Read Kambera PABOWANGU 5 Bible Online

PABOWANGU 5 - Kambera bible

PABOWANGU 5

¹Tunaka nu ita-nggunyaka na hau kuluru mbuku la limana Nyuna na ma-mandapu la kanjàka. Na mbuku nuna nambinu wàngu pa-tulihu la hapapa - hapapa-na dàngu patungu tanda pa-henggilu-ya ba pihu mbuada.

²Hàla ita-nggunyaka na haàtu na papalewa na makapàru na mawara pa-kodungu: “Nggamu nu ràka mabera-ha yiada da tanda pa-henggilu dàngu ka na-wàlahu-ya yiana na mbuku?” wàna.

³Tàka, ka la awangu-kai, ka la pinu tanakai, jàka ndia ka la lumbu tanakai[3] nda ana ninguma haàtu mamàka pa-bunggahu-ya nu na mbuku, dàngu maita-ya nu daa.

⁴Ka ngi - ngiba-ngguka nyungga pahii ba nda ana haàtu-mbu maràka pa-bunggahu-ya nuna na mbuku, dàngu maita-ya nu daa.

⁵Hàla na haàtu welingu la hongada da liku uru hi napaniingga, “Àmbu hiidu! Tàngaru! Na hinga welingu la kabihu Yahunda, na wàla wuana i Ndautu na ma-bokulu, mbàda talu-naka ni. Nyuna ràka mabera-ha nuda da tanda pahenggilu ba pihuda dàngu ma-bunggahu-ya na mbuku,” wànangga.

⁶Tunaka nu ka ita-nggunyaka na heu na Ana Mbimbi na ma-ndolaku la padua kanjàka, ba da-winggiru-nya paraï da patu banda dàngu mbuu ndàbada da liku uru. Nuna na Ana Mbimbi hama tuna pambàda hambàli-ya ba itaya. Nyuna ningu pihuda da kaduna dàngu pihuda da wua matana: nu jia-duhaka da mapihu-da da ngahu welingu lai Ala da pambàda paràhangu la pinu tana nggubulu-na.

⁷Tunaka nu na Ana Mbimbi na-ndàharungu hi napiti-ya na kuluru mbuku welingu la lima kawana-na na tau na ma-mandapu la kanjàka.

⁸Ba talànga tunaka nu na Ana Mbimbi, ka maràbaku-danyaka da patu banda dàngu da madua kambulu patuda da liku uru la hanggana. Nimbihu-da da katangu jungga dàngu kaba àmahu rara maningu ihi kaminyangu, nu jia-duhaka da hamayangu-da da banjaru-na i Ala.

⁹Dawunda ludu bidi wiliku nyuda: “Ràka-mamu dumu Nyumu papiti-ya nana na mbuku dàngu pabera-ha da tanda pa-henggilu. Nadu ba mbàda pa-pameti-kauka Nyumu, dàngu wànya na metimu, na tau welingu la mbuu ndàbana na kabihu, na hilu, na nanggara dàngu na banjaru mbàda dingi-munyaka ndumana i Ala.

¹⁰Mbàda tumu-njaka nyuda hau banjaru ratu - ratu paleha, ka peku lumu-danya na Alanda, dàngu ka da-pareta la pinu tana,” wàda.

¹¹Tunaka nu nyungga hili ita-nggunyai. Kurongu-ha da talia liida da papalewa ba nda pira rata nda pira pàku biada danguda. Da-ndolaku winggiru-nya na kanjàka dàngu da patu banda lupa ba hapajia-ha da liku uru.

¹²Hi daludu pa-kodungu, “Na Ana Mbimbi na pambàda hambàli, ràkana ba Nyuna na makei kuaha, pawulu wàngu manggàna dàngu àtalu; ràka-mana Nyuna ba tembiya, ba pa-bokulu-ya dàngu ba wo - wotunya!” wàda.

¹³Hàla rongu-nggunjaka mbulu ndàbada da dika la awangu, la pinu tana, la lumbu tana dàngu la tehiku — kababa-na mbulu ndàbada da dika la pa-nggubulu awangu yiana — daludu, “Nyuna na ma-mandapu la pinu kanjàka dàngu i Ana Mbimbi, jia-haka da pa-wotungu dàngu da patembi, da ma-bokulu dàngu da ma-kuaha lundu nu - nu!” wàda.

¹⁴Ka hema-danyaka da banda mapatu, “Amingu!” wàda. Dàngu da liku urumbu maràbaku-danyaka dàngu marubuku-danyaka.