Read Kambera PABOWANGU 4 Bible Online

PABOWANGU 4 - Kambera bible

PABOWANGU 4

¹Hàlaka patuna nu hili ngalangu-nggunyai harii mata. Kuita-ya na hau na pindu na ma-tabunggahu la awangu. Tunaka nu hili rongu-nggunyai na talia lii na mambàda panii dàngga la kawunga-na ba hama lingu taropitu-ya. Na liina, “Mai heikau yiahu. Napa Nyungga ku-paita-nggau jàka nggàraya napa na madedi,” wàna.

²Ailulu harua-ma-anangga Ngahuna i Ala. Ka ita-nggunyaka la awangu ninya ba hauna na kanjàka, ninya haàtu-na na ma-mandapu lai nu.

³Na matana na tau nuna na-handaraku hama tuna watu mata tawuru mbainduri iri dàngu mata tawuru ndalima-ya. Hi ninya na kapuri na maweli winggiru-nya na kanjàka, na betina ba hama mata tawuru njamarutu-ya.

⁴Hi ninjai da maweli winggiru-nya nuna na kanjàka ba dua kambulu patu mbuada da kanjàka hawiangu. Lai nu da-mandapu ba tau dua kambulu mapatu-ha da liku uru da mapaki mabara dàngu datuu ndàba tubuku àmahu rara.

⁵Welingu lai nu la kanjàka na-tapanjiru na kajilaku kabàla dàngu hi naluhu na lingu kanduruku ba nduru - nduruna. Dàngu la hanggana na kanjàka ninja ba pihuda da epi hulu da maroka; nuda jia-duhaka ba pihuda da Ngahuna i Ala.

⁶Ningumbu la hanggana na kanjàka nuna na pangita ba hama tehiku kaninu-ya, kahingiru hama tuna na kaha maninu-ya. La winggiru-na na kanjàka, la nimbihu karaha-na, ninja ba patuda da banda, la hangga la kajia-da mbinu wua matada.

⁷Na banda na ma-wungangu hama hingaya ba itaya. Na padua wàda, hama hapi mini rombanguya. Na pa-tailu wàda na matana hama tauya. Na papatu wàda hama mahawurungu ranjawali-ya ba itaya ba talànga hawurungu-na.

⁸Nu ba patuda da banda, nimbihuda ningu nomu wulu kàpa-mada, dàngu la winggiru-na dàngu la kuruna mbinu wua matada. Lodu rudungu nuda da banda nda da-pànjangu paludu, “Matua, matua, matua-wa i Miri, Ala Mahupu-mbiha; na maninya, na mambàda ninya dàngu na mani pangala-nya,” wàda.

⁹Nuda ba patuda da banda wunda-danya ludu hangia - hangia ba dawotu-nya, ba datembi-ya dàngu ba da-pamalangu-nya Nyuna na ma-mandapu la kanjàka, nu Nyuna na maluri lundu nu - nu. Tàka ba talànga lududa nu da banda,

¹⁰nuda da tau da madua kambulu mapatu liku uru maràbaku-danyaka la hanggana na tau na ma-mandapu la kanjàka, hi da-marubuku-nya Nyuna na maluri lundu nu - nu. Tunaka nu ndauha-danjaka da tubuku-da la hanggana nuna na kanjàka, hi dapanii,

¹¹“Dou Miri, dou Alama! Nyumua ràka manggepi-ha da wotungu, da tembi dàngu da kuaha. Nadu ba Nyumu ma-padika-nya mbuu ndàbana, dàngu ruku pawuku-amu mbuu ndàbana hi nadedi dàngu hi naluri,” wàda, wàna wàmu.