka ta-hanggela ka ta-hawola; màlawa ka tawotu-nya na bokulu-na! Nadu ba toma-nanyaka na rapa pamaü papana na ma-ngarangu Ana Mbimbi, dàngu na kawini bidi papana wai rehingu-mana-nyaka la panika.

⁸Da pakina da tera linangu kajilaku pa-wuangu-mayaka la pa-pakiya,” wàna. (Da paki tera linangu ba wàna jia-duhaka da mahàmu da paraï paruku-da da banjaru-na i Ala.)

⁹Hàla nuna na papalewa peka-nanggaka, “Tulihu-ya yiana: ‘Oha-anaka na tau na pa-dundangu la pamaü papana na Ana Mbimbi,’ ” wàna. Tunaka nu nuna na papalewa nahili nuaya, “Yiana lii ma-deningu welingu lai Alaya,” wàna.

¹⁰Ka maràbaku-nggunyaka la hanggana na papalewa la pa-marubuku-nya wànggu làti, tàka nyuna hi napaniingga: “Jàmangu! Àmbu marubuku-ngga nyungga, marubuku-nyawa i Ala! Nadu nyungga dàngu nyumu hama ata-manda dàngu hama tuna da angu dedimu da ma-pamàndu-nya na pa-hakahii-na i Yehu!” wàna. Nadu na pa-hakahii-na i Yehu jia-mayaka na ma-runuku-ha da tau da ma-pawunangu.

¹¹Tunaka nu kuita-ya na awangu ba na-tawanggahu, hi kuita-ya na heu na njara bara. Na tamuna na ma-kaliti-ya Na Ma-tuturu dàngu Na Ma-deningu-ya. Natànji-ma duna ba narata hukungu dàngu ba na-palaku-ya na pabera.

¹²Da matana da-handaraku hama tuna na roka epi dàngu la katiku-na dangu tubuku papaki-na. La wikina Nyuna ningu tamu pa-tulihu; tàka didi-aya Nyuna na mapinya nuna na tamu.

¹³Na kalembi bokulu papaki-na pambàda hàbu la wai ria-yaka. Dàngu jiaya “Na Puluna i Ala,” wàdanya.

¹⁴Na kanguhuru pabera la awangu dandàki-ya Nyuna ba dàngu kaliti-da njara bara, dàngu dapaki tera linangu mabara burahu.

¹⁵Welingu la ngaruna naluhu na hapungu na hapanda dàka dàngu jiaya na hapanda nuna-duka napa hi natalu-ha da banjaru, dàngu napa Nyuna na-pareta-ha nyuda ba nawànja tokungu bàhi. Napa Nyuna napohu angguru ba nawàngu papohu wàngu angguru hànggana i Ala Mahupu-mbiha.

¹⁶Nu la kalembi bokulu-na dàngu la winjuna pa-tulihu-ya na tamu tuna yia, “Hanganji mbutana na hanganjika, dàngu Miri mbutana na mirika,” wàna.

¹⁷Hàla kuita-ya na haàtu na papalewa na ma-ndolaku la pinu mata lodu. Ba nawàngu pa-pakodungu ba nawara-nja mbuu ndàbada da ma-hawurungu la kuru awangu, “Maiwa kai pauhi kai màtu la remi bokulu pa-patumbu-na i Ala!

¹⁸Maiwa kai nganja da tolu hanganji, da tolu ngora pabera, dàngu da tolu ma-kaborangu; maiwa kai nganja da toluda ba hapajia-ha da ma-kaliti njara dàngu toluda da njarada dàngu da toluda mbuu ndàbana na dedi tauka, ma-matua anakeda, ata kabihu!” wàna.

¹⁹Tunaka nu kuita-ya nuna na banda, dàngu da hanganji pinu tana dàngu da kanguhuru paberada, ba da pauhi la pa-pahànjalu dànya Nyuna na ma-kaliti njara bara dàngu na kanguhuru pabera-na.

²⁰Ka yàpa-danyaka nuna na banda dàngu na wunangu kabàli da mambàda tu pa-hangàtarungu la hanggana na banda. (Wànja nuda-duka da pa-hangàtarungu ba na-panyonga-ha da tau da maningu tanda bandangu dàngu da tau da malumu-nya nuna na kahala hadana na banda.) Hàla na banda dàngu na wunangu kabàli hi wàru kaluri-nja hu daa la tehiku na maroka kandalungu wàngu tana lira.

²¹Dàngu na kanguhuru pabera-da pa-pameti wànja hapanda na maluhu welingu la ngaruna na ma-kaliti njara bara. Ka mai-danyaka da ma-hawurungu ba dawàngu pa-rokangu ba danganja da toluda nuda da tau pa-pameti.