Read Kambera PABOWANGU 22 Bible Online

PABOWANGU 22 - Kambera bible

PABOWANGU 22

¹Na papalewa nunamai na ma-paita-ngganya na luku na paluri wàngu na waina. Na luku nuna nawàngu pa-kalilangu hama tuna na kaninu kahingiru dàngu nalulungu welingu la kanjàka pareta-na i Ala dàngu na Ana Mbimbi,

²la padua ànda la paraingu-ya. La hingina na luku nuna, la hapapa - hapapa ninja da pingi ai paluri wàngu, da mapahakambulu pa-nduangu pawua hau ndaungu, nu hadàkangu la dalu hau wulangu. Da ruda jiaha da pa-pamàlaru wànja da banjaru.

³Lai nu la paraingu nda ana ningua ngga - nggàra panggàna ràtungu-na i Ala. Na kanjàka pareta-na i Ala dàngu na Ana Mbimbi napa ninja daa la paraingu. Da atana napa dalumu-nya Nyuna,

⁴dàngu daita-ya na matana. Na tamuna napa pa-tulihu-ya la kaba matada nyuda.

⁵Nda nggàra daihi wàngu-apa nyuda palita jàka ndia harii mata lodu, nadu ba nda ningu-apa rudungu, i Miri Ala wikima duna na ma-handaraku-nja nyuda. Nyuda napa pareta-danyaka hama tuna hanganji lundu nu - nu.

⁶Hàla hi napanii-ngga na papalewa, “Da pulungu yiada da-deningu dàngu ràka pawaiha. I Miri Ala na mawua-nja Ngahuna da wunangu, mbàda paràha-nanjaka da papalewa-na la pa-pangita-nja da atana jàka nggàra-yaka na mànda jàmangu paluu tumbu napa,” wàna.

⁷“Eti wànyawa yiana!” wàna i Yehu: “Nyungga lu mai-manggunya. Oha-anaka na tau na ma-pamàndu-nja da pulungu da panyura hahangu la mbuku yiana!” wàna.

⁸Nyungga, Yuhani, mbàda rongu dàngu mbàda ita hàla-manggu-njaka yiada. Ba kuhàla-ka parongu dàngu pangita-ha mbuu ndàbada maràbaku-nggunyaka la hanggana na papalewa na mambàda paita hàla-ngganja dàngu ka ku-marubuku-nya ba wànggu,

⁹tàka nyuna napanii-ngga, “Màtangu! Àmbu marubuku-dungga nyungga! Marubuku-nya i Ala-a! Nadu nyungga yia dàngu nyumu hama ata-manda, dàngu hama tuna da angu dedimu ba hapajia-ha da wunangu dàngu mbuu ndàbada da tau da ma-karadaku-nja da lii langu la mbuku yiana!” wàna.

¹⁰Hàla ka hili panii-nanggaka, “Àmbu kàpi-dunja da lii pa-wunangu daa la mbuku yiana, nadu ba mareni-ama-naka na rehina yiana mbuu ndàbana ba na-patutungu.

¹¹Na tau na ma-akatu màta ka na-pangalangu pa-akatu; na tau na ma-iraku màta ka na-pairaku wikina; na tau na ma-patundungu la pawuku-na i Ala, màta ka na-pangalangu la papatundungu la pawuku-na i Ala, dàngu na tau na maleha wikina palumu-nya i Ala, màta ka na-pangalangu paleha wikina la palumu-nya i Ala,” wàna.

¹²“Eti-wamanya yiana!” wàna i Yehu, “nda nggi mandai-anapa napa ba kumai, ba kungàndi wunda, la pa-himbalu-ya nimbihu-na na tau tundunya na pambàda wundana.

¹³Nyungga jiaka na pakiringu-na dàngu Nyungga jiaka na kanjupungu-na. Nyungga Mirika welingu la kawunga-na lundu la hupu njàpuna,” wàna.

¹⁴Oha-adaka da tau da mabaha paili-ha da kalembi bokulu-da hi lupa ningu hàkuda la panganja da wuana na pingi ai paluri wàngu dàngu hi datama la paraingu, ba dawàngu pali ningu la pindu bokulu-na.

¹⁵Tàka da tau da mawunda-ha jàka nggàraha da ma-iraku, da ma-katangu kabeli mata, da tau da mawunda-ya na na-kajari, da ma-pameti tau, da malumungu marapu, da tau da ma-kambàliku, ba dawàngu kareuku-da dàngu ba dawàngu pawundada, mbuu ndàbada da tau tungu nu la hambeli paraingu-ya na pangia-da.

¹⁶“Nyungga, Yehu, mbàda paràha-manggu-njaka da papalewa-nggu lai nyimi, ka dapeka-nggainja yiada da hangia - hangia ndumana na pa-paloku wànguya na kabungguru. Nyungga duku wàla wuana i Ndautu-ka; Nyungga-maka na kandunu marai romu na ma-handaraku,” wàna.

¹⁷Na Ngahuna i Ala dàngu na Bidi Papa kawini dapanii, “Maiwa!” wàda. Nimbihu-na na tau na marongu-ya yiana, lupangu-mbu dapanii-maka bàdi, “Maiwa!” ka wàdambu. Dàngu jàka nggamuya na mamadau, màtawa ka namai! Dàngu jàka nggamuya na ma-patikingu màtawa ka nataku wai paluri wàngu na pawua juangu.

¹⁸La nimbihu tau na marongu-ha da lii pa-wunangu daa la mbuku yiana, nyungga Yuhani, kupeka hahanya: jàka ningu pabonjana na tau la lii da pa-wunangu yiada, napa i Ala nabonja-mayai duna nahuku-nanya ba nawànja da manjurangu da pa-huratu la mbuku yiana.

¹⁹Tàka jàka ningu papakurana na tau la lii da pa-wunangu yiada, napa i Ala na-pakura-manyai duna na kangehana na pa-huratu la mbuku yiana — nu na kangeha welingu la pingi ai luri dàngu welingu la parai matua nuna.

²⁰Nyuna na ma-patàka-nja mbuu ndàbada da lii yiada napanii, “Deningu-mana, Nyungga napa kuluu mai!” wàna. Amingu! Maiwa, dou Miri Yehu!

²¹Mili àru i Miri Yehu ka nawua-nya kanyuru mbuu ndàbana na banjaru-na i Ala![12]