Read Kambera PABOWANGU 21 Bible Online

PABOWANGU 21 - Kambera bible

PABOWANGU 21

¹Hàla ita-nggunyaka na awangu bidi dàngu na pinu tana bidi. Na awangu wungangu dàngu na pinu tana wungangu namohuka hamanai na tehiku namàda-ka.

²Ka ita-nggunyaka na paraingu matua, nu na Yeruhali bidi, ba na mapuru welingu la awangu welingu lai Ala. Na paraingu nuna pambàda hawanjiru-mayaka hama tuna na bidi papa kawini na pa-wotungu ngaü la pa-pahamburu dànya na bidi papa mini.

³Hàla rongunggunyaka talia lii welingu lai nu la kanjàka pareta na mawara pa-kodungu, “Nàhu na ngia pa-ngiangu-na i Ala la angu tauyaka! Nyuna napa luri angu-nanjaka, dàngu nyuda napa banjaru-nanjaka. I Ala wikima duna napa na maninya la hongada nyuda dàngu ba Ala-danyaka.

⁴Nyuna napa na-podahu hàlaha da wai mata welingu la matada. Na meti nda hilu nianyapa; na hawina, na hii, jàka ndia na hidumbu nda hili ni-mbunyapa. Jàka nggàraha da mamandai damàda-ka,” wàna.

⁵Hàla Nyuna na ma-mandapu la kanjàka napanii, “Nàhu Nyungga pabidi hàla-nggunyaka!” wàna. Hi napanii-mbungga nyungga, “Tulihu-ya yiana, nadu da pulungu yiada ba ma-deningu-ha dàngu ràka pawaiha,” wàna.

⁶Hàla napanii, “Lundungu-danyaka! Nyungga jiaka na pakiringu-na dàngu Nyungga jiaka na kanjupungu-na; Nyungga Mirika welingu la Kawunga-na lundu la Hupu-njàpuna. Nimbihu-na na tau na mamadau, napa kuwua juanya paunu welingu la matawai paluri wàngu.

⁷Na tau na matalu napa nangala-nja nuda welingu lai Nyungga. Nyungga napa Ala-nangga, tàka nyuna ana-nggunya.

⁸Tàka da tau da ma-wudutu, da ma-kaleka, da ma-kabularu, da ma-pameti tau, da ma-njuraku, da mawàngu alimu, da ma-lumungu maràpu, dàngu mbuu ndàbada da ma-kambàliku, napa pa-kawuka-nja la libu epi dàngu tana lira na ma-kandulangu, nu na meti pa-panduangu wàna,” wàna.

⁹Na haàtu welingu la honga pa-palewa da mapihu-da da mambàda katanja da kanaingu da mambinu pa-manjurangu wàngu da mapihu-da da panjàpu wàda, mai-nanyaka lai nyungga hi napanii, “Mai! Napa ku-paita-nggaunya na Bidi-papa kawini, nu na papaha-na na Ana Mbimbi,” wànangga.

¹⁰Ka harua-nanggaka na Ngahuna i Ala, tàka nuna na papalewa hi na-kariangga la pinu palindi na mambana janggana. Hi na-paita-ngganya na Yeruhali, na parai matua, na paraingu nuna puruna welingu la awangu, welingu lai Ala,

¹¹napuru wàngu bunjukuna dàngu wàngu mangunju-na i Ala. Na paraingu nuna na kalilangu hama tuna watu mata tawuru, hama tuna watu mbinduri pàndangu na ma-kahingiru, hama tuna na watu maninu.

¹²Na kangeli la winggiru-na na-bokulu jangga, dàngu hakambulu dàmbuda da pindu bokulu, dàngu hi dadaiha paraï da papalewa tau hakambulu madua. Nu la pindu boku - pindu bokulu pa-tulihu-ha da tamuda da hakambulu dàmbu kabihu Ihirailu.

¹³Ningu tailu mbuada da pindu la hau tuba - hau tuba: tailu mbuada la tuba pahunga lodu, tailu mbuada la tuba mbara luru, tailu mbuada la tuba mbara dia dàngu tailu mbuada la tuba patama lodu.

¹⁴Na kangeli-na na paraingu pa-palatangu la hakambulu dàmbu watu lataya. Nu la watu lata pa-tulihu-ha da tamuda da pa-pahuru-na na Ana Mbimbi ba tau hakambulu madua-ha.

¹⁵Na papalewa na mapanii dàngga ningu toku hukutu-na ma-welingu la àmahu rara, la pa-hukutu-ya nuna na paraingu, da pindu bokulu dàngu na kangeli-na.

¹⁶Na paraingu nuna patu larana — na nunjuna dàngu na ndàbaru-na hama-maada. Ka hukutu-nanyaka na paraingu nuna na papalewa ba nawànya na toku hukutu; na-pangalana 2400 kilu metiru[9] -na na nunjuna; na ndàbaru dàngu na janggana hama-mada dàngu na nunjuna.

¹⁷Ba jiaya na hukutu-nanya paraïna papalewa na kangeli-na, na pangala-na: na janggana[10] na kangeli-na nomu kambulu metiruna.[11] Na hukutu na pawàna na papalewa, hama-mana na pa-hukutu na pawàna na tau.

¹⁸Na kangeli paraingu pa-pandoi welingu la watu mbinduri pàndangu-ya, tàka na paraingu pa-pandoi welingu la àmahu rara ihi mbàngi-nanya, na-kahingiru hama tuna kaninuya.

¹⁹Da watu latana na kangeli paraingu, màtu - màtu watu mbana wili pa-manandangu wàda. Na watu kawunga latana pa-pandoi welingu la watu mbinduri pàndanguya, na padua wàna watu nilamu-ya, na patailu wàna watu yakutu-ya, na papatu wàna watu hàmurutu-ya,

²⁰na palima wàna watu mbinduri ma-huratungu amu aiya, na panomu wàna watu ndalima-ya, na papihu wàna watu itangu wingiru-ya, na pawalu wàna watu piruya, na pahiwa wàna watu topahu-ya, na pa-hakambulu wàna watu karihoparahu-ya, na pa-hakambulu hau wàna watu lanjuwàndiru-ya, na pa-hakambulu dàmbu wàna watu wàla mbunguru-ya.

²¹Da hakambulu dàmbu pindu bokulu, hakambulu dàmbu mutiara juaha, hau pindu - hau pindu hau mutiara-mana. Na ànda daa la paraingu àmahu rara ihi mbàngi-nanya, na-kahingiru hama tuna kaninu ma-kalilangu-ya.

²²Nda ku-itangu-a Uma Ala daa la paraingu nuna, nadu na Uma Ala ba jia wiki-mayaka i Miri, na Ala na Mahupu-mbiha, dàngu na Ana Mbimbi.

²³Na paraingu nuna nda nggàra naihi wàngu-apa harii mata lodu jàka ndia wulangu, nadu na mangunju-na i Ala ba jia-madua-yaka na ma-paharii-ya, dàngu na Ana Mbimbi jiaya na palita-na.

²⁴Da banjaru la pinu tana napa dalaku wànya na handaraku-na, dàngu da hanganji-mbu napa dangàndi-ha da pawulu-da daa la paraingu.

²⁵Da pindu bokulu-na na paraingu da-tabunggahu mànu la ngala hau lodu titapu; nda pabita-anja, nadu ba nda ningua rudungu lai nu.

²⁶Da bunjuku-da dàngu da pawulu-da da banjaru napa dangàndi-ha lai nu la paraingu.

²⁷Tàka na tau na matuya na hangia - hangia na ma-iraku, dàngu na ma-kambàliku — na kababa-na nggàra biaya na ma-iraku, nda hidama patama lai nu. Na matama mbulungu-ada da pa-tulihu tamuda daa la Mbuku Tau Luri, na mbukuna na Ana Mbimbi.