Read Kambera PABOWANGU 20 Bible Online

PABOWANGU 20 - Kambera bible

PABOWANGU 20

¹Hàlaka nu kuita-ya na haàtu na papalewa na mapuru welingu la awangu. La limana nakata-nya na kuhina na rokapu meti dàngu hi hauna na nggili bàhi bokulu.

²Hi nayàpa-ya na ularu nangga, na ularu kaweda — nu i Kambàliku jàka ndia i Wàndi Akatu, ba wàdanya — hi nahondu wànya nggili bàhi tungguna la harata ndaungu.

³Tunaka nu nuna na papalewa hi natòku-nya nuna na ularu nangga hu daa la rokapu meti, hàla hi nakuhi-ya nuna na rokapu hi natunya henggilu-na, ka àmbu ningu pekuna na ularu nangga nuna la pa-kahili-ha da banjaru ba ndedi nanjàpu na harata ndaungu. Hàlaka bàdi hi pahàla-ya ana hawutu.

⁴Hàla ita-nggunjaka da kanjàka pareta, tàka da tau da ma-mandapu-nja nuda da kanjàka pareta pa-wuangu kuaha-ha la parata hukungu. Kuita-mbuha da ndewada da tau pa-katiku paraï pa-hakahii-nya na rukuna i Yehu, dàngu ba da-bobaru-ya na lii langu welingu lai Ala. Da tau nuda nda da marubuku-anya na banda jàka ndia na kahala hadana. Nyuda nda da-handàkangu pakei tanda banda la kaba matada jàka ndia la limada. Nyuda daluri beli hi dakata dànya i Karitu la pa-pareta ba hanganji lundu harata ndaungu-ha.

⁵Yiana jia-duyaka na kawunga hadangu ba pahada belinya na tau meti. (Tàka da mameti hawiangu nda pa-paluri beli-aha la ngala rehi harata ndaungu.)

⁶Oha pàku-adaka da tau da pa-pahada kariangu nu la kawunga hadangu. Nyuda ràkana ba namangu-nja paraïna i Ala. Na meti na padua wàda nda na-kuaha-ahapa nyuda. Nyuda napa jia-haka da ratuna i Ala dàngu da ratuna i Karitu, nyuda napa da-pareta dànya Nyuna lundu harata ndaungu mandaina.

⁷Ba nanjàpu-ka na rehi harata ndaungu, pahàla-danyaka i Kambàliku welingu la okana,

⁸tàka napa nalaku pa-panyonga-ha da banjaru da ma-tanyalangu la nggubulu pinu tana, nu na Nggòku dàngu na Mangguku. Ka pauhi-nanjaka paraïna i Kambàliku la pa-pabera, ba kanjupu danguha, hamana na wara la hingi tehiku.

⁹Ka pa-biwangu-danyaka la nggubulu pinu tana, hi da-nggupulu-ya na ma-pamaü terangu-na na banjaruna i Ala dàngu na paraingu na pambuha-na i Ala. Ka puru-nanyaka na epi welingu la awangu hi na-pamolu-nja nyuda.

¹⁰Tunaka nu i Kambàliku na ma-panyonga-ha nyuda hi kawuka-nya hu daa la tehiku epi dàngu tana lira. Lai nu jia-yaka na pangia-na na banda dàngu na wunangu kabàli da pambàda wàru mangilungu. Pa-pamayila lodu rudungu-ha nyuda napa lundu nu - nu.

¹¹Hàlaka nu ita-nggunyaka na hau kanjàka pareta bara ma-bokulu dàngu Nyuna na ma-mandapu-nya nuna na kanjàka pareta. Na awangu dàngu na tana namàda-maaka welingu la hanggana, hi lupa nda pahili ita-ahapa.

¹²Dàngu kuita-ha da tau meti, ma-matua anakeda, da-ndolaku la hanggana nuna na kanjàka pareta. Ka bunggahu-danjaka da mbuku. Hàla hi bunggahu-ya na mbuku na hau, nu na Mbuku Tau Luri. Tunaka nu hi puhanja hukungu da tau meti, hama tudana na pawunda-da nunjuya na pa-tulihu daa la mbuku - mbuku nuda.

¹³Hàla na tehiku wuangu-nahaka da tau meti da maninja la tehiku. Na Meti dàngu na Pangia Metimbu da-wuangu-ha da tau meti da maninja lai nyuda. Mbuu ndàbada nuda da mameti hi puhanja hukungu hama tudana na pawunda-da.

¹⁴Tunaka nu na Meti dàngu na Pangia Meti hi kawuka-nja la libu epi. (Na libu epi yiana jia-duyaka na meti na pa-panduangu wàna.)

¹⁵Da tau da panda tulihu tamuda daa la Mbuku Tau Luri pa-kawuka-nja la libu epi.